Rome 6 - MUKANDA WA MYIDI MUKULU

Tudi bafue bua bubi, kadi tudi ne muoyi mu Kristu

¹ Nanku netuambe bishi? Tudi mua kunanukila mu dienza dia malu mabi, bua dinanga didi Mvidi Mukulu utuleja dipite kuelangana anyi?

² Nansha kakese! Tudi bafue bua bubi. Nanku mmunyi mutudi mua kutungunuka kabidi ne dienza dia malu mabi?

³ Kanuena bamanye ne: tuetu bonsu baeabu batue mu mayi, bua tudisange ne Kristu, bavua batutue mu mayi, bua tudisange nende mu lufu luende anyi?

⁴ Pavuabu batutue mu mayi, bavua batujike nende, bua tuikale bafue nende, tubike kabidi nende ku lufu, muvua Kristu mubike ku bukole bua butumbi bua Tatu, bua tupete petu nsombelu mupiamupia.

⁵ Bualu patudi badisange nende mu lufu ludi bifuanangane ne luende, netudisange kabidi nende mu dibika dia ku bafue difuanangane ne diende.

⁶ Tumanyayi bimpe bualu ebu ne: muntu utuvua kale awu wakafua ne Kristu ku mutshi mutshiamakane, bua mubidi wetu wa bubi ubutuke, bua katuikadi kabidi bapika ba bubi.

⁷ Bualu udi mufue kena kabidi ku bumfumu bua bubi.

⁸ Patudi bafue pamue ne Kristu, tudi tuitaba ne: netubike kabidi pamue nende.

⁹ Nanku tudi bamanye ne: Kristu katshia wabika ku lufu, kena ne bua kufua kabidi to. Lufu kaluena kabidi ne bumfumu pambidi pende.

¹⁰ Lufu luvuaye mufue ndumumushe ku bubi musangu umue bua kashidi. Kadi muoyi udiye nawu mpindiewu, udi nawu bua Mvidi Mukulu.

¹¹ Nanku nuenu kabidi nuditangile bu bantu bafue bua bubi, kadi nuikale ne muoyi bua Mvidi Mukulu, bu munudi badisange ne Yezu Kristu.

¹² Nanku malu mabi kaena ne bua kutekesha kabidi mubidi wenu udi ufua, bua nuenu kuukumbajila bijingajinga biawu.

¹³ Kanufidi kabidi bidimba bishilangane bia mubidi wenu ku malu mabi, bu biamu bia mudimu bia kuenza nabi bidi Mvidi Mukulu ubenga. Kadi nudifile kudi Mvidi Mukulu, bu bantu bavua babike ku lufu, bapete muoyi. Nudifile muenu muonsu bua kumuenzela mudimu. Bidimba bienu bikale biamu bia mudimu bia kuenza nabi bidi Mvidi Mukulu musue.

¹⁴ Bualu malu mabi kaena mua kuikala ne bumfumu pambidi penu nansha. Kanuena ku bumfumu bua mikenji, kadi nudi ku bumfumu bua dinanga divua Mvidi Mukulu mutuleje.

Bapika ba malu mimpe

¹⁵ Kadi bualu ebu budi bishi? Tuye kuenza malu mabi, bualu katuena kabidi ku bumfumu bua mikenji, kadi amu bua dinanga divua Mvidi Mukulu mutuleje anyi? Nansha kakese!

¹⁶ Nudi bamanye bimpe ne: panudi nukuatshila kampanda mudimu, nudi numutumikila. Nanku nudi ne bua kuikala bapika ba mfumu unudi nutumikila awu. nKuamba ne: nansha nudi bapika ba malu mabi adi afikisha bantu ku lufu, nansha nudi bapika bua kutumikila Mvidi Mukulu, bua amone mua kunubingisha.

¹⁷ Kadi tutumbishayi Mvidi Mukulu: nuenu bavua kale bapika ba malu mabi, mpindiewu nudi bitabe ne muoyi wenu mujima malu malelela avuabu banulongeshe.

¹⁸ Bavua banupikule ku bubi. Nukadi bapika ba malu mimpe.

¹⁹ Ndi ngumvuija ne tshimfuanyi tshia bupika, musombele bantu bamba, bua numvue bimpe bindi ndongesha. Kale nuvua nufila bidimba bienu ne muoyi wenu mujima bua bikale bapika ba malu mabi ne ba buenzayi, bua nuenze nabi bidi Mvidi Mukulu ubenga. Momumue mpindiewu nubifile ne muoyi wenu, bua bikale bia tshijila, bua nuenze nabi bidi Mvidi Mukulu musue.

²⁰ Panuvua bapika ba bubi, kanuvua ku bupika bua malu mimpe nansha.

²¹ Kadi panuvua benze malu adi anufuisha bundu mpindiewu, tshinuvua bapete ntshinyi? Malu a nanku adi afikisha ku lufu!

²² Kadi lelu mbanupikule ku bubi. Nudi nukuatshila Mvidi Mukulu mudimu. Ke munudi bantu ba tshijila, badi benza bidi Mvidi Mukulu musue. Ku ndekelu nenupete muoyi wa tshiendelele.

²³ Bualu difutu didi bubi butufuta ke lufu. Kadi dipa didi Mvidi Mukulu utupesha patupu ku luse luende, ke muoyi wa kashidi, patudi tudisanga ne Mfumu wetu Yezu Kristu.