Yezekiyele 10 - MUKANDA WA MYIDI MUKULU

Mvidi Mukulu udi udimanyisha tshiakabidi kudi Yezekiyele

¹ Diba adi, mvua mumone tshisasa tshivua pa mitu ya bakerubine. Tshivua ne tshintu tshifuanangane ne nkuasa wa bukalenga, muenza ne dibue dia mushinga mukole dia Safire.

² Mvidi Mukulu kuambila muntu uvua muvuale bilamba bia buanda bua ndanda ne: — Upitshile pankatshi pa nkata idi muinshi mua bakerubine. Ambula mu bianza makala a kapia adi pankatshi pa bakerubine, uye kuatangalaja mu tshimenga. Meme kumona muntu uya kuambula makala.

³ Diba divuaye uya, bakerubine bavua ku luseke lua balume lua lupangu luvua lunyungulula nzubu wa Mvidi Mukulu. Kabidi divuba dia muinshi divua diuwula mu lupangu lua mu nzubu wa Mvidi Mukulu tente.

⁴ Butumbi bua Maweja-Nangila kumuka pa bakerubine, kubuka, kuya kuikila ku tshibuelelu tshia nzubu wa Mvidi Mukulu. Divuba kuwula mu nzubu wa Mvidi Mukulu tente. Butumbi bua Mvidi Mukulu buvua bumueneka mu lupangu lua nzubu wa Mvidi Mukulu, bukenka bikole.

⁵ Mutoyi wa mapuapua a bakerubine uvua umvuika too ne mu lupangu lua pambelu pa nzubu wa Mvidi Mukulu. Mutoyi uvua mukole mufuanangane ne diyi dia Mvidi Mukulu wa bukole buonsu, padiye wakula.

⁶ Muntu uvua muvuale bilamba bia buanda bua ndanda uvua muimane pabuipi ne nkata. Uvua muye kuimana muaba awu diba divua Mvidi Mukulu mumutume bua kuangata kapia pankatshi pa nkata, munkatshi mua bakerubine.

⁷ Umue wa ku bakerubine kuolola tshianza ku kapia kavua pabuipi nende. Kuangataye makala a kapia, kuapesha muntu mu bianza bua aye nawu.

⁸ Bintu bu bianza bia bantu bivua bimueneka muinshi mua mapuapua a bakerubine.

⁹ Meme kumona kabidi nkata inayi. Ku luseke lua kerubine onsu, kuvua nkata umue. Nkata ayi ivua ikenka bu mabue a mushinga mukole.

¹⁰ Nkata yonsu ayi ivua mushindu umue mifuanangane; ivua imueneka mitshiamakane.

¹¹ Nkata ivua mua kuya nseke inayi kayiyi ibenda. Ivua iya ku luseke kuvua mitu ya bakerubine nutangile, yenda isemena kayiyi ibenda.

¹² Mubidi, nyima, bianza ne mapuapua bia bakerubine bivua biuwule ne mesu engelela, nansha nkata inayi mene ivua nawu.

¹³ Meme kumvua binyika nkata ayi ne: “tshimvundu.”

¹⁴ Kerubine yonsu uvua ne mpala inayi: mpala wa kumpala uvua bu wa kerubine, mpala muibidi uvua bu wa muntu, mpala muisatu uvua bu wa nyama wa ntambue, mpala muinayi uvua bu wa nyunyi wa tshiminyi.

¹⁵ Bakerubine kubuka mulu. Bavua amu bamvua mumone ku muelelu wa musulu wa Kebare.

¹⁶ Pasuabu batungunuka, nkata ivua yenda nabu. Pavuabu banyungisha mapuapua bua kubuka pa buloba, nkata ivua anu mibalamate.

¹⁷ Pavuabu bikila, nkata ivua imana. Pavuabu baya mu tshibuashibuashi, nkata ivua ibuka kabidi. Bualu bakerubine bavua badiludika nkata muvuabu basue.

Butumbi bua Maweja-Nangila budi bumuka

¹⁸ Butumbi bua Maweja-Nangila kumuka mu tshibuelelu tshia nzubu wa Mvidi Mukulu, kubuka, kuya kuikila pa bakerubine.

¹⁹ Bakerubine kunyungisha mapuapua abu bua kubuka mulu. Meme kumona bakerubine babuka pa buloba ne nkata musangu umue pamue nabu. Kuyabu kuimana ku tshiibi tshia luseke ludi diba dipatukila lua nzubu wa Mvidi Mukulu. Butumbi bua Mvidi Mukulu buvua bukenka pa mutu pabu.

²⁰ Ku muelelu wa musulu wa Kebare, nkavua mumone nyama minene ayi muinshi mua Mvidi Mukulu wa Izrayele. Nanku meme kujingulula ne: mbakerubine.

²¹ Nyama yonsu uvua ne mpala inayi, mapuapua anayi, ne bintu bu bianza bia bantu muinshi mua mapuapua.

²² Mpala yabu ivua anu bu ya nyama imvua mumone ku muelelu wa musulu wa Kebare. Bakerubine bonsu bavua baye anu kumpala buludi.