Osheya 5 - MUKANDA WA MYIDI MUKULU

Mvidi Mukulu udi utandisha bamfumu

¹ Telejayi bimpe, nuenu batuangaji, nuenu kabidi bamfumu ba bena Izrayele, ne nuenu bonsu badi basombe mu lubanza lua mukalenga, nuenu ke bavua mua kulumbuluisha bantu bimpe. Kadi, ku Mispa nuvua bateye bantu banyi. Ku mukuna wa Tabore, nuvua nubamuenekela bu bukondu bumana kuela.

² Kadi ku Shitime, nuvua nubamuenekela bu dijimba dile. Nanku, Maweja-Nangila udi unuambila ne: “Nennunyoke bonsu.

³ Ndi mumanye bena Efrayime. Ndi mumanye bionsu bidi bena Izrayele benza. Nuenu bena Izrayele ke badi baleja bena Efrayime mua kuenda tshiendenda. Mpindiewu, bena Izrayele bonsu badi anu bena tshiendenda.”

⁴ Buenzayi bua bena Izrayele mbupite. Nanku kabena mua kupingana kabidi kudi Mvidi Mukulu wabu to. Meji a bena Izrayele, adi anu ku tshiendenda. Kabena bamanye Maweja-Nangila.

⁵ Ditambisha dia bena Izrayele ke didi dibapisha. Bubi bua bena Efrayime ne bena Izrayele budi bubabutula. Bena Yuda badi balonda bibidilu biabu bibi.

⁶ Badi baya ne ngombe ne mikoku, bua kuyilambula Maweja-Nangila. Badi bakeba Maweja-Nangila, kadi kabakumusangana to. Bualu mmumane kubabenga.

⁷ mBabenge Maweja-Nangila, mbalele bana ba mu tshiendenda. Mpindiewu, kakuakukumbana nansha ngondu umue to: nembabutule, ne bionsu bidibu nabi.

Bena Efrayime ne bena Yuda badi baluangana

⁸ Mu Ngibeya, elayi mpungi ya mvita. Mu Rama, elayi mpungi kabidi. Mu Betele-Awene, elayi lubila: bantu bambule bia mvita. Nuenu bena tshisamba tshia Binyamine, dimukayi, nudi mu njiwu!

⁹ Dituku dia kunyoka bantu, bena Efrayime nebabutuke bonsu, ditunga diabu nedishale anu tshipela. Bionsu bindi mmanyisha bena Izrayele, nebienzeke, kamuyi mpata.

¹⁰ Bamfumu ba bena Yuda, mbafuanangane ne bantu badi bashintulula mikalu ya madimi abu. Nanku tshiji tshianyi netshibapuekele bu mvula wa tshipupu.

¹¹ Nebakengeshe bena Efrayime bikole, nebajimije ne buloba buvua buabu, bualu mbaye kukeba diambuluisha, kudi bantu badi kabayi ne tshia kuenza.

¹² Mpindiewu, meme Maweja-Nangila ndi bu tshiuja ne tufina kudi bena Efrayime. Ndi bu mputa mubole wa lubangu kudi bena Yuda.

¹³ Bena Efrayime mbamane kumanya disama divuabu nadi. Bena Yuda mbamane kumanya dikenga diabu dipite bunene. Ke bena Efrayime kuya ku Ashure. Kutuminabu mukalenga munene mikenji. Kadi mukalenga ewu kena ne mushindu wa kujikija dikenga diabu, kena mua kuondapa mputa yabu.

¹⁴ Bualu meme Maweja-Nangila ndi nduisha bena Efrayime, bu mudi nyama wa ntambue. Ndi nduisha bena Yuda, bu mudi nyama wa tshikisu. Anu meme, meme nkayanyi, ke udi ubasunsula. Ndi ngambula minyinyi yabu. Kakuena udi mua kunnyenga minyinyi ayi to.

Bena Efrayime nebapingane kudi Mvidi Mukulu anyi?

¹⁵ Maweja-Nangila udi wamba ne: Eyowa, nempingane kuanyi, too ne ku diba didi bena Efrayime ne bena Yuda, batonda bubi buabu, bapingana kundi. Amu dikenga nedibalongeshe mua kunkeba, kupingana kundi.