Yeshaya 34 - MUKANDA WA MYIDI MUKULU

Badi balumbuluisha bena Edome

¹ Nuenu bukua bisamba, semenayi pabuipi, numvue. Ntelejayi, nuenu bantu bonsu. Buloba buteleje, buteleje ne bintu bionsu bidipu! Buloba buonsu bujadike bualu ebu, bobu ne bintu bionsu bidi bimenapu.

² Maweja-Nangila udi mufikile bisamba bionsu bia bantu munda. Udi ne tshiji bualu buabi. Maweja-Nangila mmumane kushindika dibutuka diabi. Mmumane kuanyisha bua bifue.

³ Badibu bashipa, badi babimansha panshi, kabayi babajika to. Bitalu biabu bidi bibola, binunka bibi. Mashi abu adi apueka pa mikuna.

⁴ Mitotu ne mabulunge a kulu, bidi bienda bisunsuka. Badi bavunga tshibuashibuashi, bu mudibu bavunga mukanda. Bia mulu bionsu bidi bipona, bu mabeji muume a muonji wa mvinyo, nansha a mutshi wa mfiku.

⁵ Muele wa mvita wa Maweja-Nangila, udi umueneka mu diulu. Monayi mudiwu ushipa bantu ba bena Edome aba, badi Maweja-Nangila musue kubutula.

⁶ Ku muele wa mvita wa Maweja-Nangila, kudi mashi a bungi, kudi mafuta tente, bu mashi a mikoku ya bimpanga, a mbuji ya mpumbu, bu mafuta a ku tuonyi tua mbuji. Bualu mu tshimenga tshikulu tshia Bosra, Maweja-Nangila udi ulambula milambu. Mu ditunga dia bena Edome, udi ushipa nyama ya milambu.

⁷ Diba adi, mbowa idi ifua, pamue ne ngombe milume ya bukole. Mashi adi abuela mu buloba, mafuta a nyama adi apueka mu lusenga.

⁸ Bualu ke dituku didi Maweja-Nangila usombuela bantu. Ke tshidimu tshidiye ufuta baluishi ba Siyone malu mabi onsu avuabu benze.

⁹ Misulu ya mu bena Edome, neishale misulu ya budimbu. Buloba bua Edome nebuandamuke kapia ka mfundanga. Ditunga nedikale bu budimbu, budibu bosha mu kapia,

¹⁰ kadi katema bufuku ne munya, kabandisha amu kubandisha muinshi mulu. Ditunga nedishale dikolu, muntu kayi upitshilamu, kashidi ne kashidi.

¹¹ Tshikololu ne nkese nebisombemu. Tshipungulu ne kanyunyu kadi kafuana tshikololu, nebienzemu masua abi. Maweja-Nangila neapime ditunga, bua kudibutula dijima, bua dishale tshipela, kamuyi bantu.

¹² Kamuakuikala kabidi bakulu ba ditunga, badi mua kusungula Mukalenga. Balombodi bonsu mbamane kufua.

¹³ Mitshi ya meba idi imena mu nzubu ya bukalenga. Mpesa ne mingonga, bidi bitoloka mu bimenga bivuabu bakoleshe ne bimana. Mibuabua idi inayilamu, nyunyi ya kafyondu iladilamu.

¹⁴ Nyama ya kande neisangilemu ne nyama ya tshimungu. Ke mudi mbuji ya muitu isangila. Ke mudi mukishi mubi udi wendakana butuku, upetela muaba wa kuikishila.

¹⁵ Ke mudi nyoka wenzela buina buende, budiye welela makela ende, utentekela mudiwu atoyika. Ke mudi nyunyi ya mikanku kabidi isangila mu bisumbu.

¹⁶ Paudi ukeba mu mukanda wa Maweja-Nangila, neubalemu ne: Nansha umue wa ku nyama eyi kena ushadila kunyima. Maweja-Nangila udi utuma diyi bua yonsu ikalepu. Mueyelu wende ke udi uyisangisha pamue.

¹⁷ Maweja-Nangila uvua mutshinke, tshitupa tshia ditunga, tshidi yonsu wa kudiyi mua kupeta. Uvua muangate muonji, bua kupima ditunga, kudiabanyina nyama ayi. Nedishale diayi kashidi, neisombemu tshiendelele.