Yeshaya 6 - MUKANDA WA MYIDI MUKULU

Yeshaya udi wanyisha bua kuenzela Maweja-Nangila mudimu

¹ Mu tshidimu tshia lufu lua mukalenga Uziya, meme kumona Maweja-Nangila musombe mu nkuasa wa bukalenga mutumbuke. Nzemba ya tshinkutu tshiende miuwule nzubu wa Mvidi Mukulu tente.

² Baserafine bavua bimane ku mutu kuende. Serafine yonsu uvua ne mapuapua asambombu: abidi mabuikile mpala wende, abidi mabuikile mubidi wende, ne makuabu abidi a kubuka nawu.

³ Batata belangana mbila ne: “Wa tshijila, wa tshijila, wa tshijila, Maweja-Nangila muena bukole buonsu udi wa tshijila! Butumbi buende budi pa buloba buonsu.”

⁴ Meyi abu avua azakaja biibi bia nzubu wa Mvidi Mukulu. Kabidi muinshi uvua muwule mu nzubu wa Mvidi Mukulu tente.

⁵ Ke meme kuamba ne: “Eyi! Ndi mubutuke, bualu mishiku yanyi nya muena buakulavi. Tshiena mua kutumbisha Maweja-Nangila. Bena mu tshisamba tshietu kabidi badi ne mishiku ya bena buakulavi. Kadi ndi mudimuene nkayanyi mukalenga, Maweja-Nangila muena bukole buonsu!”

⁶ Kadi umue wa ku baserafine kubuka mutangile kundi. Uvua muambule ne nkala dikala dia kapia divuaye mukuate pa tshilambuilu.

⁷ Kudintuaye ku mishiku, wamba ne: “Tshibawu tshiebe tshiakujika, bubi buebe buakujimina, bualu kapia kakulenga ku mishiku yebe.”

⁸ Meme kumvua Maweja-Nangila unkonka ne: — Undi mua kutuma nnganyi? Waya kutuambidila mukenji wetu nnganyi? Meme kuandamuna ne: — Ke meme ewu, untume meme.

⁹ Maweja-Nangila kuamba kabidi ne: — Uye kuambila bantu aba ne: “Nenuteleje, kadi kanuakumvua to. Nenutangile, kadi kanuakumona to.”

¹⁰ Upapishe muoyi wa bantu aba, upatshishe matshi abu, ufofamije mesu abu bua mesu abu kaamonyi, bua matshi abu kaumvu, kabeedi meji a kupingana kundi, tshimonyi mua kubasungidila.

¹¹ Ke meme kukonka ne: — Maweja-Nangila, nebikale nanku too ne ku diba kaayi? Yeye kungandamuna ne: — Nebikale nanku too ne ku diba didibu banyangakaja bimenga bionsu, batangalaja bantu, nzubu yonsu ishala munda mutupu, ditunga dijima dishala tshipela.

¹² Eyowa, Maweja-Nangila neipate bantu mu ditunga diabu. Madimi abu neashale amu mbuba nkayayi.

¹³ Ku bantu dikumi, anu umue neapanduke ku tshinyangu. Yeye awu neabutuke kabidi. Neikale bu lutonga ludi lutoloka ku tshikuku tshia lusanga, nansha tshia mutshi wa terebinte. Nebaludie kudi nyama. Kadi tshikuku tshidi tshishala, netshisangule bantu badi banemeka Maweja-Nangila.