Yezekiyele 34 - MUKANDA WA MYIDI MUKULU

Mvidi Mukulu udi ukanyina bamfumu ba bena Izrayele

¹ Maweja-Nangila kungambila ne:

² — Muntu, kanyina bamfumu ba bena Izrayele, ubamanyishe mikanu indi mbakanyina nayi meme Maweja-Nangila. Ndi mbambila ne: “Nuenu balami ba mikoku ba bena Izrayele, nudi bena diakabi. Nudi badivuluke amu nuenu nkayenu! Balami kabena ne bua kudisha mikoku anyi?

³ Kadi nuenu nudi nulengulula mikoku. Nudi nunua mabele ayi, nuvuala bilamba bienza ne miosa yayi, nushipa mikoku ya manyi.

⁴ Kadi kanuena bakankamike mikoku idi kayiyi ne bukole, kanuena bondape idi isama, kanuena bele buanga pa mputa ya mikoku idi mitapike. Kanuena bapingaje idi mipambuke munkatshi mua mikuabu, kanuena bakebe idi mijimine, kadi nudi bayikengeshe bikole ne tshikisu.

⁵ Nanku mikoku kupanga mulami, kutangalaka. Kuyikuatabu, kuyidiabu kudi nyama ya muitu.

⁶ Eyowa, mikoku yanyi mmilalakane mu mikuna minene ne mikese, pashishe mmitangalake miaba yonsu pa buloba bujima, kakuyi muntu udi nayi bualu, uya kuyikeba.

⁷ Nuenu balami ba mikoku ya bena Izrayele, telejayi:

⁸ meme Maweja-Nangila udi ne muoyi ndi nnuambila ne: bidi bintonda pandi mmona mikoku yanyi mu bianza bia bivi. Bu mudiyi kayiyi ne bayilami, ikadi tshiakudia tshia nyama ya ditu. Bualu balami kabena baditatshisha bua mikoku yanyi to. Pa mutu pa kuyikeba bimpe, badi badivuluka amu bobu nkayabu.

⁹ Nanku telejayi nuenu balami ba mikoku ya bena Izrayele.

¹⁰ Meme Maweja-Nangila ndi nnukanyina ne: nennuluishe, nnunyenga bulami bua mikoku yanyi. Kanuakuyikuba kabidi to. Kanuakupetaku tshintu to. Nennunyenge mikoku yanyi mukana muenu. Kayakuikala kabidi tshiakudia tshienu.

¹¹ “Meme Maweja-Nangila ndi ngamba ne: biangatshile mpindiewu, meme nkayanyi nendiangatshile bulami bua mikoku yanyi.

¹² Nenyisangishe muaba umue amu bu mudi mulami wenza padi mikoku yende mitangalake. Nennye kukeba mikoku yanyi miaba yonsu ivuayi numuangalake dituku dia tshipepele tshikole.

¹³ Ndi nya kuyikeba mu matunga a bantu benyi mudiyi misombe. Nenyisangishe, nyipingaje mu ditunga diayi. Nennye nayi pa mikuna ya mu Izrayele, mu bibandabanda, miaba yonsu ya mu ditunga idi bantu basombe.

¹⁴ Nennyifikishe mu mpata mimpe. Neyikale ne biakudia biayi bivule pa mikuna ya mu ditunga dia Izrayele. Eyowa, neyikale ne biakudia bimpe, kabidi miaba idiyi mua kuikishila mu mpata minene idi ne bisosa bitekete.

¹⁵ Nengikale mulami wa mikoku yanyi, nenyipeshe muaba wa dikisha. Meme Maweja-Nangila Mvidi Mukulu ndi njadika nanku.

¹⁶ Nenkebe mukoku uvua mujimine, nempingaje mu tshikumbi uvua mupambuke, nensuike buanga pa mputa wa uvua mutapike, nemfululule uvua usama. Kadi nembambishe udi ne mafuta mapite bungi, nansha udi ne bukole bua bungi, bua kauyi kutatshisha mikoku mikuabu. Nendame mikoku yanyi anu bimpe.”

Mvidi Mukulu udi wambuluisha bantu bende

¹⁷ “Nuenu mikoku yanyi, meme Maweja-Nangila ndi nnuambila ne: ndi ndumbuluisha mikoku yanyi, bimpanga ne mbuji ya mpumbu.

¹⁸ Bavule ba kunudi badi badia bimpe mu mpata milenga. Kadi badi badiata bisosa bidi bishale bua tshinyi? Nudi nupeta mayi mimpe a kunua. Kadi mayi anudi nunua, nudi nuavuandulula ne makasa enu bua tshinyi?

¹⁹ Mikoku yanyi idi mishale idi ne bua kudia bisosa binuvua badiate, idi ne bua kunua mayi anuvua bavuandulule.

²⁰ Ke pandi meme Maweja-Nangila nnuambila ne: ndi ndumbuluisha mikoku yanyi, nkosa tshilumbu tshia idi minyane ne idi ne manyi.

²¹ Mikoku idi kayiyi ne bukole, nudi nuyisakila ne dikaya nansha ne tshikundukundu. Nudi nuyituta ku nsengu, nuyitangalaja, nuyipata mu tshisumbu.

²² Ndi musue kuambuluisha mikoku yanyi ayi bua kabayikengeshi kabidi to. Ndi ndumbuluisha mikoku, nteleja idi mitekete ne idi ne bukole.

²³ Nenteke muntu anu umue bua kuikalaye mulami wa mikoku yanyi. Yeye neayilame bimpe bu muvua Davide wanyi wenza.

²⁴ Meme Maweja-Nangila nengikale Mvidi Mukulu wayi. Muntu wanyi neikale mulami wa bushuwa bu muvua Davide. Meme Maweja-Nangila ndi njadika nanku.

²⁵ “Nemfile bupole munkatshi mua mikoku yanyi. Nengipate nyama yonsu ya lonji idi mu ditunga. Nanku mikoku yanyi neyisombe talala mu mpata, ilala nansha muitu.

²⁶ Nenganyishe bua mikoku isombe pabuipi ne mukuna wanyi wa tshijila. Nendokeshe mvula mukumbane pa tshikondu tshiende.

²⁷ Mitshi neyikuame bimuma. Buloba nebumeneshe biakudia. Muntu yonsu neasombe talala mu ditunga. Nensulule nkanu idibu basuika bantu banyi. Nembapikule kudi bavua babakuate ku bupika. Nanku nebajadike ne: meme ndi Maweja-Nangila.

²⁸ Bivi ba mu matunga makuabu kabakubakuata kabidi to. Nyama ya tshisuku kayakubadia nansha. Nebasombe talala. Muntu nansha umue kakubakuatshisha kabidi bowa to.

²⁹ Nembapeshe madimi adi ne bufuke bua bungi. Kabakuikala kabidi ne nzala mu ditunga diabu to. Bantu ba bisamba bikuabu kabakubapepeja kabidi to.

³⁰ Bantu bonsu nebamanye ne: meme Maweja-Nangila Mvidi Mukulu wabu, ndi mubalame bimpe. Bena Izrayele mbantu banyi menemene. Meme Maweja-Nangila ndi njadika nanku.

³¹ “Eyowa, nuenu bantu ba mu tshisamba tshianyi, ndi munulame, bualu ndi Mvidi Mukulu wenu. Meme Maweja-Nangila Mvidi Mukulu ndi njadika nanku.”