Osheya 10 - MUKANDA WA MYIDI MUKULU

Bukalenga nebunyanguke

¹ Bena Izrayele mbafuanangane ne mionji ya mvinyo idi isampila, ikuama tumuma tua bungi. Kadi, pavuabu bavulangana, bavua bavudija kabidi bilambuilu. Pavua ditunga dipeta bubanji, ke pavuabu bavudija mabue a tshijila.

² Bena Izrayele mbanyanguke too ne mu muoyi wa munda. Mpindiewu nebakenge bua buenzayi buabu. Maweja-Nangila neanyangakaje bilambuilu biabu, neashimbule mabue a tshijila.

³ Eyowa, mpindiewu bena Izrayele nebambe ne: “Katutshiena ne mukalenga, bualu katuvua banemeke bumfumu bua Maweja-Nangila. Kadi, mushindu utudi mpindiewu, mukalenga neatuenzele tshinyi?”

⁴ Bena Izrayele badi bakula amu kuakula; badi baditshipa mitshipu ya mashimi, batua ndondu. Kadi dikosa diabu dia nsambu, didi bu bisosa bibi bia lulengu, bitoloka mu budimi budibu bamane kusekuna.

⁵ Bena Samariya badi batendelela mvidie wa kana ka ngombe ka mpawungi kadi ku Betele-Awene. Batendeledi ba mvidie awu, ne bantu badi badiamba ne: tudi batuangaji, badi benza madilu manene kumpala kuende. Bantu abu badi batumbisha mvidie awu, kadi butumbi buende bumane kujimina.

⁶ Bualu mvidie awu, nebaye nende ku Ashure, bu mulambu wa kulambula mukalenga munene. Bena Efrayime nebikale ne bundu. Bena Izrayele nebanyingalale, bua pavuabu basungule bua kuya mu Ashure.

⁷ Malu onsu a bena Samariya neajike. Mukalenga wabu neapueke, bu katupa ka mutshi kalelama pa mayi.

⁸ Miaba yonsu ya tshijila, ivua bena Izrayele benza malu mabi, mminyanguke. Tshisuku ne meba a mingonga mbibuikile bilambuilu biabu. Musangu awu, nebambile mikuna minene ne mikese ne: “Nutubuikile! Nutupukile.”

Kabukebakeba nkabumonamona

⁹ Maweja-Nangila udi wamba ne: Nuenu bena Izrayele, bituadije ku Ngibeya, kunuvua benze amu malu mabi, buenzayi buenu kabuena bujika to. Nanku, ki mbimpe kuluisha bantu babi abu, too ne ku Ngibeya anyi?

¹⁰ Meme Maweja-Nangila ndi mufike bua kubanyoka. Bisamba bikuabu nebisangidile bena Izrayele, bua kubaluisha bua malu mabi, adibu benza misangu ne misangu.

¹¹ Bena Efrayime, mbafuanangane ne kana ka ngombe, kavuabu balongeshe bimpe, kasua kuenza mudimu wa kushipula ntete ya kuenza bukula. Kadi, bu mumvua mumone ne: nshingu ya bena Efrayime idi ne bukole bua bungi, mvua musue bua bikale bakoka ditempu dia kudima nadi, bena Yuda benda basekuna, bena Izrayele benda balandakaja.

¹² Nuenu benza malu mimpe, nebanuenzelewu. Nudime budimi bupiabupia. Tshikondu tshiakumbanyi tshia nuenu kupingana kundi meme Maweja-Nangila, too nepangafika bua kunusungidila.

¹³ Kadi, nuenu bena Izrayele, nuvua benze malu mabi. Ke munuvua bapete malu mabi. Nuvua nukinangana, ke munuvua bapete lukinu. Nuenu bena Izrayele, nuvua batekemene matempu enu a mvita, ne bena myita ba bungi banudi nabu.

¹⁴ Nanku, diyoyi dia mvita, nediumvuike munkatshi muenu. Bimenga bienu bionsu, bivuabu bakoleshe ne bimana, nebabiupule, anu muvua mukalenga Shalmane mupule Bete-Arbele, muzaze bamamu musangu umue ne bana bavuabu balele.

¹⁵ Nuenu bena Izrayele, ke muanukengesha Maweja-Nangila nanku, bua tshikisu tshinuvua natshi. Dinda dionsu, anu myita ituadija, mukalenga wa bena Izrayele neafue.