Nsumuinu 27 - MUKANDA WA MYIDI MUKULU

¹ Kuditambishi bua malu adi mua kuenzeka malaba, bualu kuena mumanye tshidi mua kuenzeka lelu.

² Bakuabu bakutumbishe. Kadi wewe kudianyishi nansha!

³ Dibue didi ne bujitu, lusenga ludi luneema. Kadi lukinu lua mupote ndubipite bujitu.

⁴ Lonji ndubi. Tshiji tshidi bu mayi a muenji mukole. Kadi udi mua kukolela lubaabu nnganyi?

⁵ Mulunda udi ukubela patoke, udi upita udi upuwa, ukutshina.

⁶ Mibelu ya kudi mulunda idi ileja mudiye ukunanga ne muoyi umue. Kadi padi muena lukuna ukutua mishiku, udi ukudinga.

⁷ Muntu muukute udi ubenga nansha buitshi. Muena nzala udi udia bionsu, ne bidi ne bululu mene.

⁸ Muntu udi wendakanangana kule ne muabu, udi bu nyunyi udi wendela kule ne disua diende.

⁹ Bilengejilu bia mubidi, ne manananshi bidi bisankisha muntu. Kadi mulunda mupole malu, wa meji, udi upita bionsu abi.

¹⁰ Kulekedi balunda bebe nansha ba tatuebe. Paudi mu lutatu kuyi kudi muanenu, bualu misangu mikuabu muena mutumba mmupite muanenu udi kule.

¹¹ Muananyi ikala ne meji, nanku nensanke bikole. Pikala muntu unjana nemmone mua kumuandamuna.

¹² Muntu mudimuke udi umona dikenga diamba kumukuata, udiepuka. Bantu batatakane badi babuelamu, badikengeshisha.

¹³ Pikala muntu mudieyeka kuudi bua dibanza dia muntu uudi kuyi mumanye, ukuate tshilamba tshiende lukola, bua muntu uudi kuyi mumanye.

¹⁴ Muntu udi wela mukuende muoyi ne lunsuya ne dinda dionsu, badi mua kutangila disekelela diende adi bu kapeja.

¹⁵ Mukaji muena mutoyi mmufuanangane ne mulondu mutubuke udi usukumuka mayi dituku dia mvula.

¹⁶ Udi musue kumukandika udi bu muntu udi musue kukuata lupepele nansha kuambuila mafuta mu tshianza.

¹⁷ Badi basaka tshiamu ne tshikuabu, ke mudi muntu ulengeja pende muntu nende.

¹⁸ Muntu udi ulama mutshi wa mfiku bimpe, neadie bimuma biawu. Muena mudimu udi ukuba mfumuende nebamutumbishe.

¹⁹ Mudi mpala wa muntu umuenekela mu mayi, ke mudi muoyi wa muntu umueneka kudi bantu bakuabu.

²⁰ Mudi dijimba dia bafue dimina bantu, ke mudi muntu ujinga amu kujinga kabiyi bijika.

²¹ Bua kuteta mpawungi ne tshiamu tshitoke tshia mushinga mukole, badi babiela mu kapia. Kadi bua kumanya mushinga wa muntu utangile lumu ludiye nalu.

²² Nansha bobu batue mupale ne muinshi, mudibu batue ntete mu tshinu, bupale buende kabuakumushila kaba to.

²³ Umanye mudi bimuna biebe bikale. Ulame nyama yebe bimpe.

²⁴ Bualu biuma kabiena bishala kashidi. Udi mumanye ne: nansha tshifulu tshia bumfumu katshiena tshisambuluka mu diku dimue kashidi to.

²⁵ Kosa bisosa mu mpata. Diba didi bipiabipia bimena, kosa bidi pa mukuna bua kudisha nyama.

²⁶ Kuma bilamba ne miosa ya mikoku yebe. Sumbisha mbuji ya mpumbu bua kusumba budimi bupiabupia.

²⁷ Kama mabele a mbuji yebe bua wewe kunua, ne nzubu webe, kabidi ne bena mudimu bebe bakaji.