Yobe 26 - MUKANDA WA MYIDI MUKULU

Yobe kuandamuna Bildade ne: biudi wamba bidi mua kungambuluisha ku tshinyi?

¹ Pashishe Yobe kuandamuna ne:

² Akia, bu muudi wewe mumanye mua kuambuluisha bakengi, kabidi mumanye mua kusamba mupele wa kayi bukole!

³ Kia, bu muudi wewe mumanye mua kubela muntu, mubule lungenyi. Kabidi udi uleja muudi mumanye malu onsu.

⁴ Kadi mayuki ebe baudi wambidila mbanganyi? Uvua mukuambile bua kuakula nanku nnganyi?

Bionsu bidi ku bumfumu bua Mvidi Mukulu

⁵ Bafue badi basa mu ditunga dia miidima. Badi bazakala muinshi mua mayi manene.

⁶ Bualu kandondu ka bafue kadi amu patoke kumpala kua Mvidi Mukulu. Tshilamba katshiena mua kubuikila dijimba ku mesu ende to.

⁷ Amu Mvidi Mukulu ke udi mubalule tshibuashibuashi, mubalule buloba bulembelela anu tshianana.

⁸ Udi mubute mvula mu mavuba, udi mualame bimpe bua kaapandiki bua bujitu.

⁹ Udi ujika ngondu tshibambalu, usemeja mavuba kumpala kuende.

¹⁰ Uvua mufunde tshitangu tshinyungulule mayi manene, tshidi mukalu pankatshi pa butoke ne miidima.

¹¹ Padi Mvidi Mukulu utanda, makunji adi ambula diulu adi azakala, akatshila.

¹² Bukole bua Mvidi Mukulu mbutshimune mayi manene, malabale. Amu bua lungenyi luende mmutshimune nalu kabidi mushipa wa tshidika wa mu mayi.

¹³ Udi wela mupuya, utokesha tshibuashibuashi. Tshianza tshiende tshivua tshishipa nyoka wa mantonya,

¹⁴ Ebi bidi amu midimu mikese ya Mvidi Mukulu itudi tutela, bualu ku bionsu bidiye muenze, bitudi bamanye mbikese. Udi mua kujingulula bunene buende nnganyi?