Rome 4 - MUKANDA WA MYIDI MUKULU

Tshilejilu tshia Abrahame

¹ Nanku netuambe bishi bua nkambua wetu Abrahame? Tshivuaye mupete ku bivuaye muenze ntshinyi?

² Bu Abrahame mubinge ku mesu kua Mvidi Mukulu bua bivuaye muenze, uvua mua kuditambisha. Kadi kena mua kuditambisha kumpala kua Mvidi Mukulu nansha.

³ Bualu Mukanda wa tshijila udi wamba ne: “Abrahame uvua mutekemene kudi Mvidi Mukulu. Ke Mvidi Mukulu kumulumbuluisha, kumubingisha amu bua ditaba diende.”

⁴ Muntu udi ukuata mudimu, badi bamufuta. Difutu adi kabena badibala bu tshintu tshimupa patupu nansha: ntshintu tshiende tshivuaye ne bua kupeta.

⁵ Kadi diba didi muntu kayi wenza bualu, utekemena amu kudi Mvidi Mukulu udi ufuila bantu babi luse. Mvidi Mukulu udi umubingisha bua ditaba diende adi.

⁶ Ke padi Davide umvuija disanka didi muntu upeta, padi Mvidi Mukulu umubingisha kabiyi bua midimu ivuaye mukuate, wamba ne:

⁷ “Bena diakalenga mbadi Mvidi Mukulu ufuila luse, badiye ujimijila mibi yabu!

⁸ Muena diakalenga mmuntu udi Mvidi Mukulu kayi utangila bu muena tshibawu!”

⁹ Amu bantu badibu bateke panshi ke badi ne diakalenga edi anyi? Nansha kakese! Badibu kabayi bateke panshi kabena nadi anyi? Tudi tufuma ku diamba ne: “Mvidi Mukulu uvua mubingishe Abrahame amu bua ditaba diende.”

¹⁰ Bine abi mbienzeke diba kayi? Divuabu bamane kumuteka panshi anyi divuabu kabayi banji kumuteka panshi? Ki ndivuabu bamane kumuteka panshi nansha, kadi kumpala!

¹¹ Kunyima kua matuku mavule bakateka Abrahame panshi, bua bikale bu tshimanyinu tshidi tshileja ne: Mvidi Mukulu mmumutue tshitampi, bualu mmumubingishe amu bua ditaba, pavuabu kabayi banji kumuteka panshi. Nenku Abrahame udi tatu wa bantu bonsu badi bitaba Mvidi Mukulu, nansha kabayi babateka panshi, kabidi badi Mvidi Mukulu ubingisha.

¹² Udi kabidi tatu wa badibu bateke panshi, kadi badi kabayi batekemena amu ku diteka panshi diabu adi. Badi balonda njila wa ditaba uvua Abrahame mulonde, nansha pavuabu kabayi banji kumuteka panshi.

Abrahame mmupete dilaya bua ditaba diende

¹³ Mvidi Mukulu uvua mulaye Abrahame ne ndelanganyi yende ne: nenupete buloba. Kavua mumulaye dilaya edi, bualu Abrahame uvua mukumbaje mikenji nansha, kadi amu bualu Mvidi Mukulu uvua mumubingishe bua ditaba divuaye nadi.

¹⁴ Pikala amu badi bakumbaja mikenji mua kupeta bilenga bivua Mvidi Mukulu mulaye, nanku ditaba kadiena ne mushinga to. Nansha dilaya mene dia Mvidi Mukulu didi patupu.

¹⁵ Bualu mikenji idi ijudija Mvidi Mukulu tshiji. Kadi muaba udi kauyi mikenji, dibenga kuitaba mikenji kadienaku to.

¹⁶ Nanku Abrahame uvua mupete dilaya amu bua ditaba, bua dikale dipa didi Mvidi Mukulu upa tshianana. Ke padi dilaya edi ne mushinga mu ndelanganyi yonsu ya Abrahame, kadiyi amu bua badi bakumbaja mikenji, kadi kabidi bua badi bitaba Mvidi Mukulu mushindu uvua Abrahame mumuitabe. Abrahame udi tatu wetu bonsu,

¹⁷ mudi Mukanda wa tshijila wamba ne: “Meme kukuenza nkambua wa bisamba bivule.” Udi tatu wetu kumpala kua Mvidi Mukulu uvuaye muitabe. Ke Mvidi Mukulu udi ubisha bantu ku lufu; udi ushindika bidi kabiyiku bua bikaleku.

¹⁸ Abrahame uvua muitabe, mutekemene kabidi bivuaye kayi mua kutekemena. Ke yeye kuenza “nkambua wa bisamba bi-vule,” bilondeshile bivua Mvidi Mukulu mumuambile ne: “Ndelanganyi yebe neyikale bungi bua momumue ne mitotu.”

¹⁹ Ukavua ne bidimu bu lukama. Kadi uvua amu muitabe bikole, kayi uteketa, nansha diba di vuaye wela meji ku mubidi wende ukavua bu tshitalu, ne kudi Sara, muena kuende, uvua kayi mua kupeta muana.

²⁰ Kavua ujimija njila wa ditaba, kavua wela mpata ku bivua Mvidi Mukulu mumulaye nansha. Kadi ditaba diende divua dimukolesha ku muoyi. Ke yeye kutumbisha Mvidi Mukulu.

²¹ Uvua mujadike menemene ne: Mvidi Mukulu udi ne bukole bua kukumbaja bivuaye mulaye.

²² Ke pavua “Mvidi Mukulu mubingishe Abrahame” amu bua ditaba diende.

²³ Kadi miaku idibu bafunde ne: “Uvua mubingishe Abrahame,” kabena bayifunde amu bua Abrahame nkayende nansha.

²⁴ Bavua bayifunde kabidi ne buetu tuetu, badi Mvidi Mukulu ne bua kuhingisha, bualu tudi tuitaba uvua mubishe Yezu Mfumu wetu ku lufu, mumupingajile muoyi.

²⁵ Bayua bamufundile tshibawu tshia lufu bua mibi yetu. Bavua bamupingajile muoyi bua kutubingisha ku mesu kua Mvidi Mukulu.