Yirmeya 52 - MUKANDA WA MYIDI MUKULU

Nebukadnesare udi ukuata Sedekiya mu lukanu

¹ Sedekiya uvua ne bidimu makumi abidi ne tshimue, pavuaye mudie bumfumu mu ditunga dia bena Yuda. Uvua mushale mu bukalenga bidimu dikumi ne tshimue mu Yerushalayime. Dina dia mamuende divua Amutale. Uvua muana wa Irmeya, uvua musombe mu tshimenga tshia Libna.

² Kadi Sedekiya uvua muenze malu mabi adi Maweja-Nangila mubenge, anu muvua Yoyakime muenze.

³ Malu avua menzeke mu Yerushalayime ne mu bukalenga bua Yuda tshikondu atshi, avua ajula tshiji tshia Maweja-Nangila. Nanku Maweja-Nangila kavua muanyishe bantu bende kabidi to. Ke Sedekiya kutombokela Nebukadnesare mukalenga wa mu Babilone.

⁴ Nanku Nebukadnesare kufika mu Yerushalayime ne tshiluilu tshiende. Bena mvita bende kuasa mitanda yabu mitangilangane ne tshimenga. Kuelabu tshimenga munkatshi basokome mu biina. Bivua bienzeke tshidimu tshia tshitema tshia bukalenga bua Sedekiya, dituku dia dikumi dia ngondu wa dikumi.

⁵ Bavua baluisha tshimenga too ne ku tshidimu tshia dikumi ne tshimue tshia bukalenga buende.

⁶ Tshiyole tshia nzala tshivua tshikole mu tshimenga. Bantu kabavua kabidi ne biakudia to. Ku matuku tshitema a ngondu muinayi,

⁷ bena Babilone kunyanga tshitupa tshia tshimana tshia tshimenga. Butuku, bena mvita ba bena Yuda kunyema. Nansha muvua bena Babilone banyungulukile tshimenga, bena Yuda kupatukila ku tshiibi tshia pankatshi pa bimana bibidi, pabuipi ne lupangu lua mukalenga. Pashishe kuyilabu ku njila wa ku tshibanda tshia Yardene.

⁸ Kadi bena mvita ba bena Babilone bavuabalondakaja mukalenga Sedekiya. Kumupetabu mu mpata wa Yeriko. Bena mvita bende bonsu bakavua bamane kumushiya nkayende.

⁹ Bena Babilone kumukuata, kumuela mu lukanu, kuya nende ku Ribla, kuvua mukalenga wa Babilone musombe mu ditunga dia Amate. Ke kuvua Nebukadnesare mukosela tshilumbu tshia Sedekiya.

¹⁰ Ke kuvuabu kabidi bashipela banaba balume ba Sedekiya, tatuabu mutangile. Ke kuvuabu bashipela kabidi balombodi bonsu ba mu bukalenga bua bena Yuda.

¹¹ Pashishe mukalenga wa bena Babilone kutuma diyi bua batonkone Sedekiya mesu, bamusuike bikole ne nkanu, bamutume mu Babilone, bamuelemu mu lukanu. Sedekiya uvua mushalemu too ne ku lulu luende.

Nebuzaradane udi ubutula Yerushalayime, umana

¹² Mu tshidimu tshia dikumi ne tshitema tshia bukalenga bua Nebukadnesare, dituku dia dikumi dia ngondu muitanu, Nebuzaradane kubuela mu Yerushalayime. Uvua mulombodi wa bena mvita balami ba mukalenga, mufidi wa ngenyi wa mu nzubu wa mukalenga wa bena Babilone.

¹³ Uvua muoshe nzubu wa Mvidi Mukulu, nzubu wa mukalenga, ne nzubu ya mu tshimenga, nangananga nzubu yonsu ya bantu banene ba mu Yerushalayime.

¹⁴ Bena mvita ba bena Babilone bavuaye nabu kushimbula bimana bivua binyungulule Yerushalayime.

¹⁵ Pashishe Nebuzaradane kutuma ku Babilone bantu bavua bashale mu tshimenga, bakuabu ba mu meku a bapele, banga bavua badifile kudi mukalenga wa bena Babilone, too ne batshivua mu tshimenga bavua bamanye bimpe midimu ya bianza.

¹⁶ Kadi uvua mushiye bena ditunga bianza bitupu bua badime madimi a mvinyo ne madimi makuabu.

¹⁷ Bena Babilone kunyangakaja makunji a tshiamu tshikunze avua ku mushiku wa nzubu wa Mvidi Mukulu, ne matempu, ne dilongu dinene dia tshijengu dia tshiamu tshikunze divua mu lupangu. Kuangatabu biamu bikunze bionsu abi, kuya nabi ku Babilone.

¹⁸ Kuangatabu kabidi bintu bionsu bia tshiamu tshikunze bivuabu batendelela nabi. Ke ngesu ya kuboyela butu, bikasu, nkala, malongu a mayi a nsompu ne makopu.

¹⁹ Mulombodi wa bena mvita balami, uvua muangate kabidi bintu bionsu bivuabu benza ne tshiamu tshia mpawungi ne bia tshiamu tshitoke tshia mushinga mukole: ke malongu makese, mbabula, makopu a kumiamina nawu, ngesu ya kuboya nayi butu, bitekelu bia miendu, makopu ne ngesu mikuabu.

²⁰ Bintu bionsu bia tshiamu tshikunze bivua mukalenga Shelomu muenze bua kukuata nabi mudimu mu nzubu wa Mvidi Mukulu, kabavua ne mushindu wa kubipima bujitu to: ke makunji abidi, dilongu dinene dia tshijengu, ne nyama ya ngombe milume dikumi ne ibidi ivua midiambule, kabidi ne matempu.

²¹ Tshilejilu: dikunji dionsu divua bule bua metre tshitema ne nyunguluilu wa metre asambombu: divua munda muondoke, divua ne mupimbu wa tshiamu wa santimetre muanda mukulu.

²² Ku dikunji dionsu bavua bela mutu wa tshiamu tshikunze. Mutu ewu uvua bule bua metre abidi ne tshitupa. Bavua baulengeje nseke yonsu ne tshilengejilu tshifuane bukondu, tshia tshiamu tshikunze, kabidi ne bimuma bia grenade bia tshiamu tshikunze. Makunji abidi ne bilengejilu biawu bivua amu mushindu umue.

²³ Bimuma bivua makumi tshitema ne bisambombu bifuanangane ne bimuma bia mutshi wa grenade. Kadi bimuma bionsu bivua lukama, bivua binyungulule bukondu.

²⁴ Mfumu wa bena mvita balami ba mukalenga, uvua mukuatshishe mutuangaji munene Seraya, Sefanya tshindonde tshiende ne batuangaji basatu balami ba tshibuelelu tshia nzubu wa Mvidi Mukulu.

²⁵ Uvua mukuatshishe kabidi mulombodi wa bena mvita, ne bantu muanda mutekete ba mu lubanza lua bukalenga, mufundi wa mikanda wa mulombodi wa tshiluilu uvua ufunda mena a bantu bavua babuele mu tshiluilu, ne bena Yuda bakuabu makumi asambombu. Bantu bonsu aba bavua diba adi mu Yerushalayime.

²⁶ Nebuzaradane uvua mubafile kudi mukalenga wa bena Babilone uvua mu Ribla.

²⁷ Ke mukalenga awu kubashipesha anu muaba awu mu ditunga dia Amate. Ke muvuabu bakuate bena Yuda baye nabu kule mu ditunga dia bende.

²⁸ Mu tshidimu tshia muanda mutekete, Nebukadnesare uvua mukuate, muye ne bena Yuda binunu bisatu makumi abidi ne basatu.

²⁹ Mu tshidimu tshia dikumi ne muanda mukulu tshia bukalenga buende, uvua mukuate, muye ne bena Yerushalayime nkama muanda mukulu ne makumi asatu ne babidi.

³⁰ Mu tshidimu tshia makumi abidi ne tshisatu, Nebuzaradane, mulombodi wa bena mvita balami, uvua mukuate kabidi bena Yuda nkama muanda mutekete makumi anayi ne batanu. Bantu bonsu basanga bavua binunu binayi ne nkama isambombu.

Mukalenga wa bena Babilone udi ufuila Yoyakine luse

³¹ Yoyakine, mukalenga wa bena Yuda, mumane kushala mu bupika bidimu makumi asatu ne muanda mutekete, ke Evile Merodake kushala mukalenga wa bena Babilone. Mu matuku makumi abidi ne muanda mutekete a ngondu wa dikumi ne muibidi wa tshidimu atshi, mukalenga Evile Merodake kufuila Yoyakine luse, kumupatula mu lukanu.

³² Uvua uyukila nende ne muoyi muimpe. Kumupaye muanzu mubandile ku wa bakalenga bakuabu bavuaye nabu mu Babilone.

³³ Uvua mukandike bua Yoyakine kavuadi bilamba bia bena lukanu. Yoyakine uvua udiila mpindiewu anu ku mesa a mukalenga wa bena Babilone.

³⁴ Ke muvua Yoyakine upeta ku dituku dionsu bintu bionsu bivuaye nabi dikenga kudi mukalenga wa bena Babilone too ne ku lufu luende.