Tite 3 - MUKANDA WA MYIDI MUKULU

Mudi bena Kristu mua kusomba panu

¹ Uvuluije bena ditaba mudibu ne bua kukokela balombodi ne bamfumu ba matunga, kubatumikila. Bikale ne muoyi wa kubambuluisha mu midimu mimpe yonsu.

² Kabajanyi muntu. Bikale bakebi ba bupole, badi bamanye mua kutuangaja bantu. Bikale kabidi ne diyi dimpe kudi bantu bonsu, kabayi bapungila.

³ Bualu ku kale, tuetu kabidi katuvua ne meji to. Tuvua bena tshitunu, bantu bapambuke. Tuvua bapika ba malu mabi, ne ba masanka mabi a mishindu yonsu. Tuvua bena buenzavi ne lubabu. Tuvua tukina bakuabu, bobu kabidi bavua batukina.

⁴ Kadi pakumueneka muoyi mulenga wa Mvidi Mukulu, Musungidi wetu, ne dinanga diende dia bantu,

⁵ ke Yeye kusungidila, ki mbua midimu mimpe ituvua benze, kadi anu bua luse luende. Uvua mutusungidile, bualu bavua bafume mu mayi, batulele tshiakabidi, batupeshe muoyi mupiamupia kudi Mueyelu wa Tshijila.

⁶ Bualu ku bukole bua Yezu Kristu, Musungidi wetu, Mvidi Mukulu mmutupumuine Mueyelu wende wa Tshijila muvule.

⁷ Nanku Mvidi Mukulu kudibingisha, bualu udi utunanga. Ke mutudi mua kupiana muoyi wa kashidi utudi ditekemena.

⁸ Miaku indi ndongesha eyi idi milelela. Ndi musue wambulule malu awu misangu mivule, bua bantu badi bitaba Mvidi Mukulu bakumbaje midimu mimpe ne dinanukila. Ke bidi bimpe, bilengelela bantu.

⁹ Kadi lekela kuelangana mpata ya tshianana, kulondolola ndelanganyi mulongulongu ya bankambua, matandu ne mpata bia pa mikenji. Ebi kabiena biambuluisha nansha kakese.

¹⁰ Muntu udi utapululangana, umubele musangu wa kumpala, umubele kabidi musangu muibidi. Kadi pabengaye kuitaba, umumushe munkatshi muenu.

¹¹ Bualu udi mumanye ne: muntu wa nanku mmumane kupambuka mu njila mululame. Mibi idiye wenza idi ijadika ne: mmupile.

Mibelu ya ndekelu

¹² Pangikala mukutumine Artemase nansha Tishike, ufike kundi lukasa mu tshimenga tshia Nikopolise. Ke muaba undi musue kusomba mu tshikondu tshia mashika.

¹³ Ambuluisha Zenase, mulumbuluidi wa bantu, ne Apolose, bua bapete bionsu bidibu bakengela bua luendu luabu.

¹⁴ Bena dietu kabidi badi ne bua kukumbaja midimu mimpe ne dinanukila, bua tumone mua kujikija majinga manene atudi nawu. Kabena mua kusomba kabayi bakuata mudimu.

¹⁵ Bantu bonsu batudi nabu kunu, badi bakuela muoyi. Ela badi badisanga netu mu ditaba muoyi. Dinanga dia Mvidi Mukulu dishindame munda muenu bonsu.