Yezekiyele 5 - MUKANDA WA MYIDI MUKULU

Mvidi Mukulu neanyoke bena Izrayele

¹ Mvidi Mukulu kungambila ne: — Muntu, angata muele mutue, udibeye nawu nsuki ne miedi. Pashishe upime bujitu bua biwikala mudibeye abi. Ubitapulule mu bisumbu bisatu.

² Padi matuku a kuluisha tshimenga ajika, oshile nsuki ya mu tshisumbu tshimue mu kapia, munkatshi mua tshimenga. Wangate ya mu tshisumbu tshibidi, uyikose ne muele webe awu, uyimiamine miaba yonsu ku mpenga kua tshimenga. Tshisumbu tshia ndekelu, umuangalaje nsuki yatshi mulu mu lupepele. Meme Maweja-Nangila nenyipate ne muele wanyi.

³ Pashishe wangata nsuki mikese, uyiteke mu tshibombi tshia bilamba biebe.

⁴ Ku nsuki ayi kabidi, wangate nsuki mikese uyele mu kapia, uyoshe. Neyilunduke kapia kakole; nekatampakene bena Izrayele bonsu.

⁵ Meme Maweja-Nangila Mvidi Mukulu ndi ngamba ne: “Ke muenzelabu Yerushalayime, tshimenga tshindi muteke munkatshi mua bisamba, tshinyungulula kudi matunga a bantu benyi.

⁶ Bena tshimenga etshi mbabenge meyi ne mikandu bimvua mubambile. Bavua benza kabidi bibi bivua bena mutumba nabu kabayi mua kuenza. Badi bantu ba muoyi mubi, bapite matunga avua mabanyungulukile ku bubi. Bualu kabena bitabe ku mikenji yanyi, mbabenge kulonda meyi anyi.

⁷ Nanku, meme Maweja-Nangila Mvidi Mukulu, ndi mbambila ne: nudi benze bibi bipite bidi bantu badi banunyungulukile kabayi benza. Kanuena balonde mikenji yanyi, kanuena bakumbaje meyi anyi. Kadi nudi balonde amu meyi a bisamba bidi nenu mutumba.

⁸ Nanku, ndi nnujadikila ne: nuenu bena Yerushalayime, nennuluishe panyi; nennunyoke munkatshi mua tshimenga, bantu ba bisamba bikuabu batangile.

⁹ Nennunyoke mushindu undi tshiyi muanji kunyoka bantu, tshiyi mua kubanyoka kabidi musangu mukuabu. Bualu binuvua benze bivua bibi bipite.

¹⁰ Mu tshimenga, baledi nebadie bana babu, bana nebadie baledi babu. Nennunyoke. Badi bashale ne muoyi nembatangalaje bonsu ku nseke yonsu inayi.

¹¹ “Meme Maweja-Nangila Mvidi Mukulu udi ne muoyi, ndi nnumanyisha ne: nudi banyange nzubu wanyi ne ditendelela dienu dibi, kabidi ne mpingu yenu indi mubenge. Nanku meme nennubutule, tshiyi nnufuila luse. Tshiena mua kunushiya ne muoyi to.

¹² Tshia bisatu tshia bantu ba kunudi netshifue ku disama dia tshiambu, nansha ku tshiyole tshia nzala, munda mua tshimenga. Tshia bisatu tshikuabu netshifue ku muele wa mvita, ku mpenga kua tshimenga. Tshia bisatu tshia ndekelu nentshitangalaje ku nseke inayi ya buloba, ntshilondakaja ne muele wa mvita.

¹³ Nennuenzele mudi tshiji tshianyi tshingambila. Nennusombuele too ne pajika tshiji tshianyi tshionsu. Nanku nenujadike ne: Meme Maweja-Nangila mvua munuambile malu, bualu butomboji buenu kabuena bundengelela to.

¹⁴ Bantu ba matunga adi manunyungulule, ne bonsu badi bapitshila muaba awu, nebamone mundi munyange tshimenga tshia Yerushalayime tshishale tshintu tshianana.

¹⁵ Nennyoke tshimenga tshia Yerushalayime ne tshiji tshikole. Nentshikengeshe, ntshitandishe bikole! Nanku bantu badi ku nseke, nebaseke tshimenga etshi, batshipenda. Padibu batshivuluka, nebakuatshike bowa. Nenuikale tshilejilu tshia kubabela natshi. Meme Maweja-Nangila, ndi nnujadikila bualu ebu.

¹⁶ “Nennutumine tshiyole tshia nzala bua kunubutula. Nzala yenu neyinukengeshe, bu mudi mikete mitue ikengesha bantu, ibashipa. Nennyange mampa anudi balame, bua nufile ne nzala.

¹⁷ Nennutumine tshiyole tshia nzala ne nyama ya lonji, bua bibutule bana benu. Disama dia tshiambu, tshinyangu, ne mvita, neanubutule. Meme Maweja-Nangila ndi nnujadikila bualu ebu.”