Osheya 12 - MUKANDA WA MYIDI MUKULU

Mvidi Mukulu udi ubela bena Izrayele ne bena Yuda

¹ Maweja-Nangila udi wamba ne: Bena Efrayime badi bandinga, banshima nseke yonsu. Bena Yuda kabidi batshidi amu bantombokela, meme Mvidi Mukulu wabu wa tshijila.

² Bena Efrayime badi benza malu a tshianana, bu bantu badi bipata lupepele, bakeba kulukuata. Matuku onsu badi bipata lupepele lua luya, bashimangana, bakengeshangana. Badi batua ndondu ne bena Ashure, bafila mafuta abu mimpe kudi bena Ejipitu.

³ Maweja-Nangila udi tshilumbu ne bena Yuda. Neanyoke bena Yakobe, bua buenzayi buabu. Neabafute bua malu mabi avuabu benze.

⁴ Patshivua Yakobe mu difu dia mamuende, ukavua udinga muanabu. Yakobe mumane kukola, kuluishaye Mvidi Mukulu.

⁵ Kuluishaye mutumibue wa Mvidi Mukulu, kumutshimunaye. Yakobe kudila, kumulomba bua amuele lupemba. Ku Betele, Yakobe kusambakena ne Mvidi Mukulu, Mvidi Mukulu kuyukila nende.

⁶ Yeye ke Mvidi Mukulu wa bukole buonsu, udibu binyika ne: “Maweja-Nangila”.

⁷ Kuambilaye Yakobe ne: “Udi ne bua kupingana kuenu. Meme Mvidi Mukulu webe nenkuambuluishe. Enza malu mimpe, ukumbaje bindi musue. Wikale mutekemene anu kundi meme Mvidi Mukulu webe.”

⁸ Maweja-Nangila udi wamba ne: Nuenu bena Efrayime, nudi bafuanangane ne bena Kenaane. Bualu nudi ne tshipimu tshia dishima ku bianza. Bua kupeta bintu, nudi nudinga bantu.

⁹ Nudi nuamba ne: “Bulelela, tudi babanji. Tudi bamane kupeta biuma bia bungi. Patudi tupeta makasa a ku mushinga, katuena benza bibi!”

¹⁰ Meme Maweja-Nangila, ndi Mvidi Mukulu wenu, biangatshile mu Ejipitu. Ndi musue nusombe tshiakabidi mu ntenta, bu tshikondu tshimvua basambakene nenu mu tshipela.

¹¹ Tshikondu atshi, mvua mumanyishe bambi meji anyi. Mvua mubaleje malu mishindu mishilangane. Kudi bambi ke kundi nnumanyishila, nansha lelu mene, bindi musue kuenza.

¹² Bena Ngilaade, mbena buenzayi ba kalanda-musenga. Nebabutuke bonsu. Muaba wa tshijila wa ku Ngilgale, bavua balambula ngombe milume. Kadi, bilambuilu biabu, nebishale amu mishiki ya mabue mu madimi.

¹³ Yakobe kunyema, kuyaye ku Mezopotamiya. Kutuadijaye kuenzela muntu mukuabu mudimu, anu bua kupeta mukaji. Eyowa, Yakobe kudienza mulami wa bimuna, anu bua kupeta mukaji.

¹⁴ Kadi Maweja-Nangila uvua mupatule bena Izrayele mu Ejipitu, ku mudimu wa muambi. Muambi awu, ke uvuaye mutume, bua ikale mulami wa tshisamba tshiende tshia bena Izrayele.

¹⁵ Bena Efrayime, mbafikishe Maweja-Nangila munda bikole. Kadi neabapingajile malu mabi, avuabu benzele bakuabu. Neabanyoke bikole, bua bundu buvuabu bamufuishe.