Nsumuinu 4 - MUKANDA WA MYIDI MUKULU

Mudi muntu mua kupeta ne kulama meji

¹ Bana banyi, telejayi mudi tatu unulongesha. Nuikale ne ntema bua nupete lungenyi.

² Ndi nnulongesha malu malelela. Kanubengi bindi nnulongesha to.

³ Meme kabidi bavua bambela kudi tatu. Mamuanyi uvua munnange bikole.

⁴ Tatu wanyi uvua undongesha, wamba ne: “Vuluka malongesha anyi bimpe. Ukumbaje mikenji indi mukupe. Nanku neushale matuku mavule pa buloba.

⁵ Peta meji ne lungenyi. Kubipu muoyi to. Kulenguludi bindi nkuambila nansha.

⁶ Kulekedi meji, nanku neakuambuluishe. Wananga, nanku neakulame.

⁷ Bua kupeta meji, udibambe bikole bua kulonga mudiwu. Ufile bionsu biudi mupete bua ushale muena meji.

⁸ Nemeka meji, nanku neakunemeshe. Wananga, mudibu bananga mukaji, nanku neakupeteshe lumu.

⁹ Neakulengeje, mudi nsala wa kalumbandi ulengeja mutu wa muntu.”

Kulondi njila wa bantu babi

¹⁰ Muananyi, uteleje bimpe bindi nkuambila. Wewe mubiangate ne mushinga, neulale matuku mavule pa buloba.

¹¹ Ndi nkulongesha mua kulonda njila wa meji. Ndi nkuleja muudi mua kusomba bimpe.

¹² Nenku nentungunuke uya kumpala, kakuyi tshidi tshikutatshisha. Neunyeme kuyi udishinda.

¹³ Kuvidi bivuabu bakulongeshe. Ubivuluke: ke bidi bikupetesha muoyi.

¹⁴ Kuidikiji malu mabi adi bantu benza. Kulondi njila ya benji ba malu mabi.

¹⁵ Ubenge njila ayi, kupitshidimu. Udisunguile njila ya wewe kulonda.

¹⁶ Bantu babi kabena balala kabayi banji kuenza bibi. Kabena bamona tulu kuisu, padibu kabayi banji kulenduisha bantu bakuabu.

¹⁷ Bualu tshiabu tshiakudia mbubi. Tshiabu tshiakunua ntshikisu.

¹⁸ Njila udi bantu bakane balonda, udi bu butoke bua mu dinda, budi buenda buvulangana too ne mudi munya ukola.

¹⁹ Kadi njila idi bantu babi balonda idi miidima. Kabena bamanye muaba udibu mua kulendukila.

Wikale ne nsombelu muimpe

²⁰ Muananyi, teleja miaku yanyi. Umvua mundi nkubela.

²¹ Kupu mibelu yanyi muoyi. Kadi uyilame munda mua muoyi webe.

²² Idi ipesha bonsu badi bayilame muoyi ne bukole bua mubidi.

²³ Kenketa nangananga meji audi wela munda muebe, bualu wowu nealudike nsombelu webe wa panu.

²⁴ Mukana muebe kamupatuki miaku ya dishima. Mishiku yebe kayambi miaku ya didinga.

²⁵ Kuinami panshi. Paudi musue kuambila muntu bualu, umutangile patoke.

²⁶ Longolola bimpe biudi ne bua kuenza. Ushishe kubikumbaja ne muoyi umue.

²⁷ Uye amu buludi, kuyi ku dia balume nansha ku dia bakaji. Epuka malu mabi onsu.