Yeshaya 17 - MUKANDA WA MYIDI MUKULU

Mvidi Mukulu neanyoke bukalenga bua Damase ne bua Izrayele

¹ Badi bamanyisha malu adi atangila “Damase”. Nkushale amu matuku makese, Damase kakuikala kabidi tshimenga to. Bionsu bidimu nebibutuke.

² Bena bimenga bidi bena Damase batangila nebanyeme. Nyama neipite mu bimenga ebi, kakuyi udi uyitshinyisha, nansha uyipata.

³ Bukalenga bua Efrayime kabuakuikala kabidi ne bena mvita. Bena Damase kabakuikala kabidi ne mukalenga to. Bantu badi bashala ne muoyi mu Damase, nebikale bakese, mudi bena Izrayele mene. Maweja-Nangila muena bukole buonsu, ke udi ujadika nanku awu.

⁴ Dituku adi, bena Izrayele, nebikale banyane, bashale amu mifuba nkayayi.

⁵ Nebadimone bu badi mu tshikondu tshia dinowa. Bakadi bamane kunowa ntete ya kuenza bukula. Bakadi bamane kusangisha bisumbu bia miepu. Bidi amu bu mudibu benza mu tshibandabanda tshia bena Refayime, bapele bashala bapumbulula amu miepu mikese.

⁶ Mu Izrayele nemushale bantu bakese, amu bu padibu bamane kupola bimuma bia olive, kushala amu tumuma tubidi nansha tusatu mu katongobela, tunayi nansha tutanu ku matamba. Ke Maweja-Nangila Mvidi Mukulu wa bena Izrayele udi ujadika nanku.

⁷ Dituku adi, bantu nebalonde tshiakabidi mufuki wabu. Nebatangile kudi Mvidi Mukulu wa tshijila wa bena Izrayele.

⁸ Kabena baya kabidi ku bilambuilu bivuabu badienzele, nansha ku mvidie ivuabu basonge ne bianza biabu, nansha ku makunji a bijila, nansha ku bioshelu bia manananshi.

⁹ Dituku adi, bimenga bia mu Izrayele bivuabu bakoleshe ne bimana nebishale munda mutupu, bu muvua bimenga bia bena Ivi ne bena Amore bishale munda mutupu kale, diba divua bena Izrayele babuele mu ditunga. Nebishale amu tshipela tshidi tshikuatshisha bowa.

¹⁰ Bena Izrayele nukadi bapue Mvidi Mukulu muoyi. Yeye ke uvua munusungidile! Kanuena nuvuluka Mupandishi wenu, udi bu lubuebue luenu, muaba unudi mua kusokomena. Nukadi nukuna mitshi, bua kutendelela nayi mvidie ya bantu benyi. Nudi numiamina ntete, bua kunemeka nayi mvidie ya mu matunga a bende.

¹¹ Kadi nansha binuvua bakune bitoloke dituku adi, nansha bionsu binuvua bamiamine dinda, biele bilongu amu dituku adi, kanuena nunowa tshintu to. Dituku dia diakabi adi, nenumone amu makenga, muntu nansha umue kena mua kunuambuluisha.

Bisamba bia bantu bidi bijuula mutoyi kapayi bualu

¹² Akia! Bisamba bungi nenku, bidi bienza mutoyi bua tshinyi? Mutoyi wabu udi bu wa tshiona tshia mayi manene. Bukua matunga budi bujuula tshimvundu, bu tshia mayi a tshibila adi apueka lubilu.

¹³ Tshimvundu tshia bisamba tshidi tshienda tshisemena pabuipi, tshifuana tshiona tshia mavuala a mayi manene. Kadi Maweja-Nangila udi ukanyina bisamba. Biobi bidi binyema kule, bu kasosa kapepula kudi lupepele lua pa mikuna, bu lupuishi lujuula kudi mvunde.

¹⁴ Dilolu bidi bitukuatshisha bowa bukole, kadi bangabanga ne kutshiabu, mbimane kuya! Ebi nebienzekele bantu badi batupawula bintu. Ebi nebienzekele bantu badi biba bintu bia mu ditunga dietu.