Yezekiyele 44 - MUKANDA WA MYIDI MUKULU

Tshiibi tshia luseke ludi diba dipatukila lua nzubu wa Mvidi Mukulu

¹ Muntu kumfikisha ku tshiibi tshia pa mbelu tshivua luseke luvua diba dipatukila lua muaba wa tshijila.

² Maweja-Nangila kungambila ne: — Tshiibi etshi ne tshikale tshinjila kashidi, kabena ne bua kutshiunzulula to. Muntu kena mua kupitshilaku to, bualu meme Maweja-Nangila, Mvidi Mukulu wa Izrayele, ndi mubuelele ku mushiku awu. Tshiibi etshi tshishale anu tshinjila.

³ Nanku anu mukalenga udi mu nkuasa wa bumfumu, ke udi mua kudilamu biakudia bia tshijila muaba undi. Neabuele, upatuka pa kupitshila mu tshibambalu tshinene tshidi ku ndekelu kua tshibuelelu.

Bantu benyi kabena mua kubuela mu nzubu wa Mvidi Mukulu to

⁴ Pashishe muntu kupitshila nanyi ku tshiibi tshia ku mutu wa nzubu, bua kufika kumpala kua nzubu wa Mvidi Mukulu. Meme kumona mutata butumbi bua Maweja-Nangila buwule nzubu wende tente. Meme kutua mpala panshi.

⁵ Maweja-Nangila kungambila ne: — Yezekiyele, tabuluka, tangila bimpe biudi umona. Teleja ne ntema biudi umvua. Teleja meyi ne mikenji bindi ngela, bua malu adi atangila nzubu wanyi. Uteleje nangananga mikenji idi ilongesha mudibu mua kubuela muaba wanyi wa tshijila, nansha kupatukamu.

⁶ Umanyishe bena Izrayele, bantomboji aba, bena buenzavi, bindi meme Maweja-Nangila Mvidi Mukulu ngamba ne: “Malu mabi anuvua nuenu bena Izrayele benze mmantonde.

⁷ Panudi nundambula bia pa madimi, mafuta ne mashi a nyama, nudi nubueja mu nzubu wanyi bantu benyi, batuabu kabayi bateka panshi, badi kabayi bangitaba to. Ke munudi nupisha nzubu wanyi mikiya. Ke munudi banyanga ndondu udi mututuangaje nenu, ne malu enu mabi onsu andi mbenga.

⁸ Nuenu kanuena nungenzela nansha mudimu muaba wanyi wa tshijila to. Kadi nudi batume bantu benyi bua kuenzabu mudimu awu pa muaba wenu.

⁹ Meme Maweja-Nangila Mvidi Mukulu ndi ngamba ne: Muntu muenyi nansha umue, udibu kabayi bateka panshi, kabidi udi kayi ungitaba, nansha yeye musombe munkatshi mua bena Izrayele, kena mua kubuela muaba wanyi wa tshijila to.”

Mikenji ya bena Levi

¹⁰ “Bua bena Levi batua bumuka kundi, bambenga, diba ditua bena Izrayele bakuabu bambenge, bua kuya kukukuila mvidie mikuabu, nembanyoke bua bubi buabu.

¹¹ Badi mua kungenzela mudimu amu wa kulama biibi bia muaba wa tshijila, ne midimu mikuabu mishilangane ya mu nzubu wanyi. Badi mua kukosa mitu ya nyama ya milambu ya kuosha, ne ya nyama ya milambu mikuabu. Nebambuluishe bantu.

¹² Kadi bu mutotabu bambuluishe bantu bua kutendelela mvidie mikuabu, bafikishe bena Izrayele ku bue-nzavi, meme Maweja-Nangila Mvidi Mukulu ndi ngamba ne: nembanyoke. Nebadiambuile bujitu bua bubi buabu.

¹³ Kabena mua kufika kundi bua kungenzela mudimu wa butuangaji nansha. Kabena mua kusemena pabuipi ne bintu tatuabu banjidila, nansha kufika muaba wa tshijila menemene to. Nebadiambuile nanku bujitu bua malu a bundu, ne bua malu mabi makuabu avuabu benze.

¹⁴ Nanku nembapeshe anu midimu mikese mikuabu, idi itangila bulongolodi bua mu nzubu wanyi.”

Mikenji bua batuangaji

¹⁵ “Batuangaji ba bena Levi ba ku ndelanganyi ya Sadoke, batua balame bimpe mikenji ya muaba wanyi wa tshijila, diba mene ditua bena Izrayele bakuabu bambenge meme Maweja-Nangila. Nanku amu bobu badi mua kungenzela mudimu, kundambula mafuta ne mashi a nyama ya milambu. Meme Maweja-Nangila Mvidi Mukulu ndi ngamba nanku.

¹⁶ Bobu nkayabu nebabuele muaba wanyi wa tshijila, basemena ku tshilambuilu, ne ku mesa a tshijila. Nebalame bimpe mikenji indi mufile bua midimu ya mu nzubu wanyi.

¹⁷ Padibu bapitshila ku biibi bia lubanza lua munda mua nzubu, badi ne bua kuvuala bilamba bienza ne ndanda. Kabena ne bua kuvuala bilamba bienza ne miosa ya nyama, padibu benza mudimu wabu mu lubanza, nansha munda mua nzubu wa Mvidi Mukulu.

¹⁸ Nebavuale bifulu ne mikaba ya mu tshimonu, bienza amu ne ndanda. Kabena ne bua kuvuala bilamba bidi bibakopakaja.

¹⁹ Padibu basue kupingana mu lubanza lua pa mbelu, muaba udi bantu bakuabu, badi ne bua kuvula bilamba bivuabu nabi, pavuabu benza midimu yabu, kubiteka mu bibambalu bia tshijila. Nanku nebavuale bikuabu bilamba bia patupu. Nanku padibu bavula bilamba abi, bantu bakuabu kabena ne mushindu wa kulenga bilamba bia batuangaji bia tshijila to.

²⁰ “Batuangaji kabena mua kukungula mu mutu mujima to, kadi badi mua kukosa nsuki bua kayipitshi kulepa.

²¹ Muntu wa kudibu nansha umue kena mua kunua maluvu a mvinyo, bangabanga ne kubuela mu lubanza lua munda mua nzubu.

²² Mutuangaji kena mua kusela mukaji mukamba, nansha uvua ku dibaka dikuabu. Udi mua kusela anu nsongakaji muena Izrayele, nansha kupiana mukaji mukamba uvua wa mutuangaji mukuabu.

²³ “Batuangaji nebalongeshe bantu banyi mudibu mua kusunguluja tshintu tshia tshijila, ne tshintu tshia patupu, tshintu tshidi ne mikiya ne tshidi katshiyi ne mikiya.

²⁴ Mu bilumbu nebakose nsambu amu pa yoyi, bilondeshile mikenji yanyi. Nebenzeje bibilu amu bilondeshile meyi ne mikenji bimvua mufile. Nebambuluishe bantu bua banemeke bimpe dituku dia Dikisha, dikale dia tshijila.

²⁵ “Mutuangaji udi upia mikiya, padiye usemena pabuipi ne tshitalu, pa kumusha tshitalu tshia tatuende, tshia mamuende, tshia umue wa ku bana bende, tshia muanabu wa balume, nansha tshia muanabu wa bakaji udi kayi muanji kuya ku dibaka.

²⁶ Padibu bamane kumusha mikiya pambidi pa mutuangaji awu, udi ne bua kuindila kabidi matuku muanda mutekete, bangabanga ne kutuadija mudimu wende.

²⁷ Dituku didiye upingana mu lubanza lua munda mu nzubu wanyi, udi ulambula mulambu wa kudikobolola nawu. Ke meme Maweja-Nangila Mvidi Mukulu udi utuma diyi edi.

²⁸ Disanka dia batuangaji dikale anu dia kungenzela mudimu. Kabena mua kubapesha tshitupa tshia buloba bua Izrayele. Bualu meme nkayanyi ke udibu nende dikenga.

²⁹ Nebadie milambu ne minyinyi ya nyama idibu bafila bua milambu ya kudikobolola. Bintu bionsu bidi bena Izrayele bantekela, mbia batuangaji.

³⁰ Batuangaji nebapete biakudia bia tshianyi bia mu madimi, ne bintu bionsu bidi bena Izrayele bantuadila mu nzubu wanyi. Bantu nebapeshe batuangaji bukula buimpe budibu nabu. Nanku, nembele lupemba.

³¹ Kadi, batuangaji kabena mua kudia munyinyi wa nyunyi nansha wa nyama bidifuile, nansha ivuabu bashipa kudi nyama wa muitu.”