Yirmeya 45 - MUKANDA WA MYIDI MUKULU

Maweja-Nangila udi umanyisha Baruke malu

¹ Pavua Baruke, muana wa Neriya, mufunde malu a Mvidi Mukulu avua Yirmeya mumuambile, Yoyakime, muana wa Yoshiya, ukavua mukalenga wa bena Yuda bidimu binayi. Ke Yirmeya kuambila Baruke ne:

² — Maweja-Nangila Mvidi Mukulu wa Izrayele udi ukuambila wewe Baruke ne:

³ Udi udila muadi ne: “Akia! Malu anyi onsu adi amu mabi! Meme mudianjile kuikala ne ntatu ya bungi, Maweja-Nangila, untumina kabidi mikuabu. Ndi mupungile ntua mikemu, tshiena ne dikisha nansha dikese!”

⁴ Nanku Maweja-Nangila mmungambile bua kukumanyisha ne: “Ndi nshimbula tshimvua muibake, ndi njuula tshimvua mukune. Ndi mbondakaja ditunga dijima.

⁵ Kadi wewe udi ne dikamakama dia kukeba bidi bikusankisha amu wewe! Kukebi kantu nansha kamue to! Bualu dikenga dingatuma nedikuate bantu bonsu. Ke tshindi meme Maweja-Nangila ngamba. Kadi ndi nkulaya amu bualu bumue: Konsu kuudi musue kuya, kabakukushipa nansha!”