Nehemya 8 - MUKANDA WA MYIDI MUKULU

^1-2 Dituku dia kumpala dia ngondu, kusangilabu bonsu mu Yerushalayime, pa muaba udi kumpala kua tshiibi tshia Mayi. Kulombabu mutuangaji Ezra, mumanyi mupiluke wa mikenji, bua kufika kumpala kuabu ne mukanda wa mikenji, ivua Maweja-Nangila mutumine bena Izrayele kudi Moshe. Ezra kuya ne mukanda awu, muaba uvua bena Izrayele basangile, balume, bakaji, ne bana bavua batantamane.

³ Dinda too ne munda munya, Ezra uvua anu muimane kulu muaba uvua tshiibi tshia Mayi, ubadila bena Izrayele ne diyi dikole bionsu biwabu bafunda mu mukanda. Bantu bonsu bavua bateleja ne ntema bionsu bivuaye ubala abi.

⁴ Ezra uvua muimane kulu pa mabaya avuabu balongolole anu bua bualu abu. Ku diboku diende dia bukole kuvua: Matitya, Shema, Anaya, Uriya, Ilkiya ne Masheya. Ku diboku diende dia bakaji kuvua Pedaya, Mishayele, Malkiya, Ashume, Ashebadana, Zekarya ne Meshulame.

⁵ Ezra uvua muimane kulu pa mabaya awu, mushindu uvua bantu bonsu mua kumumona. Ubutula amu mukanda, bantu bonsu kujuka kulu.

⁶ Ezra kuela Maweja-Nangila, Mvidi Mukulu munene, tuasakidila. Bantu bonsu kuela bianza mulu, kuitaba ne: “Amene! Amene!” Pashishe kuinyikabu mitu panshi bua kukukuila Maweja-Nangila.

⁷ Kubandulukabu, bualu bavua batuadija kubalongesha kudi bena Levi aba: Yeshuwa, Bani, Sherebiya, Yamine, Akube, Shabetayi, Odya, Masheya, Kelita, Azariya, Yozabade, Anane ne Palaya.

⁸ Bavua babala bashindumuna mukanda wa mikenji ya Mvidi Mukulu. Bavua bumvuija mikenji, bayijingulula bua muntu yonsu umvue tshiyuabu babale.

⁹ Bantu bonsu kudila muadi pa kumvua mikenji eyi. Nanku Nehemya mulombodi wa buloba abu, Ezra, mutuangaji mumanyi mupiluke wa mikenji, ne bena Levi bavua bumvuija mikenji, bavua babambila ne: — Lelu ndituku dia tshijila dia Maweja-Nangila Mvidi Mukulu wenu. Kanuena mua kubungama, nansha kudila to.

¹⁰ Ezra kubambila ne: — Pinganayi kuenu. Nudie bimpe, nunue bintu bisheme. Nuabanyangane ne badi kabayi ne tshintu, bualu lelu ndituku dia tshijila dia Maweja-Nangila wetu. Kanubungami, bualu disanka didi difuma kudi Mvidi Mukulu nedinupe bukole.

¹¹ Nanku, bena Levi kutuyisha bantu bonsu, bamba ne: — Shalayi talalaa! Lelu ndituku dia tshijila dia Mvidi Mukulu. Kanubungami to!

¹² Pashishe, bantu bonsu kupingana kuabu bua kudia ne bua kunua. Bavua babanyangana ne bavua kabayi ne tshia kudia, basanka bikole. Bualu bavua bumvua bimpe malu onsu avuabu babambile.

Tshibilu tshia tuzubu tua Bisasa

¹³ Butshia, bamfumu ba meku onsu a bena Izrayele, batuangaji ne bena Levi, kudisangisha, bua Ezra, mumanyi mupiluke, abumvuije bimpe mikenji ya Mvidi Mukulu.

¹⁴ Mu mukanda wa mikenji ivua Mvidi Mukulu mupeshe Moshe, bavua basangana muaba uvuabu bafunde ne: bena Izrayele balale mu tuzubu tua Bisasa padibu benza “Tshibilu tshia tuzubu tua Bisasa” mu ngondu wa muanda mutekete.

¹⁵ Bavua bamanyisha bualu bua tshibilu etshi mu bimenga bionsu too ne mu Yerushalayime. Bavua balomba bua bantu bonsu baye ku mikuna, bambule kabidi matamba a mitshi ya olive ya ku nzubu yabu, nansha ya mu tshisuku, nansha malala a mabue. Bambule kabidi matamba a mitshi mikuabu ya mabeji a bungi, bua bamone mua kuasa tuzubu tua bisasa.

¹⁶ Nanku, bena Izrayele kuya kukeba matamba a mitshi bua kuasa tuzubu tua bisasa. Bakuabu bavua basa tuzubu atu pa misonga ya nzubu yabu, banga kutuasabu mu mpangu ya nzubu yabu, bakuabu kutuasa mu mbanza ya nzubu wa Mvidi Mukulu. Banga kutuasabu muaba uvua tshiibi tshia Mayi, nansha muaba uvua tshiibi tshia Efrayime.

¹⁷ Bantu bonsu bavua bafume ku bupika, kuasabu tuzubu tua bisasa, kusombamu. Matuku awu awa a disanka dinene. Bualu bena Izrayele kabawa banji kuenza kabidi tshibilu atshi, bituadije ku tshikondu tshia Yeshuwa, muana wa Nune.

¹⁸ Dituku dionsu dia tshibilu, biangatshile dituku dia kumpala too ne dia ndekelu, bavua babala bualu mu mukanda wa mikenji ya Mvidi Mukulu. Tshibilu tshivua tshinenga matuku muanda mutekete. Nanku dituku dia muanda mutekete adi divua dia tshisangilu tshinene, bu muvua mikenji mibafundile.