Yobe 16 - MUKANDA WA MYIDI MUKULU

Yobe kuandamuna ne: mu diulu mudi muntu udi ujadika ne meme tshiena ne bualu

¹ Pashishe Yobe kuandamuna ne:

² Nkadi mumvumvue malu anudi nuamba. Nudi basue kunsamba, kadi nudi nuntonda. Nudi nungebeja ne:

³ “Newambe miaku ya bupale too ne ku diba kaayi? Ndikenga kayi diudi nadi bua wewe kuandamuna amu kuandamuna?”

⁴ Bu nuenu bikale bu mundi emu, meme muikale munudi amu, mvua mua kuamba malu anudi nuamba nuenu. Mvua mua kunubela panyi ne nsumuinu mimpe. Mvua mua kunyukisha mutu.

⁵ Mvua mua kunukolesha ku muoyi, kadi anu ne miaku. Mvua mua kunusamba, kadi anu mukana patupu.

⁶ Kadi pandi ngakula, dikenga dianyi kadiena diteketa nansha. Meme mupuwe, dikenga kadiena dijika.

⁷ Eyi, bulelela, Mvidi Mukulu mmumbutule, mmushipeshe bana banyi bonsu.

⁸ Wewe kunduisha, nkadi munyane bikole, mubidi mmushale amu mifuba pa mifuba nkayayi. Ke padi bantu bantangile bu muena tshibawu.

⁹ Wewe kunduisha, kusumakaja menu ne tshiji, wewe kundondakaja. Wewe muluishi wanyi, udi untangila ne lukinu.

¹⁰ Bantu badi bakula amu kuakula, bantandisha, bantuta mapi, bampenda, badi badikunguja bua kunduisha.

¹¹ Mvidi Mukulu mmumfile kudi bansonga bena buenzayi, mmunteke mu bianza bia bantu babi kabayi ne mikenji.

¹² Mvua nsomba talalaa, kadi Mvidi Mukulu kunkuatshisha bowa, kumpia mu nshingu, kungela panshi, kuntangila bu tshintu tshia kuteta natshi ndudi yende.

¹³ Mikete idi ipepuka ku nseke yanyi yonsu, udi ungasa mikete mu tonyi, kuyi ungumvuila luse, mayi a kanyonga adi atangalaka pa buloba.

¹⁴ Udi udiela pambidi panyi bu muena mvita, udi untapa amu kuntapa mputa.

¹⁵ Tshilamba tshia lufuila tshidi pambidi panyi diba dionsu. Ndi nsomba mu lupuishi, tshiyi kabidi ne bukole.

¹⁶ Ndi ndila bikole, mesu akadi mankunze onsu, mmamane kuwula, tshiyi mmona bimpe.

¹⁷ Tshivua muenze bualu bubi nansha bumue, mvua mutendelele amu bimpe, tshiyi ne mpala ibidi to.

¹⁸ Wewe buloba, kubuikidi mashi anyi, bantu bonsu bumvua mbila indi ngela.

¹⁹ Eyowa, mu diulu mudi muntu udi ujadika malu anyi, udi undumbuluila, mutue ku tshianyi.

²⁰ Kadi meme ndi mutangile amu kudi Mvidi Mukulu, balunda banyi badi banseka, ndi ne binsonji mesu tente.

²¹ Akia, udi ungambuluisha akose nsambu yanyi, idi pankatshi panyi ne Mvidi Mukulu, bu mudibu bakosa nsambu pankatshi pa muntu ne mulunda wende.

²² Eyowa, angambuluishe, bualu matuku anyi mmabale ku minu. Ndi nya mu njila udibu kabayi batua bapingana.