Yezekiyele 4 - MUKANDA WA MYIDI MUKULU

Yezekiyele udi uleja mudibu ne bua kuluisha Yerushalayime

¹ Maweja-Nangila kuamba kabidi ne: — Muntu, ambula didiotu dia buloba, uditeke kumpala kuebe. Uzole pa didiotu apu tshimenga bu tshia Yerushalayime.

² Pashishe, uleje mudibu batshiluisha. Wimbe mukidi, wele mushiki wa buloba, wele mualu wa mvita, unyungulule tshimenga ne matempu a mvita.

³ Pashishe wangate tshitata tshia tshiamu, utshiteke bu tshimana pankatshi pebe ne pa tshimenga. Utangile tshimenga: utshiluishe wewe mene. Ke muudi mua kuleja bena Izrayele malu bua kubadimuja.

⁴ Diba adi, uladile ku lubadi lua dia bakaji. Paudi ulala nanku, neutuale bubi buonsu bua bena mu bukalenga bua Izrayele. Newambule bujitu ebu pambidi pebe.

⁵ Ndi nteka bujitu ebu pambidi pebe matuku bungi bumue ne bidimu bivua bena Izrayele benza bibi. Nanku neushale mu dikenga matuku 390.

⁶ Ku ndekelu kua tshikondu atshi, ukudimuke ku lubadi lua dia balume. Bubi buonsu bua bukalenga bua bena Yuda, ubutuale pambidi pebe matuku makumi anayi. Ndi nteka bujitu ebu pambidi pebe, matuku bungi bumue ne bidimu bivua bena mu bukalenga bua Yuda benze bibi.

⁷ Pashishe, utangile ku Yerushalayime udibu baluisha. Ukanyine tshimenga atshi, utshimanyishe mundi ne bua kutshibutula.

⁸ Meme nenkusuike ne mionji, kuyi mua kukudimuka ku lubadi lukuabu, too ne ku diba diudi ukumbaja matuku a kuluisha tshimenga.

⁹ Wangate ntete ya kuenza bukula ya mishindu mishilangane, nkunda, ne mponda. Ubondakaje bionsu abi mu luesu, wenza diampa. Diampa adi nedikale tshiakudia tshiebe mu matuku 390 audi muladile ku lubadi lumue.

¹⁰ Neudie ku dituku ku dituku biakudia bia grame 250, kuyi upeta tshintu tshikuabu dituku adi.

¹¹ Neunue ku dituku anu litre umue wa mayi. (Biakudia biebe nebikale bungi bua momumue dituku dionsu.)

¹² Biakudia abi nebikale mushindu wa tukata tua bukula bua orje. Utemeshe kapia ne bunyawu bua muntu. Ulambe biakudia abi bantu batangile.

¹³ Maweja-Nangila kuamba kabidi ne: — Ke muikale bena Izrayele badia biakudia bidi bipie mikiya mu matunga andi mbipata.

¹⁴ Meme kuela diyi ne: — Eyi! Maweja-Nangila Mvidi Mukulu, meme katshia tshiena muanji kupia mikiya musangu nansha umue to. Bituadije ku buana buanyi, tshiena muanji kudia munyinyi wa nyama mudifuile, nansha mushipa kudi nyama mukuabu wa tshisuku to. Munyinyi udi mupie mikiya ki mmuanji kubuela mukana muanyi to.

¹⁵ Maweja-Nangila kungandamuna ne: — Nanku ndi nkuambila ne: kuangatshi kabidi bunyawu bua muntu to. Wangate bunyawu bua nyama wa ngombe, ulambilepu biakudia biebe.

¹⁶ Kuambaye kabidi ne: — Yezekiyele, udi mumone ne: ndi musue kunyanga mampa onsu adi bena Yerushalayime balame. Bantu nebapime biakudia biabu, nebapime ne mayi a kunua. Nebazakale, bualu nebikale ne lutatu lukole bua kupeta biakudia.

¹⁷ Kabakuikala ne mampa ne mayi a kunua bikumbane to. Muntu yonsu neunwue amu dikenga. Bantu nebabutuke bua bubi buabu.