Rome 9 - MUKANDA WA MYIDI MUKULU

Mvidi Mukulu ne tshisamba tshiende

¹ Ndi ngamba malu malelela. Ndi wa Kristu, nanku tshiena nshima to. Kondu kanyi ka munda kabidi kadi kanjadikila ku bukole bua Mueyelu wa Tshijila ne: bindi ngamba bidi bilelela ne:

² ndi ne dibungama dinene, ngumvua dikenga tshiyi mpeta dikisha.

³ Bualu ndi njinga bua Mvidi Mukulu antshipe meme, angumushe kudi Kristu, bu biobi mua kulengelela bana hetu, bena tshisamba tshianyi.

⁴ Badi bena tshisamba tshia Izrayele. Mvidi Mukulu mmubenze bana bende. mMumueneke munkatshi muabu ne butumbi buende. mMutue nabu ndondu yende, mubapeshe kabidi mikenji yende. Uvua mubaleje muyuabu mua kutendelela. mMubalaye ne malaya.

⁵ Badi ba ku ndelanganyi ya bankambua. Kristu mu buntu buende udi wa ku tshisamba tshiabu. Yeye Mvidi Mukulu, udi ku mutu kua bionsu, atumbe kashidi. Amene.

⁶ Kadi tshiena musue kuamba ne: bivua Mvidi Mukulu mulaye, kena mubikumbaje nansha. Bualu bantu ba ku ndelanganyi ya Izrayele, kabena bonsu bena Izrayele balelela to.

⁷ Ndelanganyi ya Abrahame kayena yonsu bana bende menemene to. Bualu Mvidi Mukulu uvua muambile Abrahame ne: “Kudi Izake ke kuwapetela ndelanganyi imvua mukulaye.”

⁸ mBuena kuamba ne: ki mbana badibu balela ku bukole bua buntu buabu, badi bana ba Mvidi Mukulu to. Kadi amu bana badibu balela bilondeshile dilaya dia Mvidi Mukulu, ke badi ndelanganyi menemene ya Abrahame.

⁹ Bualu miaku ya dilaya, ivua Mvidi Mukulu muambe, ivua ya ne: “Pakumbana tshikondu, nempingane. Sara neikale ne muana wa balume.”

¹⁰ Ki mbionsu to. Bana ba balume babidi ba Rebeka bavua ba tatu umue, ke nkambua wetu Izake.

¹¹ Kadi Rebeka kayi muanji kulela bana bende babidi ba balume, bana kabayi banji kuenza malu mimpe nansha mabi, Mvidi Mukulu ukavua mumane kuambila mamuabu ne: “Mukulu neakuatshile muakunyi mudimu.”

¹² Ke muvua Mvidi Mukulu uleja mudiye ukungula bantu mudiye musue. Udi ubasungula, ubabikila, kayi utangila bidibu benza.

¹³ Ke padi Mukanda wa tshijila wamba ne: “Mvua munange Yakobe, mubenge Esawu.”

¹⁴ Nanku netuambe tshinyi? Netuambe ne: Mvidi Mukulu mmuena kansungasunga anyi? Nansha kakese!

¹⁵ Bualu uvua muambile Moshe ne: “Undi musue kutuila luse, nemmufuile. Undi musue kuleja muoyi muimpe, nemmuleje.”

¹⁶ Nanku bidi muntu ujinga, nansha bidiye wenza, kabiena ne bualu. Kadi mudi amu Mvidi Mukulu nkayende udi musue kutuila bantu luse.

¹⁷ Mu Mukanda wa tshijila Mvidi Mukulu udi wambila mukalenga wa bena Ejipitu ne: “Mvua mukuteke mukalenga bua kuleja bukole buanyi munda muebe, ne bua lumu luanyi lutangalake pa buloba bujima.”

¹⁸ Nanku muntu udi Mvidi Mukulu musue kutuila luse, udi umufuila. Muoyi wa muntu udiye musue kupapisha, udi uupapisha.

Tshiji ne luse bia Mvidi Mukulu

¹⁹ Bumue nenunkonke ne: “Kadi biobi bikale nanku, Mvidi Mukulu utshidi udiwula kabidi bantu bua tshinyi? Bualu udi mua kumufuila nkanana ku bidiye musue nnganyi?”

²⁰ Kadi wewe muntu udi welangana mpata ne Mvidi Mukulu, udi nganyi? Luesu lua dima ludi mua kukonka udi mulufumbe ne: “Udi mutufumbe nenku bua tshinyi?”

²¹ Mufumbi wa luesu udi mua kufumba dima mudiye musue. Udi mua kuenza ne dima dia mushindu umue luesu lua mushinga mukole, nansha lua patupu.

²² Bushuwa Mvidi Mukulu uvua musue kuleja tshiji tshiende, ne kumanyisha bantu bukole buende. Kadi uvua muanji kulengulula ne lutuulu luvule bantu bavuaye mufikile munda, bakafua bakumbanyine kubutuka.

²³ Butumbi buende bunene uvua musue kuteleja kabidi tuetu bantu badiye ufuila luse, badiye mudianze kulongolola bua tubuele mu butumbi buende.

²⁴ Bualu tuetu ke bantu badiye mubikile. Ki mmutubikile amu munkatshi mua bena Yuda nkayabu nansha, kadi kabidi munkatshi mua bantu ba bisamba bikuabu.

²⁵ Ke bidibu bafunde mu mukanda wa Osheya ne: “Tshisamba tshia bantu bavua kabayi banyi, ne ntshibikile ne: ntshia bantu banyi. Bantu bamvua tshiyi munange, nembabikile ne: mbandi nnanga.

²⁶ Muaba menemene uvuabu babambile ne: ‘Kanuena bantu banyi’, nebababikile ne: mbana ba Mvidi Mukulu udi ne muoyi.”

²⁷ Yeshaya kabidi bualu bua bena Izrayele mmuambe ne: “Nansha bena Izrayele bungi bu lusenga lua ku muelelu wa mayi manene, kadi anu kasumbu ka bantu ba munkatshi muabu nekapande.

²⁸ Bualu Mvidi Mukulu neakumbaje pa lukasa pa buloba bionsu bi-vuaye muambe.”

²⁹ Yeshaya mene awu uvua mudianze kuamba ne: “Bu Maweja-Nangila wa bukole buonsu kayi mutulamine ndelanganyi mikuabu, tuvua mua kushala bu tshimenga tshia Sodome, tuvua mua kufuanangana ne bena mu tshimenga tshia Ngomore.”

Bena Izrayele ne Lumu lua Disanka

³⁰ Nenku netuambe bishi? Bantu bavua kabayi bena Yuda, kabayi bakeba kubinga ku mesu kua Mvidi Mukulu, Mvidi Mukulu mmubabingishe kumpala kuende bua ditaba.

³¹ Kadi bena tshisamba tshia Izrayele bavua bakeba mikenji ivua mua kubabingisha ku mesu kua Mvidi Mukulu, ki mbapete tshikuabu bipatshila nansha.

³² Bua tshinyi? Bualu kabavua bakeba kulengelela Mvidi Mukulu ku dimuitaba nansha. Bayua bela meji a kumulengelelaku midimu ivuabu benze. Nanku bavua batuute dikasa ku “dibue didi ditetula bantu,”

³³ mudi Mukanda wa tshijila wamba ne: “Tangilayi, ndi nteka mu Siyone dibue didi ditetula bantu, lubuebue ludi lubaponesha. Kadi udi umuitaba, kakufua bundu nansha.”