Osheya 3 - MUKANDA WA MYIDI MUKULU

Bena Izrayele nebadilengeje

¹ Maweja-Nangila kungambila ne: “Mpindiewu, uye kunanga kabidi mukaji awu muena tshiendenda, udi mukutombokele, wenda ne balume bakuabu. Unange mukaji awu, anu bu mundi meme Maweja-Nangila munange bena Izrayele, nansha bobu batendelela mvidie mikuabu, bananga mikata mienza ne tumuma tua mvinyo.”

² Nanku, meme kuangata mukajanyi tshiakabidi, ku nkanu dikumi ne itanu ya tshiamu tshitoke tshia mushinga mukole, ne ku litre 600 ya ntete ya orje.

³ Meme kuambila mukajanyi ne: “Ushale nanyi muaba ewu, kuyi wenda tshiendenda, kuyi unanga mulume mukuabu. Meme kabidi tshiakukubuelela mu nzubu to.”

⁴ Nanku, bena Izrayele nebashale matuku a bungi kabayi ne mukalenga, kabayi ne bamfumu, kabayi ne milambu, nansha makunji a tshijila, kabayi kabidi ne binta bionsu bidi biambuluisha bua kumanya disua dia Mvidi Mukulu.

⁵ Pashishe, bena Izrayele nebapingane kudi Maweja-Nangila. Nebapingane kudi Mvidi Mukulu wabu, ne kudi mukalenga wabu wa ku ndelanganyi ya Davide. Matuku atshidi kumpala, bena Izrayele nebakebe Maweja-Nangila, nebamunemeke, nebatekemene bintu amu kudiye.