Yeshaya 56 - MUKANDA WA MYIDI MUKULU

TSHITUPA TSHISATU Maweja-Nangila kena ubenga muntu

¹ Maweja-Nangila uvua muambe ne: “Nulonde buakane. Nuenze malu mempe. Bualu lupandu lundi mufike nalu ludi pabuipi, lukadi pa kufika. Bonsu nebamone mundi nkumbaja malaya anyi.

² Muntu udi wenza bindi ngamba, udi ulama bimpe mikenji yanyi, unemeka bimpe dituku dia Dikisha, kayi wenza bualu bubi nansha bumue, ngwa diakalenga!”

³ Muena tshisamba tshikuabu, udi mulamate Maweja-Nangila, kena mua kuela meji a ne: “Maweja-Nangila mmunteke ku luseke. Mmungumushe munkatshi mua bantu bende.” Muntu mutungula kambi ne: “Ndi amu bu lukunyi luume.”

⁴ Bualu Maweja-Nangila udi wamba ne: “Padi muntu mutungula unemeka matuku anyi a Dikisha, padiye usungula bua kuenza bidi bindengelela, padiye ulama ndondu itudi batue ne tshisamba tshianyi,

⁵ nebafunde dina diende ku bimana bia nzubu wanyi. Muaba awu nebamuvuluke, mudi bana ba balume ne bakaji kabayi mua kuvuluka baledi babu. Nemvuluke dina diende kashidi. Kabakudikupula kudi muntu to!”

⁶ Maweja-Nangila udi wamba ne: “Bantu benyi badi bandamate, bantumbisha, bannanga, basue kuikala bena mudimu banyi, badi banemeka bimpe dituku dia Dikisha, balama ndondu ituvua batue ne tshisamba tshianyi,

⁷ nembabikidishe bua babande pa mukuna wanyi wa tshijila. Nembasankishe ne disanka dinene, mu nzubu wanyi wa kutendelela. Nenganyishe ne muoyi muimpe milambu mishilangane ikalabu bandambula pa tshilambuilu. Bualu nzubu wanyi, nebamuinyike ne: Muaba udi bantu ba mu matunga onsu batendelela.”

⁸ Maweja-Nangila uvua mupingaje bena Izrayele bavuaye mumuangalaje kuabu, udi wamba kabidi ne: “Nkadi mumane kusangisha bantu, kadi ntshidi nsangisha ne bakuabu bua nuenze nabu tshintu tshimue.”

Balombodi babi

⁹ Nuenu bantu banyi, nuenu nyama ya mu mpata, ne nuenu nyama ya muitu, luayi bonsu mu didia dia disanka!

¹⁰ Balombodi ba bantu banyi bena Izrayele, badi bampofu bonsu. Kabena bamanye kalu. Bonsu buabu badi bu mbua idi kayiyi yenza mutoyi, kayiyi ibuluka. Badi balotakana, badiolola panshi, basue kulala amu tulu.

¹¹ Badi kabidi bu mbua idi ne lumpukusu, idi idia kayiyi yukuta. Badi amu ne dina patupu dia balami ba mikoku! Kadi kabena bajingulula bualu nansha bumue. Badi benza amu mudibu basue. Muntu yonsu wa kudibu udi udikebela amu tshiende tshidiye ujinga.

¹² Badi bamba ne: “Luayi, tuye kukeba maluvu. Netunue maluvu makole, tukuatshike. Maloba netuenze kabidi mutudi tuenza lelu emu. Bualu maluvu adi mashale adi a bungi.”