Yobe 30 - MUKANDA WA MYIDI MUKULU

Yobe kuandamuna kabidi ku ndekelu ne: kadi lelu ndi nkenga

¹ Pashishe bansongalume badi ne bidimu bidi kabiyi bu bianyi, badi bandembakaja mpindiewu. Batatuabu kale kabavua ne mushinga nansha. Tshivua mua kuanyisha bua bambuluishe mbua yanyi ivua ilama bimuna bianyi.

² Batatuabu abu kabavua ne bukole nansha bukese, bavua mua kungambuluisha ku tshinyi?

³ Bavua ne nzala bapange tshiakudia. Ke pavuabu bakeba tshiakudia mu metu, ditunga dia miidima didi kadiyi ne bantu.

⁴ Bavua baka bisosa bivua ne luepu bia mu tshipuka. Bavua badia miji ya mitshi.

⁵ Bantu bonsu bavua babipata, babalondakaja ne mbila mikole bu bena buenzayi.

⁶ Bavua baya basomba mu mbuwa, mu mpongu ne mu mbuebue.

⁷ Bavua badisangisha muinshi mua mitshi ya meba, bela mbila bu nyama munkatshi mua bipuka.

⁸ Bavua bantu batatakane kabayi nansha ne dina. Bavua babafuta mitshi, babipata mu ditunga.

⁹ Kadi mpindiewu bana bavuabu balela, badi basaka misambu bua kunseka. Badi bangela mu nsumuinu.

¹⁰ Badi bantshina, bansesuka, banjebula. Badi bangela mata mu mesu kabayi bundu.

¹¹ Katshia Mvidi Mukulu wantekesha mu maboku, wamfuisha bundu, badi bankengesha muabu muonsu.

¹² Bantu bavule badi bamfunda. Badi bansakila bua ndishinde. Badi banteya bua kumbutula.

¹³ Bavua banjikila njila yonsu. Yonsu wa kudibu udi unkebela diakabi. Muntu nansha umue kena mua kubakandika to.

¹⁴ Bavua bafike bua kunduisha, bu bantu badi batubula bimana bia tshimenga babuelamu.

¹⁵ Bowa budi bunkuata nseke yonsu. Buneme buanyi mbupepuka bu buambula kudi lupepele. Diakalenga dianyi ndimane kujimina bu mudi divuba dipita.

¹⁶ Mpindiewu nkadi nkeba kufua. Matuku onsu ndi amu mu dikenga.

¹⁷ Butuku makenga adi ansamisha ne mifuba mene. Ndi nsama bikole tshiyi mpeta dikisha.

¹⁸ Mvidi Mukulu mmukuate mu tshilamba tshianyi bikole, udi mumfine mu nshingu bu mudi nshingu wa tshinkutu munganye.

¹⁹ Udi ungimansha mu bitotshi. Meme kuenza bu lupuishi nansha butu.

²⁰ Mvidi Mukulu wanyi, meme kukubikila, kuimana kumpala kuebe, kadi kuena ungitaba, kuena nansha untangila to.

²¹ Ukadi unkengesha ne tshikisu. Udi musue kundeja bukole buudi nabu.

²² Udi musue bua lupepele lungambule luya nanyi. Tshipepele tshikole tshidi tshintambakaja eku ne eku.

²³ Ndi mumanye ne ukadi untuma ku bafue, muaba udi bonsu batshidi ne muoyi ne bua kusangila.

²⁴ Kadi muntu udi ukeba kubutuka, kena mua kuolola tshianza anyi? Muntu udi mu dikenga, kena ulomba bua kumuambuluisha anyi?

²⁵ Tshivua mudile pamue ne bantu bavua mu dikenga anyi? Meme kubungama pa kumona lutatu ludi bapele nalu.

²⁶ Meme kutekemena disanka, kadi meme kupeta dikenga. Meme kuindila butoke, kadi anu miidima kuenzeka.

²⁷ Ndi mpampakana amu kupampakana, katshia dikenga edi dinkuate.

²⁸ Ndi ngenda anu mu miidima. Tshiena mmona diba. Nansha munkatshi mua bantu ndi ngela anu mbila.

²⁹ Ndi ngela mbila ya dibungama, bu nyama ya mibuabua. Ndi ndila muadi pa nkayanyi bu kasonganyunyi.

³⁰ Dikoba dianyi ndifike fitutuu. Mifuba yanyi idi ipia ne luya lukole.

³¹ Lunzenze luanyi ludi luimba anu misambu ya madilu. Lushiba luanyi ludi lusaka muyenga wa badi bela anu kasala.