Nsumuinu 9 - MUKANDA WA MYIDI MUKULU

Meji adi akubikila

¹ Meji uvua musonge makunji muanda mutekete bua kuasa nawu nzubu wende.

² Uvua mushipeshe nyama wa tshibilu. Mmusambakaje maluvu ne mitshi ya minangu, mulongolole mesa bua kudiila.

³ Meji kutuma bakaji bena mudimu bende, bua baye mu bisalu, babikila bantu, bela diyi ne:

⁴ “Nuenu batshimbakane, semenayi pabuipi.” Meji kumanyisha badi kabayi lungenyi ne:

⁵ “Luakunuayi, nudie ku mesa anyi, nunue maluvu andi munuenzele.

⁶ Umbukayi padi batshimbakane, nenupete muoyi. Londayi njila wa lungenyi.”

Muntu muena meji ne muntu muena ditambisha

⁷ Paudi ubela muena ditambisha, udi ukupetula; paudi ukanyina muntu mubi, udi ukupenda.

⁸ Kutandishi muena ditambisha, bualu neakukine. Kadi utandi-she muena meji, yeye neakunange.

⁹ Tshiudi wambila muena meji, tshidi tshivudija meji ende. Tshiudi ulongesha muntu muakane, tshidi tshidiundisha dimanya diende.

¹⁰ Muntu udi musue kupeta meji, anemeke Maweja-Nangila. Kulamata Mvidi Mukulu wa tshijila, kudi kupetesha muntu lungenyi.

¹¹ Meme, Meji, nemvudije matuku ebe. Neulale panu matuku mulongulongu.

¹² Pawikala muena meji, wewe mene neusanke. Kadi pawikala muena ditambisha, wewe nkayebe neudipeteshe dikenga.

Matshimbu adi idikija Meji

¹³ Matshimbu udi bu mukaji muena mutoyi, bu muntu mutshimbakane mupange malu.

¹⁴ Udi usomba kumpala kua nzubu wende, nansha pa nkuasa mu bisalu bia mu tshimenga.

¹⁵ Udi ubikila bantu badi bapitshila mu bisalu amu, baya kuabu kuyayabu, wamba ne:

¹⁶ “Nuenu, batshimbakane, semenayi apa!” Udi wambila badi kabayi ne lungenyi ne:

¹⁷ “Mayi anudi nuiba ke adi atalaja nyota! Tshiakudia tshidi muntu udia mu musokoku ke tshidi tshimpe.”

¹⁸ Kadi bantu badi balonda matshimbu kabena bamanye ne: tudi bisangila ku mesa awu ne bafue. Bantu bavua babuele nende mu nzubu, mbamane kuya muaba udi lufu.