Yirmeya 47 - MUKANDA WA MYIDI MUKULU

Mukenji udi utangila bena Peleshete

¹ Umvuayi malu avua Maweja-Nangila muambile Yirmeya bua bena Peleshete. Uvua mumuambilewu pavua mukalenga wa Ejipitu kayi muanji kufika bua kuluisha tshimenga tshia Ngaza.

² Maweja-Nangila udi wamba ne: Mayi manene adi afuma ku mutu kua ditunga adi ne muenji mukole, apasalala mu ditunga, mu madimi, mu bimenga ne mu nzubu ya bantu. Bantu bonsu badi bela miyenga. Bena ditunga badi badila miadi.

³ Badi bumvua mikuma ya bikonu bia nyama ya tubalu, mutoyi wa matempu a mvita, ne wa nkata yawu itutakana. Baledi badi bapua bana babu muoyi, babashiya. Badi bimana maboku teketee.

⁴ Ke dituku didibu ne bua kubutula bena Peleshete bonsu, nanku muntu nansha umue kakushala bua kuambuluisha bena Tire ne bena Sidone. Maweja-Nangila udi ubutula ditunga dijima dia bena Peleshete, ndelanganyi ya bantu aba bavua bafume ku tshidila tshia Kaftore.

⁵ Bena Ngaza mbakungule mu mitu, badi mu madilu. Bena mu Askalone mbashale bapuwa ne kanyinganyinga. Nuenu ndelanganyi ya bantu ba mpolondu. Nenuditape mputa pambidi too ne ku diba kaayi?

⁶ Nudi nuamba ne: “Eyi, muele wa mvita wa Maweja-Nangila, kuena wikisha anyi? Pingana mu tshibubu tshiebe. Usombe talalaa, wikishe.”

⁷ — Kadi muele ewu newikishe munyi? Maweja-Nangila mumutumine diyi, muwambile bua kukengesha bena Askalone ne bantu badi basomba ku muelelu wa mayi manene.