Yobe 41 - MUKANDA WA MYIDI MUKULU

¹ Badi batekemena kumutshimuna badi badidinga. Yeye anu mukutangile udi udishinda panshi.

² Udi mua kumubunda nnganyi? — Kadi udi mua kumutonuena mesu udiku anyi? —

³ Uvua mudianze kunsombesha tshiende tshintu bua meme kumupingajilatshi nnganyi? Bintu bionsu bidi panu mbianyi meme!

⁴ Tshiena muanji kunulondela mudi bidimba biende, bukole buende ne buimpe bua mubidi wende.

⁵ Ukadi musaye tshiseba tshiende nnganyi? Udi mubulule mbanga yende ku bukole udiku anyi?

⁶ Udi munzulule biibi bia mukana muende, bidi bileja menu adi akuatshisha bowa nnganyi?

⁷ Nyima wende mujima, udi mubuikila kudi mabamba makuatakane bimpe milongu ne milongu, bu ngabu mikole nansha bu dibue.

⁸ Mabamba ende adi malamakane bimpe, nansha lupepele kaluena mua kupitshila pankatshi pawu.

⁹ Dibamba dionsu ndilamakane ne dikuabu. Kabena mua kutulakaja nansha dimue.

¹⁰ Diba didiye wela nyashi, udi wela nkenke, mesu ende adi akunza bu kabundubundu ka diba.

¹¹ Ndimi ya kapia idi ipatuka mukana muende, tuntolentole tua kapia tudi tupona panshi.

¹² Muinshi udi upatuka mu diulu diende, bu mudi luesu lufuima pa kapia.

¹³ Mupuya wa mukana muende udi ne luya lukole, ludi mua kutemesha nalu makala a kapia. Bualu ndimi ya kapia idi ipatuka mukana muende.

¹⁴ Udi ne bukole ku nshingu kuende bupite, nanku muntu yonsu udi ubumona, udi ne bowa, uzakala.

¹⁵ Pambidi pende padi minyengu mikole, kayiyi ibuyama nansha wewe muyishindamene.

¹⁶ Musunya wa muoyi wende udi mukole bu dibue dia tshipelelu.

¹⁷ Padiye ujuka, nansha bantu ba bukitu badi bumvua bowa, badi bapampakana, bapanga tshia kuenza.

¹⁸ Nansha bantu bamutapa muele, bamuele difuma nansha musongolu, nansha bamuasa mikete, kabiena bimuenzela bualu to.

¹⁹ Bualu muele udi ne bukole bu kasosa, tshiamu tshikunze tshidi ne bukole anu bu mutshi mubole.

²⁰ Kabena mua kumuipata ne miketa. Nansha mabue adibu bamuasa adi anu bu bisosa.

²¹ Nyindu udi anu bu lusongu lua kasosa, padibu bamuela musongolu, udi anu useka.

²² Mu difu diende, mudi mabamba matue masongoloke, adi ashiya tshikoka mu bisosa bu tshiamu tshia kudima natshi.

²³ Padiye ubuela mu mayi, udi wanyungisha, bu mudi mayi asaba mu luesu. Udi wavuandulula, bu mudi manananshi apia mu luesu.

²⁴ Mulanjilanji mutoke udi umueneka kunyima kuende mu mayi, udi wela nsensa pa mutu pa mayi, mienze bu nsuki mitoke.

²⁵ Kena ne udiye mufuanangane nende muinshi mua diba. Ndi mumufuke bua kikadi ne bowa.

²⁶ Udi upetula nyama yonsu, nansha yeye munene menemene. Amu yeye ke mukalenga wa nyama ya lonji.