Yakobe 4 - MUKANDA WA MYIDI MUKULU

Badi bananga bia panu

¹ Mvita ne matandu bidi munkatshi muenu mbifume penyi? mBifume ku majinga mabi adi aluangana munda muenu, kaayi apungila.

² Nudi nujinga tshintu, kadi kanuena mua kutshipeta. Ke panudi nukeba kushipangana. Nudi nualakana tshintu, kanuyi mua kutshipeta. Ke panudi nutandangana, nuluangana mvita. Kanuena ne binudi nukengela, bualu kanuena nubilomba kudi Mvidi Mukulu.

³ Panudi nulomba, kanuena nupeta, bualu meji anudi nubilomba nawu, adi mabi. Nudi basue kubipeta bua kudisankisha amu nkayenu.

⁴ Nuenu nudi bantu badi babenga Mvidi Mukulu! Kanuena bamanye ne: kunanga bia panu nkubenga Mvidi Mukulu anyi? Udi unanga bia panu, udi musue kudienza muluishi wa Mvidi Mukulu.

⁵ Nuvuluke mudi Mikanda ya tshijila yamba pa bualu ne: “Mvidi Mukulu udi ne mukawu. Udi musue bua mueyelu udiye muteke munda muetu udileje patoke.”

⁶ Kadi bu mudi Mvidi Mukulu utunanga, udi utusankisha kabidi bipite. Ke padi Mikanda ya tshijila yamba ne: “Mvidi Mukulu udi ubenga bena ditambisha, kadi udi wanyisha bapuekele.”

⁷ Nanku tumikilayi Mvidi Mukulu. Tuilayi diabolu nkanana, bua anunyeme, aye kule!

⁸ Semenayi kudi Mvidi Mukulu. Nanku Yeye neasemene kunudi. Nuenu bena mibi, owayi bianza bienu. Nuenu bena mpala ibidi, shindikayi mioyi yenu kudi Mvidi Mukulu nkayende!

⁹ Lejayi dibungama, nudile muadi, nutue mikemu. Lekelayi kuseka, nudile. Lekelayi kusanka, nubungame.

¹⁰ Nudipuekeshe kumpala kua Mfumu. Yeye neanubandishe.

Kupishi muanenu

¹¹ Bana hetu, kanujananganyi to. Udi ujana muanabu, nansha umupisha, udi ujana mikenji, nansha uyipisha. Kadi paudi upisha mikenji, kuena uyitumikila kabidi, bualu udi uyitangila bu mibi.

¹² Amu Mvidi Mukulu nkayende udi wela mikenji; amu Yeye ke udi mua kulumbuluisha. Yeye nkayende udi mua kuhingisha, nansha kupisha. Wewe mene udi upisha muanenu, udi nganyi?

Lekelayi kuditambisha

¹³ Mpindiewu ndi nnubela, nuenu badi bamba ne: “Lelu, nansha maloba, netuye mu tshimenga kampanda. Netusombemu tshidimu tshijima, tuende mushinga, tupete mateta.”

¹⁴ Kanuena bamanye bidi mua kunuenzekela maloba! Bualu nudi bu dibungi dikese didi dimueneka katupa, ditenduka.

¹⁵ Nuvua mua kuamba ne: “Pasua Mvidi Mukulu, netuikale ne muoyi, netuenze etshi, netuenze tshiatshia.”

¹⁶ Kadi mpindiewu nudi nuditambisha, nudiela mulu. Budiambi bua nanku mbubi.

¹⁷ Nanku muntu udi mumanye bualu buimpe budiye ne bua kuenza, ubenga kubuenza, mmuena tshibawu.