Ngalate 4 - MUKANDA WA MYIDI MUKULU

¹ Ndi musue kunutekela tshilejilu: padi muntu udi ne bua kupiana mutshikale muana, udi amu bu mupika, nansha bintu bionsu bikale biende.

² Too ne ku diba diashindikabu kudi tatuende, udi amu ne bua kutumikila badi bamukolesha, ne badi bakuata mudimu ne bintu biende.

³ Ke mutuvua bapika ba makole a mulu, bualu tutshivua bana.

⁴ Kadi pakafika tshikondu tshivua Mvidi Mukulu mujadike, kutumaye Muanende. Bavua bamulele kudi mukaji. Uvua ne bua kukumbaja kabidi mikenji ya bena Yuda.

⁵ Ke muvuaye mupikule bavua mu bupika bua mikenji, bua tushale bana ba Mvidi Mukulu.

⁶ Bua kuleja munudi bana bende menemene, Mvidi Mukulu kutuma Mueyelu wa Muanende mu mioyi yetu. Mueyelu awu udi wela diyi ne: “Abba! Tatu wanyi!”

⁷ Nanku kutshiena mupika to. Ukadi muana. Bu muudi muanende, Mvidi Mukulu neakupeshe bilenga bidiye ulamina bana bende.

Polu udi upampakana bua bena Ngalate

⁸ Kale kanuvua bamanye Mvidi Mukulu nansha. Ke munuvua bapika ba bintu bivua kabiyi nansha mvidie mene.

⁹ Kadi mpindiewu nudi bamanye Mvidi Mukulu. Tuambe ne: Mvidi Mukulu mmunumanye! Kadi mmunyi munudi basue kupingana ku bintu ebi bidi kabiyi ne bukole, kabiyi mushinga, kudienza bapika babi?

¹⁰ Nudi nupita kunemeka matuku makuabu, ngondu, mivu, ne bidimu.

¹¹ Ndi mpampakana bikole bualu buenu! Mudimu mukole undi munukuatshile, neupete tshipeta anyi?

¹² Bana hetu, ndi nnulomba ne: numfuane, bu mumvua mukuate mudimu bua kunufuana! Kanuvua bangenzela meme bibi to.

¹³ Nudi bavuluke mumvua mupete mushindu wa kunulongesha Lumu lua Disanka musangu wa kumpala, bualu mvua nsama.

¹⁴ Disama dimvua nadi, divua dinuelesha meji bikole. Kadi kanuvua bampetule, nansha bambenge. Nuvua bangakidile anu bu mutumibue wa Mvidi Mukulu, nansha bu Yezu Kristu mene.

¹⁵ Nuvua basanke be! Kadi disanka adi diepi? Ndi nnujadikila ne: bu biobi mua kuenzeka, diba adi nuenu bonsu nuvua mua kuditonkona mesu, kuampesha.

¹⁶ Lelu nkadi muena lukuna wenu, bualu ndi muambila malu amu mudiwu anyi?

¹⁷ Bantu aba badi banulabidila pambidi. Kadi meji abu kaena mimpe nansha. Badi basue bua numuke kundi, nubalonde amu bobu.

¹⁸ Kuidikija bantu nkuimpe, kadi amu bantu badi benza bimpe. Nubidikije diba dionsu, ki ngamu pandi munkatshi muenu!

¹⁹ Bana banyi basuibue, bu mudi mukaji ukenga bua kulela muana, ke mundi nkenga tshiakabidi bualu buenu, bua Kristu amueneke patoke munda muenu.

²⁰ Kia! Bu meme mua kumonangana nenu diba edi! Mvua mua kunuambila miaku ivua mua kunutua ku muoyi. Bualu tshiena mumanye mundi mua kupita nenu!

Bana babidi ba Abrahame

²¹ Nudi basue kudienza bapika ba mikenji. Kadi kanuena bumvue tshidi mikenji eyi mene yamba anyi?

²² Mu mukanda wa mikenji tudi tubala ne: mbalelele Abrahame bana ba balume babidi, umue kudi Agare, mukaji mupika, mukuabu kudi Sara, mukaji uvuaye mudisunguile.

²³ Muana muabu bamulelele kudi Agare, mmulela bu bantu bonsu. Kadi muana muabu bamulelele kudi Sara, mmulela bualu bua dilaya divua Mvidi Mukulu mulaye.

²⁴ Munda mua bualu ebu mudi dilongesha dinene: bamamu babidi aba badi baleja ndondu ibidi: ndondu wa kumpala udi Agare uleja, ke wa pa mukuna wa Sinayi, wa bana bapika.

²⁵ Agare udi uleja mukuna wa Sinayi udi tshipeta tshia Arabiya, uleja kabidi lelu tshimenga tshia Yerushalayime, tshidi mu bupika pamue ne bonsu badi basombamu.

²⁶ Kadi Yerushalayime wa mu diulu kena mu bupika; yeye ke mamuetu!

²⁷ Bualu Mikanda ya tshijila idi yamba ne: “Sankaku, wewe mukaji udi kuyi ne bana! Ela mbila ya disanka, wewe udi kuyi mumvue dikenga dia pa kulela! Bualu mukaji muabu babenge, neikale ne bana bavule, bapite ba mukaji udi bayende munange.”

²⁸ Bana hetu, bu mmuabu balele Izake bualu bua dilaya divua Mvidi Mukulu mulaye, ke mudibu banulele nuenu.

²⁹ Bu muvua muana muabu balele bu bantu bonsu, mukengeshe kale muabu balele ku bukole bua Mueyelu wa Mvidi Mukulu, ke mudibu banukengesha lelu.

³⁰ Kadi Mikanda ya tshijila idi yamba ne: “Ipata mukaji mupika ewu ne muanende, bualu muana wa mupika kena mua kupiana pamue ne muana wa mukaji, udi kayi ku bumfumu bua muntu.”

³¹ Nanku, bana hetu, katuena bana ba mukaji mupika, tudi bana ba mukaji udi kayi ku bumfumu bua muntu.