Yeshaya 52 - MUKANDA WA MYIDI MUKULU

Wewe Yerushalayime, jukaku

¹ Wewe Yerushalayime, jukaku, kankamana, fululuka lukasa. Wewe Siyone, tshimenga tshia tshijila, vuala bilamba biebe bilengele. Bualu benyi ne bantu babi, kabena babuela kabidi muebe to.

² Lupuishi ndukulamate pambidi. Kadi wewe Yerushalayime, ditutula lupuishi elu. Juka kulu, uye kusomba pa nkuasa webe wa bukalenga. Wewe Siyone, uvua muena lukanu, disulula mionji idi mikunjingila mu nshingu.

³ Maweja-Nangila udi wamba bantu bende ne: “Bavua banufile mu bupika tshianana, kabayi nansha banusumbe. Nanku nebanupikule tshianana, kabayi bafila nansha dikuta.”

⁴ Maweja-Nangila Mvidi Mukulu udi wamba kabidi ne: “Kale, bantu banyi bavua badiyile ku Ejipitu, kabayi babenzeja malu ku bukole to. Kadi bena Ashure bavua babakengesha baya nabu ku bukole.

⁵ Mpindiewu tshinudi numona ntshinyi? Bena Babilone kabidi, bavua baye ne bantu banyi mu bupika tshianana, kabayi bafute kantu. Bantu aba badi bakengesha bantu banyi, badi baditambisha, basendeka amu kusendeka dina dianyi.

⁶ Ke mundi mfika. Bantu banyi nebamanye ne: meme ndi nganyi! Nebamanye ne: meme ndi mbambila malu malelela!”

Maweja-Nangila udi upingana mu Yerushalayime

⁷ Ndisanka kaayi patudi tumona muntu wenda pa mikuna, ututuadila lumu lua disanka! Udi utuadila bantu lumu lua bupole, lua diakalenga ne lua lupandu. Udi ukuambila wewe Yerushalayime ne: “Mvidi Mukulu webe udi mukalenga.”

⁸ Teleja bantu bebe, bauvua muteke ku butentekedi. Bonsu badi bela mbila pamue, basanka, bualu mbadimuene ne mesu abu, mudi Maweja-Nangila upingana mu Siyone.

⁹ Nuenu makolu a mu Yerushalayime, elayi mbila ya disanka, bualu Maweja-Nangila udi wambuluisha bantu bende, usamba bena Izrayele.

¹⁰ Maweja-Nangila nealeje bukole buende, bua kukumbaja mudimu wende wa tshijila, bena mu matunga onsu bamona. Too ne ku ndekelu wa buloba, nebamone lupandu, ludi Mvidi Mukulu wetu ututuadila.

Umukayi mu Babilone

¹¹ Nuenu badi bambula malongu, ngesu ne makopu, bua kutendelela nabi Maweja-Nangila, umukayi, umukayi lukasa. Patukayi mu Babilone. Kanulengi tshintu tshibi. Patukayi kanuyi nupia mikiya.

¹² Musangu ewu, kanuena ne bua kupatuka mu tshiputuku to. Kanuena ne bua kunyema ne bowa, bualu Maweja-Nangila ke udi wenda kumpala kuenu. Yeye Mvidi Mukulu wa bena Izrayele, neanulame kabidi luanyima.

Muntu wa Maweja-Nangila (musambu muinayi)

¹³ Maweja-Nangila udi wamba ne: “Muena mudimu wanyi, neapete tshipeta tshimpe mu mudimu wende, neapete lumu lunene.

¹⁴ Bantu bavule bavua bamumone, bavua bakuatshika bowa, bua mpala wende uvua munyanguke. Kavua mufuanangane kabidi ne mpala wa muntu to.

¹⁵ Kadi mpindiewu, bantu ba bungi ba mu matunga a bende, nebakeme bualu buende. Bakalenga nebakatshile, kabayi bamanye tshia kuamba. Bualu nebamone malu adi kaayi umvuangana ne avuabu babalondele. Nebumvue malu avuabu kabayi banji kumvua.”