Yakobe 3 - MUKANDA WA MYIDI MUKULU

Kulama ludimi

¹ Bana hetu, kanujingi kuikala ba bungi ku bulongeshi. Bualu nudi bamanye ne: tuetu balongeshi, nebatulumbuluishe ne disu dikole, bipite mudibu balumbuluisha bakuabu.

² Tudi tuenza bonsu bibi mishindu mishilangane. Kadi padi muntu kayi wakula muaku mubi musangu nansha umue, awu mmuntu wa nsongu. mMumanye kabidi mua kukanda mubidi wende mujima.

³ Patudi tuela tubalu nkanu ku mbanga, bua tuitabe bitudi tutuenzeja, tudi mua kuludika mubidi watu mujima.

⁴ Tuele meji kabidi ku majuwa: nansha wowu mapite bunene, nansha lupepele lukole luasaka, tshiamu tshikese tshidi tshialudika, bua aye konsu kudi muendeshi musue.

⁵ Ke mudi ludimi tshitupa tshikese menemene tshia mubidi, kadi ludi mua kuditemba bua malu manene adilu luenza. Tuvuluke mudi kapia kakese mua kosha difu dinene!

⁶ Ludimi ludi bu kapia. Ludi tshimamuende wa bubi budi mu mubidi wetu, budi mua kutunyanga muetu muonsu mutudi. Ludi lutushidisha matuku onsu atudi pa buloba ne kapia kadi kafuma mu dijimba mene dia kapia.

⁷ Muntu mmupete mushindu wa kutekesha nyama yonsu ya lonji, nyunyi, bilandadi, ne minyinyi ya mu mayi.

⁸ Kadi katshia muntu nansha umue kena muanji kupeta mushindu wa kutekesha ludimi. Ludi tshintu tshibi tshidibu kabayi mua kuimanyika, tshiuwule ne lulengu lua lufu.

⁹ Tudi tuela nalu Maweja-Nangila Tatu wetu tuasakidila. Kadi tudi tutshipa nalu bantu badi Mvidi Mukulu mufuke ku tshimfuanyi tshiende.

¹⁰ Mukana mumue mudi mupatuka miaku ya kuela tuasakidila ne ya kutshipa. Bana hetu, kanuenji nanku.

¹¹ Mpokolu nansha umue kena mua kupatula mayi mimpe ne mayi mabi muaba wa momumue.

¹² Bana hetu, mutshi wa mfiku kawena mua kukuama bimuma bia olive. Monji wa mvinyo kawena mua kukuama bimuma bia mfiku. Mpokolu wa mayi a luepu kena mua kupatula mayi kaayi ne luepu.

Meji a kulu

¹³ Munkatshi muenu mudi muntu wa meji ne wa lungenyi anyi? Abileje ku malu mimpe adiye wenza, ku butalale bua malu, ne ku meji adiye ufila.

¹⁴ Kadi padi muoyi wenu mumane kunyanguka ne lubabu, ne lungenyi lua difuilakana mianzu, kanuditambishi bua meji to. Kanushimi, kanuvidi malu adi malelela.

¹⁵ Bualu meji a nanku kaena afuma mu diulu. Adi a panu, aleja bubi bua bantu, afuma kudi diabolu.

¹⁶ Bualu muaba udi lubabu ne difuilakana dia mianzu, ke udi kabidi tshimvundu ne buenzavi bua mishindu yonsu.

¹⁷ Kadi meji a kulu kaena kalema. Adi akeba bupole, akidila bantu bimpe, aleja musangelu, afuila bantu luse, enza malu mimpe mavule. Kaena adiwula muntu, kaena ne mioyi ibidi.

¹⁸ Lutete lua meji ludi lutoloka munkatshi mua badi bakeba ditalala. Ke muaba udilu lukuama bimuma bia malu mimpe.