Nsumuinu 25 - MUKANDA WA MYIDI MUKULU

¹ Teleja nsumuinu mikuabu ya Shelomu ivuabu basangisha kudi bantu bavua bakuatshila mudimu mu lubanza lua Izkiya, mukalenga wa bena Yuda.

Nsumuinu mishilangane

² Tudi tunemeka Mvidi Mukulu bualu udi usokoka tshidiye wenza. Tudi tunemeka bakalenga padibu bumvuija bidibu benza.

³ Katuena bamanye kudi diulu diye kushikidila mulu. Katuena bamanye kudi buloba buye kushikidila muinshi. Katuena bamanye menemene meji adi mu mioyi ya bakalenga.

⁴ Padibu bumusha bikanganya ku tshiamu tshitoke tshia mushinga mukole, nsenda udi upeta tshiamu tshimpe tshia kuenza natshi tshintu tshimpe tshitambe.

⁵ Padibu bumusha bantu benzayi mu lubanza lua mukalenga, yeye neashindike bumfumu buende pa kukosa nsambu pa yoyi.

⁶ Kuditambishi paudi wimana kumpala kua mukalenga. Kuditeki pa muaba wa muntu munene.

⁷ Mbimpe bakuabu bakuambe ne: “Angata muanzu munene,” pa mutu pa kukuambabu ne: “Shila udi mukupite ku muanzu muaba.”

⁸ Wewe mumone bualu, lekela kuzukila bua kuya nabu ku tshilumbu. Pikala muntu uudi mufunde mukupishe, neuvue kuenza kabidi tshinyi?

⁹ Wewe mutandangane ne muena mutumba nebe, umvuangane nende. Kadi kusokolodi malu ende masokome avua muntu mukuabu mukuambile.

¹⁰ Bualu kampanda awu yeye mukumvue, neamanye ne: kuena mua kulama bualu busokome munda. Lumu luebe nelunyanguke.

¹¹ Muaku muimpe muambe pa bualu udi ne mushinga bu mudi tshintu tshivuabu basonga ne tshiamu tshia mpawungi, batshiteka pa dilonga dia tshiamu tshitoke tshia mushinga mukole.

¹² Mubelu udi muntu wa meji ukubela, uuteleje; udi ne mushinga mupite wa kakanu ka mpawungi ka ku munu nansha ka mu nshingu.

¹³ Bu mudi mayi matalala akolesha muntu tshikondu tshia luya tshidibu banowa bia pa madimi, ke mudi muntu udi ukumbaja bualu budibu bamutumine ukolesha mfumuende ku muoyi.

¹⁴ Muntu udi uditambisha bua bintu bidiye kayi upeshangana, mmufuanangane ne mavuba ne lupepele bidi kabiyi bilokesha mvula.

¹⁵ Lutulu ludi lutekesha muoyi wa mukoshi wa nsambu. Miaku ya kanemu idi ipita mikanu bukole.

¹⁶ Pawikala mupete buitshi, kutambi kubudia. Wewe mupitshishe kubudia, neuvue kubuluka.

¹⁷ Kupitshi kuyayaya ku nzubu kua muena mutumba nebe. Patupu neikale ukumona katshiyi ukusankidila kabidi.

¹⁸ Muntu udi ujadikila mukuende malu a dishima, udi umushipa, bu mudi tshikowa, muele wa mvita, nansha mukete mutue, bishipangana.

¹⁹ Kutekemena paudi mu dikenga kudi muntu udi kayi wenza tshidiye mukulaye, bidi bu kudiila ku dinu dibola nansha kuendela ku dikasa dikoyoboka.

²⁰ Kuimbila muntu udi mu dikenga misambu, kudi amu bu kuvula muntu tshinkutu dituku dia mashika, nansha bu kuela maluvu a buanji mu mputa.

²¹ Padi muena lukuna nebe ne nzala, umupeshe tshiakudia. Padiye ne nyota, umupeshe tshiakunua.

²² Paudi wenza nanku, udi umushiya mu dipampakana. Bidi bu kumuteka makala a kapia pa muntu. Maweja-Nangila neakufute.

²³ Lupepele lua ku mutu kua ditunga ludi lufuma ne mvula. Ke mudi biambamba bijula tshiji tshia bantu ba bungi.

²⁴ Mbimpe kusomba mu kazubu, pa mutu pa kusomba mu nzubu muimpe pamue ne mukaji wa mutoyi.

²⁵ Bu mudi mayi matalala atalaja muminu muume, ke mudi lumu lua disanka ludi lufumine ku ditunga dia kule lusankisha bantu.

²⁶ Bu mudi mayi mabi avuandulula mushimi nansha mpokolu, ke mudi muntu mubi unyanga muntu muimpe udi utekemena kudiye.

²⁷ Ki mbimpe kudia buitshi kupitshisha, nansha kukeba lumu kuela ne nseka.

²⁸ Muntu udi kayi udikolela bua kafiki munda, udi bu tshimenga katshiyi ne bimana, tshidi baluishi mua kukuata ne lukasa luonsu.