Yeshaya 21 - MUKANDA WA MYIDI MUKULU

Kabutu ka Babilone

¹ Badi bamanyisha malu adi atangila Babilone, “Tshipela tshidi ku musulu.” Muena lukuna udi utumina ku tshipela, ku ditunga didi dikuatshisha bantu bowa, amu mudi mvunde ukosolola tshipela tshia Negebe.

² — Maweja-Nangila kundeja mu tshilota, bualu bua dikema, buenza bowa. Uvua wamba ne: “Bakengeshanganyi badi amu bakengeshangana, babutudianganyi badi amu babutulangana. Bena Elame, bangayi mvita! Bena Madayi, luishayi tshimenga! Tshiena musue bua bena Babilone batuishe kabidi bantu mikemu.”

³ Ke padi mubidi wanyi mujima musunsuke ne makenga. Dikenga ndinkuate, bu mudidi dikuata mukaji pa lulelu. Bindi ngunwua bidi bimpampakaja. Bindi mmona bidi binkuate bowa.

⁴ Tshiena kabidi ne dikanda. Bowa budi bungenza. Mvua muindile kapepa katalale ka ku dilolu, kadi dilolu kumfikila amu ne bowa.

⁵ Badi balongolola mesa bua kudia, badija biata, badia, banua… Diakamue badi bela lubila lukole ne: “Balombodi ba bena mvita, jukayi, kuatayi bia mvita, tuyayi!”

⁶ Telejayi tshivua Maweja-Nangila mungambile: “Uye, uteke mutentekedi. Yeye neambe tshionsu tshiamonaye!

⁷ Padiye umona nyama ya tubalu ikoka ditempu dia mvita, umona musumba wa mpunde, nansha wa tumelu, adimuke, atangile bimpe!”

⁸ Pashishe, mutentekedi neele lubila ne: “Mfumu, ndi mushale dituku dijima, pa muaba wanyi wa butentekedi. Ndi mushale butuku bujima, amu ntentekela.

⁹ Wamanya! Ke muntu awu ufika, mubande mu ditempu dikoka kudi tubalu. Udi wela lubila ne: ‘Mbakuate tshimenga tshia Babilone. Mbatshikuate! Mpingu ya mvidie yende mbayitonkole panshi, mmitshibuke bitupa bitupa!’ ”

¹⁰ Wewe tshisamba tshianyi, tshivuabu bakengeshe, bu mudibu bashipule ntete ya mu budimi, teleja bualu ebu bundi mukuambile, buvuabu bammanyishe kudi Maweja-Nangila, Mvidi Mukulu muena bukole buonsu.

Bufuku nebutshie diba kaayi?

¹¹ Badi bamanyisha malu adi atangila “Duma”. Muntu udi mu ditunga dia Seyire udi ungela diyi ne: “Mutentekedi, tukadi diba kaayi? Bufuku bukadi pa kutshia anyi?”

¹² Kadi mutentekedi kuandamuna ne: “Bufuku bukadi pa kutshia, kadi tutshidi amu bufuku. Panudi basue kupeta diandamuna, pinganayi musangu mukuabu.”

Bantu ba mu Dedane ne ba mu Kedare badi banyema

¹³ Badi bamanyisha malu adi atangila ditunga dia bena Arabe. Nuenu misumba ya bantu ba mu Dedane, bufuku nuye kulala mu tshisuku.

¹⁴ Nuenu badi basomba mu Tema, angatayi mayi, nutuadile bantu ba mu Dedane badi bafue nyota. Nuye ne biakudia, kudi bantu bavua banyeme.

¹⁵ Bualu bavua banyeme muele wa mvita, banyeme muele ukavua ubashipa, banyeme buta bukavuabu bamane kunana, banyeme mvita ikavua mikole.

¹⁶ Nenku Maweja-Nangila uvua mungambile ne: “Papita tshidimu tshimue, amu tufika dituku ditudi lelu, lumu lua Kedare nelujike.

¹⁷ Mu Kedare beedi ba mikete, mbilobu menemene. Kadi, nebashale amu bakese.” Maweja-Nangila Mvidi Mukulu wa bena Izrayele ke udi ujadika nanku.