Yeshaya 40 - MUKANDA WA MYIDI MUKULU

TSHITUPA TSHIBIDI MAWEJA-NANGILA UDI USAMBA BENA IZRAYELE Nusambe bantu banyi

¹ Mvidi Mukulu udi wamba ne: Sambayi bantu banyi! Kanujingakanyi to!

² Nukoleshe bena Yerushalayime ku muoyi! Nubele mbila, nubambile ne: “Midimu yenu mikole yajiki! Nudi bafute tshibawu tshienu. Maweja-Nangila mmununyoke misangu ibidi dinyoka dijima dinuvua ne bua kupeta.”

³ Ndi mumvue diyi diamba ne: “Pandilayi Maweja-Nangila njila mu tshipela. Lulamijila Mvidi Mukulu njila mu buloba ebu buatuke.

⁴ Bajibikile mpongu yonsu. Mikuna minene ne mikese, bayipuekeshe! Mikuna ikale bu mpata. Bidi kulu bilandakane, bienza bibanda.

⁵ Diba adi, butumbi bua Maweja-Nangila nebumueneke. Bantu bonsu nebamumone diakamue. Ke mudi Maweja-Nangila muambe nanku.”

⁶ Diyi didi diamba ne: “Ambila bantu malu!” Meme kuebeja ne: “Mbambile tshinyi?” “Bantu bonsu badi bapita lukasa bu bisosa. Nansha bobu ne bukole, badi bashala nabu katupa, bu tshilongu tshia mu budimi.

⁷ Padi Maweja-Nangila wela mupuya, tshisosa tshidi tshiuma, tshilongu tshifubidila. — Bushuwa, bantu badi ne butekete bu bua bisosa.

⁸ Tshisosa tshidi tshiuma, tshilongu tshifubidila. Kadi muaku wa Mvidi Mukulu wetu, udi ushala ne bukole kashidi.”

Lumu lua disanka

⁹ Nuenu bena Yerushalayime, bandayi pa mukuna mutumbuke. Nuenu bena Siyone, koleshayi diyi muenu muonsu. Mbanuambile lumu lua disanka, kanutshinyi mua kuluambila banga bantu. Ambilayi bena mu bimenga bia Yuda ne: “Monayi Mvidi Mukulu wenu.

¹⁰ Monayi Maweja-Nangila Mvidi Mukulu. Udi ufika ne bukole, bua kulongolola bukalenga buende. Udi upingaja bena diende kuabu. Bavuaye mupikule, badi benda kumpala kuende.

¹¹ Udi bu mulami wa mikoku, udi usaka mikoku yende. Udi utuma amu tshianza, uyikunguja kaba kamue. Udi wambula bana ba mikoku mu tshiadi tshiende, usaka bitulu bitulu mikoku idi yamusha tuana.”

Bukole ne meji bia Mufuki

¹² Uvua mupime mayi manene mu tshianza tshiende nnganyi? Uvua muidikije diulu ne ntanta wa tshianza tshiende nnganyi? Uvua musangishe dimfuekenya dia buloba mu mbeketshi, bua kudipima nnganyi? Uvua muteke mikuna minene ne mikese pa tshipiminu nnganyi?

¹³ Uvua mufundile Mvidi Mukulu tshia yeye kuenza, nnganyi? Nganyi uvua mupe Mvidi Mukulu meji?

¹⁴ Bua kupeta meji, Mvidi Mukulu uvua muyukile ne nganyi? Uvua mumulongeshe, mumuleje mua kupita, mumumvuije njila wa kulonda nnganyi mene awu?

¹⁵ Kumpala kua Maweja-Nangila, bisamba bia bantu, bidi amu bu dimata dia mayi, didi dimata mu mbeketshi, nansha bu kasoka ka lusenga, kadibu bateka pa dilongu dia tshitempelu. Bantu ba kulekule, badi amu ne bujitu bu bua lupuishi lukese.

¹⁶ Nyama yonsu ya mu Lebanone, kayena mikumbane bua kumulambula mulambu muakanyine bumfumu buende. Nkunyi yonsu ya mu metu ende, kayena mikumbane bua kuosha mulambu mumukumbanyine.

¹⁷ Bisamba bionsu bisanga pamue, kabiena ne bujitu ku mesu ende. Bidi amu kajitu ka patupu.

Kabena mua kufuanyikija Mvidi Mukulu ne tshintu tshikuabu

¹⁸ Nudi basue kuteka Mvidi Mukulu mulongu umue ne nganyi? Nenumufuanyikije ne tshinyi?

¹⁹ Ne lupingu anyi? Muena mudimu uvua mulusonge. Pashishe mufudi uvua mululamike mpawungi, kululengejaye ne nkanu ya tshiamu tshitoke tshia mushinga mukole.

²⁰ Kadi muntu mupele menemene, udi kayi mua kukumbaja mushinga wa lupingu, udi usungula mutshi, udi kauyi mudie kudi bishi. Pashishe udi ukeba muena mudimu muimpe, udi mumanye mua kusonga lupingu, ludi luimane bimpe, kaluyi lutenkakana.

²¹ Kanuena bamanye anyi? Kanuena bajingulule anyi? Ki mbanji kunuambila kale anyi? Kanuena banji kumvua muvuabu bafuke buloba anyi?

²² Ke Maweja-Nangila udi usomba mu nkuasa wende, kulu kule ku mutu kua buloba. Udi umona bantu pa buloba, bamueneka bu tunkenene. Udi ubalula diulu, bu tshilamba tshinene tshidibu bakudika. Udi utshibalula bu ntenta, bua bantu basombe muinshi muatshi.

²³ Maweja-Nangila udi upuekesha balombodi ba matunga, bashale bantu ba patupu. Udi uleja badi ne bumfumu, mudibu bantu ba patupu.

²⁴ Badi bu mitshi mitekete. Bavua bamiamina ntete, itshidi yelelaku miji mu buloba. Kadi padi Mvidi Mukulu uyela mupuya, idi yuma, mupuya wende udi uyishimbula, bu mudi lupepele lukole lutula tususu tua tshimuma tshibishi.

²⁵ Mvidi Mukulu wa tshijila udi ukonka ne: “Nenumfuanyikije ne nganyi? Udi mua kuikala nanyi mumue nnganyi?”

²⁶ Tangila mu diulu muamua. Monayi mudiye mufuke mitotu, muvuaye muyipatule bungi buayi, bu tshiluilu tshia bilobu. Udi muyiteke yonsu bua imukuatshile mudimu. Bu mudiye ne bukole bupite bunene, kabidi ne bumfumu, yonsu idi yitaba diyi diende, padiye uyibikila, uyituma.

Badi batekete nebapete bukole

²⁷ Wewe Izrayele, tshisamba tshia Yakobe, bua tshinyi udi wamba ne: “Maweja-Nangila kena umona makenga adi ankuata. Mvidi Mukulu kena utangila, badi bankengesha tshianana!”

²⁸ Kuena mumanye anyi? Kuena mumvue bamba ne: Maweja-Nangila udi Mvidi Mukulu wa tshiendelele. Uvua mufuke buloba bujima. Katshia kena uteketa, kena upungila. Meji ende kabena mua kuajingulula.

²⁹ Muntu udi mutekete, Maweja-Nangila udi umupingajila makanda. Badi bapanga bukole, udi ubuwuja tente nabu.

³⁰ Bansongalume mene, badi bateketa, bapungila. Nansha bilobu kabidi bitu bidishinda panshi.

³¹ Kadi badi batekemena kudi Maweja-Nangila, badi bapeta makanda mapiamapia. Badi babuka bu nyunyi ya biminyi. Badi banyema lubilu, kabayi bapungila. Badi benda, kabayi bateketa.