Yobe 3 - MUKANDA WA MYIDI MUKULU

YOBE UDI UDIABAKENA KUMPALA KUA BALUNDA BENDE BASATU ( 3—31 ) Yobe kutua mikemu, wamba ne: mbimpe kufua pa mutu pa kuikala ne muoyi

¹ Pashishe bionsu abi bimane kuenzeka, Yobe kuakula, utshipa dituku divuabu bamulele,

² wamba ne:

³ Akia, Mvidi Mukulu ajimije dituku divuabu bandele, ne butuku buvuabu bamba ne: “Mbimite muana wa balume!”

⁴ Dituku adi dikale dia miidima mikole. Mvidi Mukulu kadivuluki! Butoke kabuditokeshi nansha.

⁵ Miidima mikole idikuate! Divuba difike didibuikile! Ngondu ajimije nsese ya diba, akuatshishe bantu bowa.

⁶ Butuku abu buikale bua miidima mikole. Kabubadi munkathi mua matuku a mu tshidimu. Kabena mua kububala mu matuku a ngondu.

⁷ Eyowa, butuku abu, kabena mua kuluangana to, kabena mua kuela tunkunduluila nansha!

⁸ Bena majimbu bonsu, badi bamanya mua kutshipa matuku, ne badi ne bukole bua kutabuluja nyoka wa tshidika, batshipe butuku abu.

⁹ Kabumonyi mutotu wa nkesha! Padibu mua kutshia, kabuyi butshia. Kabidi kabumonyi nsese ya diba mudidi dibanda.

¹⁰ Bualu kabuvua bukandika bua kabandedi, kabuvua bungambuluisha bua tshimonyi dikenga bunene nenku.

¹¹ Tshiena mudianze kufuila munda mua mamu wanyi bua tshinyi? Bu meme mudianze kufua ku tshilelelu bivua bimpe.

¹² Mvua musangane binu bibidi bia tatu bua yeye kungambula, ne mabele abidi bua meme kuamua bua tshinyi?

¹³ Bu meme mufue kuonsu aku, mvua mua kuikala mu lukita talalaa, muikishe mu bupole.

¹⁴ Mvua mua kuikala mulale pamue ne bakalenga, balombodi banene ba ditunga, bavua bibakulula nzubu ivua mibumbule.

¹⁵ Mvua mua kuikala mulale pamue ne bana ba bamfumu, bavua ne nzubu yabu milengeja ne mpawungi, ne tshiamu tshitoke tshia mushinga mukole.

¹⁶ Meme tshivua mua kuikalapu to. Mvua mua kuikala bu muana wa tshituka mubutame, nansha bu bana batekete badi kabayi bamone butoke.

¹⁷ Ku bafue bena lonji kabena benza kabidi bibi to! Koku aku, bantu badi bamane kupungila, kabayi kabidi ne bukole, badi bikisha.

¹⁸ Koku aku, nansha bena lukanu mbapete dikisha. Kabena bumvua kabidi mbila ya badi babalama.

¹⁹ Ku bafue, bantu banene ne bakese badi amu mushindu umue. Mupika kena ne mfumuende to.

²⁰ Mvidi Mukulu udi utshishila bena dikenga dituku, bua tshinyi? Bena kanyinganyinga kabena bafue bua tshinyi?

²¹ Badi bindila lufu, kadi kabena balumona. Badi balujinga mudibu bajinga biuma.

²² Bavua mua kuikala basanka bikole bu bobu mua kuya ku bafue!

²³ Ndi bu muntu udi mupange kudiye mua kuya, Mvidi Mukulu mmuntshintshimike nseke yonsu, mundamatshishe ku tshimana.

²⁴ Pandi mumvue mua kudia, ndi ntua amu mikemu. Mbila yanyi ya dikenga idi ipatuka mukana, bu mudi mayi apueka amu kupueka.

²⁵ Amu bindi ntshina, ke bidi bienzeka! Bidi binkuatshisha bowa, ke bidi bingenzekela!

²⁶ Tshiena ne ditalala, nansha bupole nansha dikisha. Ndi nkenga amu kukenga.