Yeshaya 2 - MUKANDA WA MYIDI MUKULU

¹ Yeshaya, muana wa Amose, uvua umanyisha bantu malu avua Maweja-Nangila mumuleje, adi atangila bukalenga bua Yuda, ne tshimenga tshia Yerushalayime.

Bantu ba mu bisamba bionsu nebasombe mu Yerushalayime

² Dituku dikuabu mukuna udibu base nzubu wa Mvidi Mukulu, neupite mikuna yonsu, neuyipite ku bule. Bisamba bionsu nebiutantshile, bibodiokamu.

³ Bantu bavule nebayemu, benda bamba ne: “Tuyayi! Tubande pa mukuna wa Maweja-Nangila. Tubuele mu nzubu wa Mvidi Mukulu wa Yakobe. Atulongeshe tshidiye musue bua tuetu kuenza. Netulonde njila udiye utuleja.” Eyowa, dilongesha dia Maweja-Nangila didi difumina mu Siyone, muaku wende udi upatukila mu Yerushalayime.

⁴ Neakose nsambu ya bisamba pa yoyi, nealumbuluishe bantu bonsu. Nebandamune mafuma abu, ne miele ya mvita, bishale nkasu ne bikasu, bia kudima ne kunowa nabi. Tshisamba katshitshiena tshiluisha tshikuabu. Bantu kabatshiena balongeshangana mvita.

⁵ Nuenu, ndelanganyi ya Yakobe, vuayi, tuende bonsu pamue, mu butoke bua Maweja-Nangila.

Dituku dia Maweja-Nangila, ndituku dia tshilumbuluilu

⁶ Wewe Maweja-Nangila, ukadi ulengulula tshisamba tshiebe, tshisamba tshia ndelanganyi ya Yakobe. Bualu bena mbuku ba kudi diba dipatukila, mbavulangane mu tshisamba tshia Yakobe. Batempi ba malu a mitotu badimu, bungi bu mu ditunga dia bena Peleshete. Bantu bebe mbunwuangane ne bantu ba bisamba bikuabu, balonda bibidilu biabu.

⁷ Buloba bua Yakobe mbuwule ne mpawungi, tshiamu tshitoke tshia mushinga mukole, kabidi ne mpetu mikuabu, bungi kabuyi kubala. Tubalu ne matempu a mvita, mbipite bungi mu ditunga.

⁸ Buloba bua Yakobe mbuwule tente ne mvidie ya dishima. Bantu badi batendelela mvidie, bakukuila bintu bidibu badienzela.

⁹ Ke padi bantu bonsu ne bua kuinama, kudia lupuishi. Kadi wewe Maweja-Nangila, kubajudi to.

¹⁰ Nuenu bantu sokomayi mu mbuebue, buelayi muinshi mua buloba. Nutshine tshiji tshia Maweja-Nangila. Nealeje bukole ne butumbi buende.

¹¹ Muena ditambisha neiname panshi. Muena kapeja, nebamupuekeshe. Dituku diadia nebamanye ne: amu Maweja-Nangila nkayende udi ne bukole.

¹² Dituku adi, Maweja-Nangila muena bukole buonsu, yeye nkayende neakose bilumbu. Neapuekeshe muntu udi udiamba ne: ndi munene, nansha ne: ndi mfumu.

¹³ Dituku adi, neashimbule mitshi ya sedre yonsu ya mu Lebanone, idi milepa mipite mikuabu ku bule. Neakose mitshi ya nsanga ya mu Bashane.

¹⁴ Nealandakaje mikuna yonsu minene ne mikese.

¹⁵ Neashimbule tuleya tutumbuke, kabidi ne bimana bile bionsu bivuabu bakoleshe nabi bimenga.

¹⁶ Neine matu manene onsu mu mayi, kabidi ne majuwa, nansha wowu malenga bishi.

¹⁷ Muntu muena ditambisha neinyike mpala panshi, muena kapeja neadie buloba. Dituku adi, nebamanye ne: amu Maweja-Nangila nkayende udi ne bukole.

¹⁸ Mvidie yonsu ya dishima neijimine.

¹⁹ Bantu nebabuele mu mbuebue, nebabuele muinshi mua buloba. Nebatshine tshiji tshia Maweja-Nangila, tshidi tshibakuata bowa. Nealeje bunene buende, ne butumbi. Neazakeje buloba bikole.

²⁰ Dituku adi, mpingu ya tshiamu tshitoke ne tshia mpawungi, ivua bantu basonge bua kuyitendelela, nebayelele mpuku ne tupulukusu.

²¹ Nebabuele mu mbuebue ne mu makela ayi; nebanyeme tshiji tshia Maweja-Nangila tshidi tshibakuata bowa. Nebasokome padi Maweja-Nangila ubaleja bukole buende ne butumbi, uzakakaja buloba.

²² Lekelayi kutekemena kudi muntu, bualu muoyi wa muntu udi amu mueyelu wa katupa. Muntu udi tshintu tshia mushinga anyi?