Yobe 14 - MUKANDA WA MYIDI MUKULU

Yobe kuamba kabidi ne: panu mpasangana pakole, masela ne bilunda mbisangane bimene

¹ Muntu udi amu bu muana mulela kudi mukaji. Udi usomba panu amu matuku mabale ku minu, mu dikenga ne mu lutatu.

² Muntu udi bu tshilongu tshidi tshibaluluka, tshifubidila musangu umue. Udi upita, ujimina diakamue bu mundidimbi.

³ Mvidi Mukulu wanyi, muntu wa nanku ke uudi musue kukenketa! Ke uudi ufunda ku tshilumbu!

⁴ Kudi muntu udi mua kupatula tshintu tshidi ne mikiya ku tshintu tshidi katshiyi ne mikiya anyi? Nansha kakese!

⁵ Amu wewe ke udi mujadike bungi bua matuku, ne bungi bua ngondu bidi muntu mua kulala panu. Muntu kena mua kusakidila dituku nansha dimue.

⁶ Nanku, ulekele kumutentekela, asombe talala. Ajikije mudimu wende udiye ukuata.

⁷ Nansha bobu bakose mutshi, tudi amu mua kutekemena tshintu, mutshi udi mua kusasa tshiakabidi, kuela ntonga.

⁸ Nansha miji mimana kukulakajila mu buloba, kabidi nansha tshikuku tshiawu tshimana kubolela panshi.

⁹ Mutshi awu padiwu upuita mayi, udi mua kumena tshiakabidi, kuela matamba bu mutshi mutekete.

¹⁰ Kadi padi muntu ufua, kuende nkujika! Neumukebele penyi?

¹¹ Dituku dikuabu misulu idi mua kuma. Muaba uvua mayi manene kamuena mua kuikala kabidi mayi to.

¹² Kadi muntu udi mufue, kakubika to. Kakujuka ku tulu tuende tua ndekelu to. Neatabale amu diba didi diulu dibutuka, dijimina.

¹³ Mvidi Mukulu wanyi, bu wewe mua kunsokoka, kundama mu dijimba dia bafue too ne muajika tshiji tshiebe! Nenshalemu too ne ku dituku diudi musue kumvuluka tshiakabidi!

¹⁴ Kadi muntu mumana kufua, udi mua kubika tshiakabidi anyi? Uvua amu mua kuikala ne lutulu mu matuku atshidiye ukuata mudimu panu, utekemena too ne paudi ufika, bua kunjula.

¹⁵ Diba adi neumbikile meme, nengitabe. Neummone meme muntu uudi mufuke.

¹⁶ Diba adi, nansha wewe unkenketa konsu kundi nya, kuakubala bungi bua bilema bianyi kabidi to.

¹⁷ Nensokoke bilema bianyi mu tshibombu, tshidibu basuike bimpe. Neukupule ntupakanyi yanyi.

¹⁸ Kadi tshikondu tshikuabu, mikuna neyupuke, mbuebue neitangidike.

¹⁹ Mayi neapande mabue, mvula mukole neanyange madimi. Ke muudi wewe ujimija ditekemena didi muntu nadi.

²⁰ Udi wela muntu panshi, umujimija kashidi, udi umutuma ku lufu, mpala wende mumane kunyanguka.

²¹ Padibu bapesha bana bende lumu, kena mumanye bualu nansha bumue. Padibu babapepeja, kena umona to.

²² Dikenga didiye umvua, didi anu diende yeye. Udi utua mikemu amu bua dikasa dibi didiye yeye nadi.