Nsumuinu 16 - MUKANDA WA MYIDI MUKULU

Tuikale ne Maweja-Nangila mu nsombelu wetu wa buatshiabuatshia

¹ Muntu udi wela meji bua kuenza bualu kampanda munda muende. Kadi Maweja-Nangila ke udi mua kuamba muende mua ndekelu mudiye mumone.

² Muntu yonsu udi wela meji ne: bionsu bindi ngenza mbilenga. Kadi Maweja-Nangila ke udi mumanye mudi muoyi wa muntu yonsu.

³ Uteke midimu yebe mu bianza bia Maweja-Nangila, nanku nenkumbaje biuvua muele meji.

⁴ Tshintu tshionsu tshidi Maweja-Nangila muenze, tshidi ne kipatshila katshi; nanku wakalongoluela muntu mubi dituku dia dimunyoka.

⁵ Maweja-Nangila udi udiwula bantu badi baditambisha. Bushuwa neabanyoke kamuyi mpata.

⁶ Unange bantu, ulamate Maweja-Nangila, nanku neakufuile luse bua ntupakanyi yebe. Newepuke bubi paudi utshina Maweja-Nangila.

⁷ Padi Maweja-Nangila muanyishe nsombelu wa muntu, udi ubueja diumvuangana pankatshi pende ne baluishi bende.

⁸ Kupeta difutu dikese mu buakane, nkupita kuikala ne bintu bia bungi bipeta mu buenzayi.

⁹ Muntu udi upangadika bua kuenza bualu, kadi Maweja-Nangila ke udi ubujadika, ubukumbaja.

Bakalenga ba matunga

¹⁰ Padi mukalenga wa ditunga wakula mu dina dia Maweja-Nangila, nanku diba didiye ukosa nsambu kena utupakana.

¹¹ Maweja-Nangila udi musue bua bipimu bikale bijalame. Udi ushindika kabidi mudibu ne bua kutempa majitu.

¹² Mukalenga ki mmunange bua bantu benze bibi, bualu nkuasa wa bukalenga udi ujalama padi buakane.

¹³ Mukalenga udi ujinga bua bamuambile malu patoke. Udi unanga bantu badi bamba malu pa wowu.

¹⁴ Padi mukalenga ufika munda, udi mua kufikisha muntu ku lufu. Kadi muntu wa lungenyi udi umutuyisha.

¹⁵ Mimuemue pa mpala wa mukalenga idi isanguluja bantu. Muoyi wende wa kalolu udi bu mvula udi utalaja buloba.

Mudi bantu mua kusomba bimpe panu

¹⁶ Bidi bitambe buimpe kupeta meji ne lungenyi, pa mutu pa kupeta mpawungi ne tshiamu tshitoke tshia mushinga mukole.

¹⁷ Bantu bakane badi bepuka bubi, bualu muntu udi wakaja nsombelu wende udi ulama muoyi wende.

¹⁸ Udi uditambisha neabutuke. Udi udisua neapone panshi.

¹⁹ Bidi bipite buimpe kuikala muntu mupuekele udi usomba pamue ne bapele, pa mutu pa kuabanyangana bintu bivule ne bantu badi baditambisha.

²⁰ Muntu udi uteleja bidibu bamuambila neatuute dikasa dimpe. Udi utekemena kudi Maweja-Nangila udi muena diakalenga.

²¹ Muntu udi ujingulula malu ne meji udi muena lungenyi. Padiye ulongesha ne miaku idi isankisha bantu, ibatua ku muoyi, nebamuitabe lukasa.

²² Badi balonda meji nebapete muoyi. Batshimbakane badi babanyoka bua bupote buabu.

²³ Bantu ba meji badi basunguluja tshia kuamba. Ke mudibu baluisha bantu ne miaku yabu.

²⁴ Miaku mimpe idi bu buitshi, budi busheme mukana, biengelela mubidi.

²⁵ Muntu udi mua kuela meji ne: njila undi ndonda udi muimpe. Kadi njila awu udi mua kumufikisha ku lufu.

²⁶ Nzala idi ikuatshisha muntu mudimu bikole, bualu ku mudimu ke kudiye mua kutuyishila nzala yende.

²⁷ Muntu wa tshidingidingi udi wela meji a kuenzela bantu bibi. Ludimi luende ludi luosha bantu ne malu mabi.

²⁸ Muntu wa malu a muinshimuinshi udi ujuula matandu. Muena lunsonga udi unyanga malunda a bantu.

²⁹ Muntu wa tshikisu udi udinga balunda bende, ubakebela kabutu.

³⁰ Tangila muntu udi ubuita ku mesu, usumakaja mishiku. Mmulongolole bualu bua kuenza. Ukadi mumane kubuenza mene.

³¹ Nsuki mitoke nnsala wa kalumbandi, bualu amu bantu bakane ke badi balala matuku mavule pa buloba.

³² Tshilobu tshia mvita ke muntu udi kayi ufika munda lukasa. Muntu udi udikolela mmupite tshilobu tshidi tshikuata tshimenga.

³³ Bantu badi batshinka bidi mua kuenzeka, kadi Maweja-Nangila ke udi ushindika bualu muende mudiye musue.