Nsumuinu 5 - MUKANDA WA MYIDI MUKULU

Udimukile mukaji muena tshiendenda

¹ Muananyi, uteleje bimpe mibelu yanyi idi ne meji ne lungenyi tente.

² Nenku wewe mulame mibelu yanyi, newakule anu pa biudi mumanye.

³ Miaku ya mukaji muena buendenda idi bu buitshi. Mukana muende mmupite mafuta ku busenu.

⁴ Kadi ku ndekelu kua bionsu, mukaji ewu udi ne bululu bu bua nkonga bululu. Udi utapa mputa minene bu mudi muele wa nkanza.

⁵ Malu adiye wenza neakufikishe ku lufu. Njila udiye ulonda udi uya buludi ne ku bafue.

⁶ Pa mutu pa kulonda njila wa muoyi, udi upambuka, kayi nansha mumanye kuyayaye to.

⁷ Nanku, muananyi, unteleje, ulonde mibelu yanyi.

⁸ Umbuka kudi mukaji wa mushindu ewu. Kusemenyi nansha pamue ne mushiku wa nzubu wende to.

⁹ Tshianana neujimije lumu luebe luuvua nalu. Bayende, bua tshiji tshikalaye natshi, neakunyenge bionsu biudi nabi.

¹⁰ Bantu bakuabu nebadie bintu biuvua mupete ku mudimu webe. Neasankishe amu bantu bakuabu.

¹¹ Neupunge ne lufu, utua mikemu, unyana, ushale anu mifuba pa mifuba nkayayi.

¹² Newambe ne: “Eyi, mvua mubenge bivuabu bangambila. Tshivua muanyishe muvuabu bambela.

¹³ Tshivua muteleje diyi dia balongeshi banyi. Mvua mubenge kubateleja pavuabu bambela.

¹⁴ Kadi monayi, nkadi pa kupeta lumu lubi mushindu undi tshiyi mua kumueneka kabidi ku mesu a bantu.”

Unange mukaji uuvua musele pautshivua nsongalume

¹⁵ Mukajebe udi bu mpokolu wa mayi matoke. Unue mayi a mpokolu ewu!

¹⁶ Mayi a mpokolu ewu, kaapuekedi mu misesu, kaatangalaki mu bisalu.

¹⁷ Mpokolu ewu ikale webe nkayebe! Kuena mua kumuabanyangana ne benyi to.

¹⁸ Usanke bua kusomba ne mukaji uuvua musungule, pautshivua nsongalume. Umusankishe.

¹⁹ Mukajebe udi ukunanga, udi mulenga bu ngulungu. Mubidi wende akusankishe matuku onsu. Usanke amu kusanka bua dinanga didiye ukunanga nadi.

²⁰ Muananyi, mukaji wa bende udi ukusamina muoyi bua tshinyi? Bua tshinyi udi musue kubuelela mukaji wa bende mu nzubu.

²¹ Wamanya! Maweja-Nangila udi ujooja mudi muntu yonsu wenza. Udi umona bionsu bidi muntu wenza.

²² Bilema bidi muntu wenza bidi bu mionji idiye udisuika nayi. Bidi bu buteyi budiye udikuata nabu.

²³ Muntu udi kayi udikanda mu malu, kayi udilama, udi udikebela kabutu kende. Bupale buende budi bumufikisha ku lufu.