Yirmeya 13 - MUKANDA WA MYIDI MUKULU

Yirmeya udi usuika mukaba wa ndanda

¹ Maweja-Nangila uvua mungele diyi ne: “Uye kusumba mukaba wa ndanda, uusuike mu tshimonu tshiebe. Kadi kuena mua kuusukula mu mayi to.”

² Meme kusumba mukaba uvua Maweja-Nangila mungambile. Meme kuusuika mu tshimonu.

³ Pashishe, Maweja-Nangila kungela diyi tshiakabidi ne:

⁴ “Angata mukaba uudi musumbe, uye nawu ku musulu wa muenji mukole wa Fara, uusokoke muaba awu mu mutanta wa lubuebue.”

⁵ Meme kuya ku musulu wa Fara bua kusokokamu mukaba, muvua Maweja-Nangila mungambile.

⁶ Matuku a bungi mamane kupita, Maweja-Nangila kungambila ne: “Pingana ku musulu wa Fara, upatule mukaba muaba uuvua muusokoke.”

⁷ Meme kumona ne: mukaba ukadi munyanguke, mubole, kabatshiyi mua kuvuala nawu bilamba.

⁸ Nanku, Maweja-Nangila kungambila ne:

⁹ “Meme Maweja-Nangila ndi ngamba ne: Ke mundi nnyanga lumu lua bena Yuda, ne lua bena Yerushalayime ludibu baditambisha nalu.

¹⁰ Bualu ntshisamba tshibi tshidi tshibenga kuteleja malu andi ngamba. Badi anu ne tshitunu, benza malu a bupote. Badi balamate mvidie mikuabu, bayitendelela, bayinyikila mitu panshi. Nanku bantu aba bikale bu mukaba ewu, udibu kabayi mua kukuata nawu kabidi mudimu!

¹¹ Mudi muntu usuika mukaba mu tshimonu tshiende, ke mumvua meme Maweja-Nangila mudisuike ku bukalenga bua Yuda ne bua bena Izrayele. Mvua muteke lumu luanyi mu bianza biabu, bua bikale bantu banyi, bua batumbishe dina dianyi, bampeteshe lumu, bua meme kuditemba nalu. Kadi kabavua banteleja to.”

Maluvu ne tshiji tshia Maweja-Nangila

¹² Maweja-Nangila Mvidi Mukulu wa Izrayele, udi wamba ne: Yirmeya uye kudi bena Izrayele, ubambile ne: “Badi bafumbe mulondu bua kuelamu maluvu.” Kadi pikalabu bandamuna ne: “Bulelela, tudi bamanye bimpe”,

¹³ ubambile ne: Maweja-Nangila udi wamba ne: “Bena ditunga edi bonsu, nansha bakalenga mene badi basombe mu nkuasa wa Davide, nansha batuangaji, bambi, ne bantu bakuabu ba mu Yerushalayime, nembanuishe maluvu bua bakuatshike kashidi.

¹⁴ Nembatutakaje mitu, baledi ne bana, bu mudibu batutakaja mulondu ne mukuabu. Tshiakufuila muntu nansha umue luse to. Nembabutule bonsu tshiyi nansha ne luse kashidi kanyi!”

Kadilu katshidi ku lubalabala wajima

¹⁵ Nuteleje, nuteleje ne ntema yonsu. Lekelayi kuditambisha. Udi uyukila nenu ke Maweja-Nangila!

¹⁶ Nemekayi Maweja-Nangila Mvidi Mukulu wenu. Tshianana nennutumine miidima, bua nuenu kutetuka pa mikuna, kuenda mu miidima inuvua kanuyi bindile, batekemena munya. Maweja-Nangila kuandamuna butuku, kunutumina miidima, bu mavuba a mvula wa tshipupu.

¹⁷ Panudi kanuyi nuteleja mubelu ewu, nendile muadi nkayanyi ku mpenga bua ditambisha dienu dinene. Nempuekeshe binsonji bua tshisumbu tshia mikoku ya Maweja-Nangila, tshidi tshiya mu bupika.

Badi bamanyisha bena diku dia bukalenga malu a kudi Mvidi Mukulu

¹⁸ Yirmeya, ambila mukalenga ne mamuende ne: “Tulukayi mu nkuasa wenu wa lumu, sombayi panshi, bualu tshifulu tshienu tshia bumfumu ntshimane kupona panshi.

¹⁹ Biibi bia bimenga bia kuinshi mu ditunga, bidi binjila. Kakuena muntu udi ubikangula kabidi. Bualu bena Yuda bonsu mbamane kuya nabu mu bupika. Muntu nansha umue ki mmushale!”

Mbafuishe Yerushalayime bundu

²⁰ Yerushalayime, tangila malu adi enzeka: Baluishi bebe badi bafuma ku mutu kua ditunga. Bantu bandi mukupeshe badi penyi? Meme kubateka mu bianza biebe bua wewe kubalama, bu mudi mulami ulama mikoku yende. Wewe kuditemba bua mikoku ayi. Kadi ikadi penyi?

²¹ Pawamona balunda bebe bakuvuila bua kudia bumfumu mu ditunga ne bua kukukengesha, newambe tshinyi? Newikale ne dikenga bu dia mukaji pa lulelu.

²² Nanku neukonke ne: “Makenga onsu aa adi ankuata bua tshinyi?” Bu muudi wenza tshilema tshinene, nebakuvule bilamba, babibandishe too ne ku mutu, nebakuenzeje malu ku bukole.

²³ Mubidi wa muena Kushe udi mua kukudimuka anyi? Nansha matoba a tshisumpa ntambue adi mua kukudimuka anyi? To! Nanku nuenu bonsu, nudi bibidile kuenza malu mabi. Ke munudi kanuyi mua kuenza malu mimpe to.

²⁴ Ndi nnutangalaja mudi lupepele lutangalaja bisosa mu tshipela,

²⁵ Maweja-Nangila udi wamba ne: Yerushalayime, ke mudibu ne bua kukuenzela wewe kabidi. Bualu udi mundekele, mudifile kudi mvidie ya patupu. Teleja mundi musue kukunyoka.

²⁶ Meme nenkuvule bilamba, nembibandishe too ne ku mutu webe, bua bakumone butaka.

²⁷ Ndi mbenga malu ebe a bundu, ne tuseku tuebe tuakulobesha natu bantu, tshiendenda tshiebe tshia bundu. Mvua mumone pa mikuna ya mu ditunga mvidie yebe idi kufuisha bundu! Yerushalayime, udi muena diakabi! Neudilengeje diba kaayi?