Yeshaya 39 - MUKANDA WA MYIDI MUKULU

Izkiya uvua wakidila bamienampala ba bena Babilone

¹ Tshikondu atshi, mukalenga wa Babilone, Merodake-Baladane, muana wa Baladane, kumvuaye lumu lua disama dia Izkiya. Kumvuaye kabidi ne: Izkiya ukadi musanguluke. Nanku kutuminaye Izkiya bantu, bavua bamutuadila mukanda, ne bintu bia kumusankisha nabi.

² Izkiya kusanka ya bungi. Kulejaye bantu aba nzubu uvuabu balamina bintu bia mushinga mukole: mpawungi, tshiamu tshitoke tshia mushinga mukole, manananshi, ne mafuta a mupuya muimpe. Kubalejaye kabidi nzubu wa tshilaminu tshia bintu bia mvita, ne nzubu mikuabu yonsu ivua ne bintu bikuabu bivuaye nabi. Mukalenga kavua musokoke tshintu nansha tshimue, nansha tshia mu nzubu muende, nansha tshia mu bukalenga buende mene.

³ Pashishe, muambi Yeshaya kuya kudi mukalenga Izkiya, kumukonka ne: — Bantu aba bavua bakuambile tshinyi? Kabidi mbafume penyi? Izkiya kuandamuna ne: — Mbafume kule, ku bena Babilone, bafike bua kummona.

⁴ Yeshaya kumukonka kabidi ne: — Mu nzubu webe wa bukalenga bavua bamonemu tshinyi? Izkiya kuandamuna ne: — Bavua bamonemu bintu bidimu bionsu. Tshiena mubasokoke tshintu nansha tshimue tshia ku biuma bionsu bindi muteke.

⁵ Nanku Yeshaya kuambila Izkiya ne: “Teleja tshidi Maweja-Nangila muena bukole buonsu wamba:

⁶ Dituku dikuabu, bintu bionsu bidi mu nzubu webe wa bukalenga mpindiewu, bintu bionsu bivuabu batekemu kudi bakalenga bavua bakudianjidile, bintu bionsu ebi nebaye nabi ku Babilone. Maweja-Nangila udi wamba ne: Muaba ewu kawakushala tshintu to.

⁷ Nebakuate bamue bantu ba ku ndelanganyi yebe, baye nabu ku Babilone bua kubapakula, bua bikale bena mudimu mu nzubu wa bukalenga kua mukalenga wa bena Babilone.”

⁸ Izkiya kuandamuna Yeshaya ne: “Ndi nganyisha tshidi Maweja-Nangila mukuambile.” Izkiya uvua wela meji ne: nanku pantshidi ne muoyi, netuikale basombe bimpe mu bupole.