Rome 3 - MUKANDA WA MYIDI MUKULU

¹ Nanku muena Yuda utshidi mupite bakuabu ku tshinyi? Kuteka muntu panshi kutshidi ne mushinga anyi?

² Mushinga wa bionsu abi mmunene. Bangabanga bualu Mvidi Mukulu uvua mudianze kumanyisha bena Yuda miaku yende.

³ Kadi tudi mua kuamba tshinyi, padi bamue ba kudibu kabayi bakumbaja bivuabu bamulaye? Mvidi Mukulu neabenge kukumbaja bivuaye mubalaye, bualu bobu kabena babikumbaje anyi?

⁴ Nansha kakese! Nansha bantu bonsu bikale bena dishima, Mvidi Mukulu udi ne bua kuikala muena diyi dimue. Ke mudi Mukanda wa tshijila wamba ne: “Badi ne bua kumanya muudi ukumbaja biudi wamba, muudi ubinga padibu bakeba kukulumbuluisha.”

⁵ Kadi padi malu mabi atudi tuenza aleja mudi Mvidi Mukulu ubinga, tudi mua kuamba tshinyi? Nanku Mvidi Mukulu udi upila padiye utunyoka anyi? (Ndi ngakula mudi bantu bakula.)

⁶ Kabiena nanku nansha! Bualu bu Mvidi Mukulu mua kupila, mmunyi mudiye mua kulumbuluisha bukua panu?

⁷ Kadi padi dishima dianyi dileja patoke menemene bulelela bua Mvidi Mukulu, dilengelela nanku butumbi buende, mudibu ne bua kumpisha kabidi bu muntu udi wenza bibi mbishi?

⁸ Nanku diba adi katuena mua kuamba ne: “Tuenze malu mabi, bua bubi butupeteshe malu mimpe” anyi? Bualu bamue bantu bua kunjana, badi bansonguela, bamba ne: Polu udi ulongesha malu a nanku. Bantu aba Mvidi Mukulu neabanyoke dinyoka dibakumbanyina!

Kakuena muntu udi mua kubinga

⁹ Kadi bualu ebu budi bishi? Tuetu bena Yuda tudi bapite bantu bakuabu anyi? Nansha kakese! Nkadi mumane kumvuija ne: bantu bonsu, ne bena Yuda, ne bantu ba bisamba bikuabu, badi ku bumfumu bua bubi.

¹⁰ Mukanda wa tshijila udi ujadika ne: “Kakuena muntu udi wenza tshidi Mvidi Mukulu musue,

¹¹ kakuena muntu udi umvua bualu, kakuena nansha umue udi ukeba Mvidi Mukulu.

¹² Bonsu mbapambuke mu njila muimpe, bonsu pamue mbashiye njila mululame. Kakuena udi wenza malu mimpe, kakuena nansha umue.

¹³ Mukana muabu mudi bu lukita lumbula lushala buashi, ludimi luabu ludi lubambuluisha bua kushima, miaku idi ipatukila ku mishiku yabu idi bu lulengu lua nyoka.

¹⁴ Mukana muabu mmuwule ne mitshipu, kabidi ne miaku mibi.

¹⁵ Badi banyema lukasa bua kushipa bantu.

¹⁶ Miaba yonsu idibu baya, badi babutula bantu, babashiya mu dikenga.

¹⁷ Kabena bamanye njila wa bupole.

¹⁸ Badi basomba, kabayi batshina Mvidi Mukulu.”

¹⁹ Tudi bamanye ne: bionsu bidi mikenji itela, idi ibiambila bantu badi ku bumfumu bua mikenji, bua bantu kabapetshi mushindu wa kudibingisha, kabidi bua bantu bonsu ba pa buloba bamueneke ne tshilumbu ku mesu kua Mvidi Mukulu.

²⁰ Kakuena muntu udi mua kubinga ku mesu kua Mvidi Mukulu, bualu muntu nansha umue kena ukumbaja bidi mikenji yamba. Mikenji idi yambuluisha amu bantu bua bamanye muyuabu benze malu mabi.

Mudi Mvidi Mukulu usungidila bantu

²¹ Kadi lelu, Mvidi Mukulu mmutuleje mudiye utubingisha kumpala kuende, kabiyi bua dikumbaja dia mikenji. Mikenji ne bambi bivua bimane kujadika ne:

²² Mvidi Mukulu udi ubingisha bantu kumpala kuende amu bua ditaba diabu mu Yezu Kristu. Bonsu badi bitaba Yezu Kristu, udi ubenzela nanku, bualu bonsu badi mushindu umue.

²³ Bonsu mbenze malu mabi. Bonsu mbabule butumbi bua Mvidi Mukulu.

²⁴ Kadi bu mudi Mvidi Mukulu ubananga, udi ubabingisha kumpala kuende patupu, kudi Yezu Kristu udi ubapikula ku bubi.

²⁵ Mvidi Mukulu uvua mufile Yezu Kristu bu mulambu, bua bantu badi bamuitaba bapete dijimija dia mibi ku lufu luende. Ke muvua Mvidi Mukulu musue kuleja mudiye ubinga: kale uvua ulama lutulu, kayi unyoka bantu bua malu abu mabi.

²⁶ Kadi mu tshikondu tshia mpindiewu, udi uleja mushindu udiye ubingisha bantu ku mesu kuende. Bualu Yeye mene udi musue kubinga, kabidi udi musue kuhingisha bonsu badi bitaba Yezu Kristu.

²⁷ Nanku kutshidi tshintu tshidi bantu mua kuditemba natshi anyi? Nansha kakese! Katshienaku nansha tshimue. Katshienaku bua tshinyi? Badi mua kuditemba bua mikenji idi ibafundila mudimu wa kuenza anyi? Nansha kakese! Amu mikenji idi ibafikishaku ditaba ke idi ne bualu.

²⁸ Bualu tudi tuitaba ne: Mvidi Mukulu udi ubingisha muntu bualu bua ditaba diende, ki mbua padiye ukumbaja mikenji nansha.

²⁹ Tudi mua kuamba ne: Mvidi Mukulu udi amu wa bena Yuda nkayabu anyi? Kena Mvidi Mukulu wa bantu ba bisamba bikuabu kabidi anyi? Bushuwa, udi kabidi Mvidi Mukulu wa bantu ba bisamba bikuabu,

³⁰ bualu Mvidi Mukulu udi amu umuepele. Neabingishe bena Yuda amu ku ditaba, ne bantu ba bisamba bikuabu kabidi amu ku ditaba.

³¹ Nanku bualu bua ditaba tudi tunyanga mushinga wonsu wa mikenji anyi? Nansha kakese! Ke mutudi tuangata mikenji ne mushinga wayi menemene.