Yirmeya 41 - MUKANDA WA MYIDI MUKULU

¹ Kadi mu ngondu wa muanda mutekete, Ishemayele, muana wa Netaniya, muikulu wa Elishama, kufika kudi Ngedaliya mu Mispa. Ishemayele uvua wa mu diku dia bukalenga. Ku kale uvua wenza mudimu mu lubanza lua bukalenga. Uvua mufike ne bantu dikumi. Pavuabu ne Ngedaliya ku mesa badia,

² Ishemayele kujuka musangu umue, ne bantu bavua bamufila, kutapabu Ngedaliya ne muele, kumushipa. Yeye ke uvua mukalenga wa Babilone muteke bua kulombola ditunga dia Yuda.

³ Pashishe Ishemayele kushipa bena Yuda bonsu bavua pamue ne Ngedaliya mu Mispa. Kushipaye too ne bena mvita ba bena Babilone bavua muaba awu.

Ishemayele udi ushipa bena luendu makumi muanda mukulu

⁴ Bobu bamane kushipa Ngedaliya, kupita matuku abidi, bantu kabavua banji kumanya bua lufu luende alu to.

⁵ Nanku bantu balume makumi muanda mukulu ba ku Shekeme, ba ku Shilo, ne ba ku Samariya, kufika. Bavua babeya miedi, bavuale bilamba bipandike, baditape mputa pambidi. Bavua bambule milambu ya ntete ya kuenza bukula, ne ya musenga wa kamonya, bua kuya kulambula Maweja-Nangila mu nzubu wende wa mu Yerushalayime.

⁶ Ishemayele kupatuka mu Mispa bua kusambakena nabu wenda udila. Yeye mumane kufika kudibu, kubambilaye ne: — Tuye kudi Ngedaliya.

⁷ Kadi bobu bamane kubuela mu tshimenga, ke Ishemayele ne bantu bende kubashipa, kuimansha bitalu biabu mu tshiina tshia mayi.

⁸ Kadi bantu bu dikumi kusengelela Ishemayele ne: — Kutushipi nansha, bualu tudi ne ntete ya kuenza bukula, tudi ne mafuta ne buitshi, bituvua basokoke mu tshisuku. Nanku, Ishemayele kavua mubashipe, muvuaye mushipe bana babu.

⁹ Tshiina tshia mayi tshivua Ishemayele muele bitalu bia bantu aba bavuaye mushipe, tshivua tshiina tshinene tshivua mukalenga Asa mutume diyi bua kumbula, pavuaye uluangana mvita ne Basha, mukalenga wa Izrayele. Ishemayele uvua mutshiuwuje ne bitalu.

¹⁰ Ishemayele kuela bantu bonsu bavua bashala mu Mispa, mu lukanu, kabidi ne bana ba bakaji ba mukalenga, ne bonsu ba-vua Nebuzaradane, mfumu wa bena mvita mupeshe Ngedaliya. Pashishe, Ishemayele kuya ne bena lukanu bonsu aba bua kusomba kudi bena Amone.

Badi bapatula bantu bavua Ishemayele muele mu lukanu

¹¹ Yowanane, muana wa Kareya, ne balombodi ba bena mvita bavua nende, kumvuabu bualu bubi buvua Ishemayele muenze.

¹² Kuyabu ne bantu babu bua kuluisha Ishemayele. Kumukuatabu ku dijiba dinene dia mu Ngibone.

¹³ Pavua bena lukanu bavua mu bianza bia Ishemayele bamone Yowanane ne balombodi ba bena mvita bende, kusankabu.

¹⁴ Nanku bantu bonsu bavua Ishemayele mukuate ku Mispa, kubengabu Ishemayele bua kulonda Yowanane.

¹⁵ Kadi Ishemayele kunyema ne bantu muanda mukulu, kuyaye kudi bena Amone.

¹⁶ Pashishe, Yowanane ne balombodi ba bena mvita bavuaye nabu, kuangatabu bantu bavua Ishemayele mukuate ku Mispa, yeye mumane kushipa Ngedaliya. Munkatshi muabu muvua balume bena mvita, bakaji, bana, ne bantu batungu. Mu tshikosu ke bantu bonsu bavuabu basangana mu Ngibone.

¹⁷ Kuyabu kuikisha ku tshilala benyi tshia ku Kimekame pabuipi ne Betleyeme. Bavua ne meji a kuya too ne ku Ejipitu.

¹⁸ Bualu bavua batshina bena Babilone, muvua Ishemayele mushipe Ngedaliya, muntu uvua mukalenga wa bena Babilone muteke bua kulombola ditunga.