Osheya 9 - MUKANDA WA MYIDI MUKULU

Bena Izrayele kabakushala ne kantu

¹ Nuenu bena Izrayele, kanuena mua kuenza tshibilu, nansha kusanka, mudi bisamba bikuabu bienza. Bualu nudi balekela Mvidi Mukulu wenu, nutendelela mvidie ya patupu. Miaba yonsu idibu bashipule ntete ya bukula, nudi nukeba difutu dia ku buenzavi buenu.

² Kadi ntete ya bukula idibu bashipula, ne mafuta adibu bakama, kanuakubiangata to. Maluvu a mvinyo mapiamapia anudi batekemene, nenumvue anu mupuya wawu.

³ Bena Efrayime kabena mua kushala mu ditunga dia Maweja-Nangila. Nebapingane mu Ejipitu, nansha mu bena Ashure, bua kudia biakudia bidi ne mikiya.

⁴ Bena Efrayime kabena mua kulambula kabidi mulambu wa maluvu, mu dina dia Maweja-Nangila. Kabena mua kumulambula milambu bua kumusankisha. Biakudia bia bena Efrayime, nebikale anu bu mampa adibu badia mu madilu. Muntu yonsu udi ubidia udi upia mikiya. Mampa a bena Efrayime, neajikije anu nzala yabu. Kadi, kabena mua kubuela nawu mu nzubu wa Maweja-Nangila to.

⁵ Nenuenze tshinyi bua kulongolola tshibilu tshia dituku dia Maweja-Nangila?

⁶ Panuanyema mu ditunga dienu, didibu bamane kunyangakaja, bena Ejipitu nebanuakidile. Kadi, amu bua kunuteka mu nkita ya mu tshimenga tshia Memfise. Mionji ya mpese neibuikile tshiamu tshienu tshitoke tshia mushinga mukole. Meba ne mingonga nebitoloke mu nzubu yenu.

⁷ Tshikondu tshiakumbanyi, tshidi Maweja-Nangila ubutula bena Izrayele. Eyowa, tshikondu tshiakumbanyi, tshia kunyoka bena buenzayi. Bena Izrayele bavuluke bualu ebu. Nudi nuamba ne: “Muambi mmupale”, kabidi ne: “Muntu wa tshijila mmupote.” — Bidi nanku, kadi anu bua buenzayi buenu bupite bungi, ne bua lukinu lunudi numutekela.

⁸ Muambi, nsentedi wa bena Efrayime, Mvidi Mukulu udi nende. Kadi, badi bamuteya, miaba yonsu idiye upitshila. Mu ditunga dia Mvidi Mukulu wende, muambi udi amu umona bena lukuna.

⁹ Nudi benza buenzayi bapitshishe, anu bu munuvua benze ku Ngibeya. Kadi, Maweja-Nangila kena mupue buenzayi buenu muoyi, neanunyoke bua malu mabi anuvua benze.

Bena Izrayele badi banyingalaja Maweja-Nangila

¹⁰ Maweja-Nangila kuamba ne: Kale pamvua musangane bena Izrayele, bivua bu tumuma tua mvinyo, tudi muntu upeta mu tshipela. Mvua mumone bankambua benu, bu tshimuma tshia tshianyi, tshidibu bapeta ku mutshi wa mfiku. Kadi batshifikilaku ku Bete-Peyore kudifilabu kudi Baale-wa-bundu. Kushalabu bantu babi, bafuanangane ne Baale, munanga wabu mupiamupia.

¹¹ Lumu lua bena Efrayime nelujimine, bu mudi nyunyi ya mishamisha ibuka, ijimina. Kabena mua kulela bana, kabena mua kuenda ne difu munda, kabena nansha mua kuimita.

¹² Nansha bobu bakolesha bana, nembumushe panu, kabayi banji kufika ku bantu. Pangikala mumane kubenga bena Efrayime, nebashale bena diakabi!

¹³ Bena Efrayime bavua bu mitshi ya mabue, mikuna mu buloba buimpe. Kadi lelu bakadi bafila bana bavuabu balela, kudi bashipianganyi.

¹⁴ — Maweja-Nangila paudi musue kunyoka bena Efrayime, neubanyoke mushindu kaayi? Bakaji babu bikale ba nkumba, kabayi mua kuamusha bana.

¹⁵ — Maweja-Nangila kuamba kabidi ne: Tshikisu tshia bena Efrayime, tshivua tshimane kumueneka ku Ngilgale. Ke mumvua mutuadijile kubabenga. Nembipate ku nzubu kuanyi, bua buenzayi buabu. Tshiena mbananga kabidi to. Bualu bamfumu babu bonsu badi anu bantombokela.

¹⁶ Bena Efrayime mbamane kupeta dikenga. Badi bu miji idi yuma, bu mutshi udi kauyi ukuama bimuma. Nansha bakaji babu balela bana, nengumushe bana abu, badibu bananga, mu buloba.

¹⁷ — Mvidi Mukulu wanyi, kena munange kabidi bena Efrayime to, bualu kabena bamuteleja. Nebikale balalakanyi munkatshi mua bisamba bikuabu.