Nsumuinu 17 - MUKANDA WA MYIDI MUKULU

¹ Bidi bimpe kudia tshipese tshia diampa diume ne ditalala, pa mutu pa kubuela mu didia dia tshibilu dienzela mu nzubu wa mutoyi.

² Muena mudimu wa meji udi mupite muana mupote ku mushinga. Neapete tshiende tshia bumpianyi ne bantu ba muntu.

³ Mpawungi ne tshiamu tshitoke tshia mushinga mukole, badi babiteta mu kapia, kadi Maweja-Nangila udi uteta mushinga udi nawu muntu.

⁴ Muntu mubi udi uteleja ne ntema muntu udi wakula miaku mibi. Muena dishima udi uteleja muntu udi ushimangana.

⁵ Muntu udi useka bapele udi useka Mvidi Mukulu udi mubafuke. Muntu udi usanka padi dikenga dikuata mukuabu nebamunyoke.

⁶ Disanka dia bantu bakulumpe mpadibu bamone biikulu babu. Disanka dia bana mpadibu batangile baledi babu.

⁷ Muaku wa kanemu kawena ukumbanyina muntu mupote; kadi dishima kadiena dikumbanyina muntu udi ulombola bantu.

⁸ Bantu bakuabu badi bela meji ne: kubuejila muntu tshintu, neatupeteshe diakalenga, nekutututshishe dikasa dimpe mu midimu yetu yonsu.

⁹ Kupua tshilema muoyi nkulengeja bulunda. Kadi kutshiela misangu ne misangu kudi kushipa malanda.

¹⁰ Mubelu udibu bapesha muntu wa lungenyi udi mupite nkodi lukama mituuta muntu mupote.

¹¹ Muntu mubi udi ukeba mua kuenzelangana bibi. Ke mudiye udikebela yeye nkayende diakabi.

¹² Bidi bimpe kusambakena ne nyama wa lonji uvuabu banyenga bana bende, pa mutu pa kusambakena ne tshidingidingi tshia kalanda-musenga.

¹³ Muntu udi upingaja bubi pa buimpe buvuabu bamuenzele, dikenga kadiena diumuka ku nzubu kuende to.

¹⁴ Kutuadija matandu kudi bu kubumbula nkila. Puwa patshidi matandu kaayi manji kukola.

¹⁵ Mubingishi wa muena tshibawu, ne mupishi wa muntu muakane, mbantu babidi badi Maweja-Nangila udiwula mushindu wa momumue.

¹⁶ Makuta adi mua kuambuluisha muntu mutatakane ku tshinyi? Bua kusumba nawu meji anyi? Kena nansha welaku meji to!

¹⁷ Mulunda muimpe neakuambuluishe mu malu onsu. Muanetu udi pamue nanyi mu dikenga dionsu.

¹⁸ Muntu mubule lungenyi udi udieyeka bua dibanza dia munga muntu. Udi udiila mukuabu lupiku.

¹⁹ Udi musue kutandangana, mmusue kupia tshibawu. Udi udileja mudiye ne ditambisha neabutuke.

²⁰ Muntu muena dishima kena upeta diakalenga. Udi wakula malu mabi neabuele mu dikenga.

²¹ Udi ulela muntu mupote udi ne kanyinganyinga. Tatu wa muntu tshidingidingi kena ne disanka.

²² Disanka didi dijikija disama dia muntu. Kadi dibungama didi dikepesha bukole bua mubidi.

²³ Muntu mubi udi wanyisha mabuejila adibu bafila bua amone mua kunyanga tshilumbu.

²⁴ Muntu muakane udi ukuata mudimu ne meji. Kadi muntu mupote udi utangila kudiye kayi mua kufika.

²⁵ Muana mutshimbakane udi upetesha tatuende kanyinganyinga, ubungamija mamu uvua mumulele.

²⁶ Kufundila muntu udi kayi bualu tshibawu kudi kubi. Kunyoka muntu wa nsongu kakuena kuakana.

²⁷ Muntu mushidimuke udi ulaminyina miaku. Muntu wa lungenyi udi ukeba diba dia kuela meji.

²⁸ Nansha muntu mupale, padiye upuwa, badi bamuangata bu muena meji. Padiye kayi wakula badi bamuangata bu muena lungenyi.