Rome 2 - MUKANDA WA MYIDI MUKULU

Tshilumbuluilu tshia Mvidi Mukulu

¹ Nanku wewe udi ulumbuluisha bakuabu, kuena mubinge, nansha wewe nnganyi ne nnganyi. Bualu paudi ulumbuluisha bakuabu, wenza kabidi malu adibu benza, udi udipisha wewe nkayebe.

² Tudi bamanye ne: Mvidi Mukulu udi upisha amu pa bualu bantu badi benza malu a nanku.

³ Wewe udi ulumbuluisha badi benza malu a nanku, wenza kabidi a momumue, udi wela meji ne: neupanduke ku tshilumbuluilu tshia Mvidi Mukulu anyi?

⁴ Udi upepeja dinanga dikole didi Mvidi Mukulu utuleja, lutulu luende, kabidi ne muoyi wende wa kalolu anyi? Kuena mumanye ne: dinanga didi Mvidi Mukulu ukuleja didi ne bua kukusaka bua udilengeje anyi?

⁵ Kadi udi ne muoyi mupape. Kuena musue kudilengeja. Ke muudi udikebela dinyoka dipite bunene, dituku diamueneka tshiji tshia Mvidi Mukulu, diakosaye nsambu pa yoyi.

⁶ Dituku adi Mvidi Mukulu neafute muntu yonsu bilondeshile bivuaye muenze.

⁷ Bavua bananukila mu dienza dia malu mimpe ke bavua bakeba butumbi, lumu, ne bidi kabiyi bifua. Neabapeshe muoyi wa tshiendelele.

⁸ Kadi bavua bamutombokela, babenga bulelela, badifila ku malu mabi, neabaleje tshiji tshiende ne kanyinganyinga kende.

⁹ Makenga ne ntatu nebikuate bonsu badi benza bibi, bangabanga bena Yuda, pashishe bantu ba bisamba bikuabu kabidi.

¹⁰ Kadi bonsu badi benza bimpe, Mvidi Mukulu neabapeshe butumbi, lumu ne bupole, bangabanga bena Yuda, pashishe bantu ba bisamba bikuabu kabidi.

¹¹ Bualu Mvidi Mukulu kena ne kansungasunga kudi bantu.

¹² Bonsu badi benza malu mabi, kabayi bamanye mikenji ya Moshe, nebafue, kabayi bapila ku mikenji. Kadi bonsu badi benza malu mabi, bamanye mikenji, nebabalumbuluishe bilondeshile mikenji.

¹³ Bualu bantu badi basankisha Mvidi Mukulu ki mbadi bateleja mikenji patupu, kadi amu badi batumikila bidiyi ibafundila.

¹⁴ Padi bantu ba bisamba bikuabu, badi kabayi bamanye mikenji ya bena Yuda, batumikila bobu nkayabu bidi mikenji ifunda, badi badielela mikenji nkayabu, nansha bobu kabayi ne mikenji.

¹⁵ Badi baleja mudi malu adi mikenji yamba mafunde mu mioyi yabu. Kondu kabu ka munda kabidi kadi kabamanyisha nanku. Meji adibu bela adi abaleja misangu idibu benza bimpe, ne misangu idibu benza bibi.

¹⁶ Lumu lua Disanka lundi ndongesha ludi luamba ne: dituku diakosa Mvidi Mukulu nsambu kudi Yezu Kristu, bionsu bidi bisokome mu mioyi ya bantu abi nebimueneke patoke.

Bena Yuda ne mikenji

¹⁷ Kadi wewe udi witaba ne: ndi muena Yuda. Udi ushindamena pa mikenji, uditemba bualu bua Mvidi Mukulu webe.

¹⁸ Udi mumanye bidi Mvidi Mukulu musue. Mikenji ivua mikulongeshe muudi mua kusunguluja tshidi tshimpe.

¹⁹ Udi udiumvua muudi mulombodi wa bampofu, muudi butoke bua badi mu miidima,

²⁰ muudi muludiki wa badi kabayi bamanye malu, mulongeshi wa bana. Bualu udi mujadike ne: pandi mumanye mikenji ya Mvidi Mukulu, ndi mumanye malu onsu anu mudiwu mu bulelela.

²¹ Kadi wewe udi ulongesha bakuabu, kuena udilongesha wewe mene bua tshinyi? Udi ulongesha bakuabu ne: kanuena mua kuiba. Kadi wewe mene udi wiba bua tshinyi?

²² Udi wamba ne: kanuena mua kuenda buendenda. Kadi wewe udi wenda buendenda bua tshinyi? Udi upepeja nwidie, kadi udi wiba bidi mu nzubu ya nwidie bualu kaayi?

²³ Udi uditambisha, bualu udi mumanye mikenji. Kadi kuena unemeka Mvidi Mukulu, paudi wenza bidi mikenji ibenga!

²⁴ Bualu Mikanda ya tshijila idi yamba ne: “Buenu nuenu bena Yuda, ke budibu bampendela kudi bantu ba bisamba bikuabu.

²⁵ Paudi utumikila mikenji, dikuteka panshi nedikuambuluishe. Kadi paudi kuyi utumikila mikenji, udi amu bu muntu udibu kabayi bateke panshi.

²⁶ Pikala muntu uvuabu kabayi bateke panshi, utumikila mikenji, Mvidi Mukulu kena mua kumulumbuluisha bu muntu uvuabu bateke panshi anyi?

²⁷ Muntu udibu kabayi bateke panshi mu mubidi wende, kadi udi ukumbaja mikenji, neakulumbuluishe wewe udi kuyi ukumbaja mikenji, nansha wewe mumanye mikenji ivuabu bafunde, nansha bamane kukuteka panshi mene.

²⁸ Bualu muena Yuda wa menemene, ki mmuntu udi umueneka amu bu muena Yuda nansha; ki ngudibu bateke panshi mu mubidi wende, amu mushindu udi bantu mua kumona to.

²⁹ Kadi muena Yuda mulelela ke udi muena Yuda mundamunda muende, ke udibu bateke panshi mu muoyi wende. Mbamuteke nanku kudi Mueyelu wa Mvidi Mukulu, kabiyi bilondeshile mikenji mifunda nansha. Muena Yuda wa bushiwa awu neapete lumu luende kudi Mvidi Mukulu, ki nkudi bantu to.