Nehemya 6 - MUKANDA WA MYIDI MUKULU

Bena lukuna badi baluisha tshiakabidi bena Yuda

¹ Sanebalate, Tobiya, Ngesheme, muena Arabe, ne baluishi betu bakuabu, kumvuabu ne: nkadi mumane kuibaka tshimana tshia Yerushalayime. Kakuena muaba munyanguke kabidi to. Tshikondu atshi, tshivua muanji kupingaja bitupa bia biibi pa muaba wabi to.

² Nanku, Sanebalate ne Ngesheme kumbikila mu musoku wa Kefirime, mu tshibandabanda tshia Ono. Bavua basue kungenzela bibi.

³ Kadi meme kubandamuna ne: — Ndi ne mudimu wa bungi. Tshiena ne mushindu wa kumonangana nenu. Meme mumuke bua kumonangana nenu, mudimu kawena utungunuka to.

⁴ Nanku, Sanebalate ne Ngesheme bavua bambikila misangu inayi, bua kumonangana nabu. Meme kubandamuna anu mushindu umue, mbenga mua kumonangana nabu.

⁵ Musangu muitanu Sanebalate kuntumina mukanda kudi muntu uvuaye wenza nende mudimu. Kadi mukanda awu kauvua mubuikila to.

⁶ Mu mukanda bavua bafunde ne: “Ngesheme wangambidi ne: bantu ba bisamba bikuabu badi bamba ne: wewe Nehemya, ne bana benu, nudi nukeba kutomboka. Ke paudi wibakulula tshimana etshi. Badi bamba kabidi ne: udi musue kushala mukalenga.

⁷ Ke paudi musungule bambi, mua kuelabu diyi mu Yerushalayime, ne: Nehemya ke mukalenga wa bena Yuda. Kadi mukalenga wa bakalenga neamanye bualu ebu lukasa. Nanku, ufike tuyukile nebe.”

⁸ Meme kumuandamuna ne: “Bionsu biudi muambe kabiena bia bushiwa to, mbia dishima. Wewe nkayebe ngudi mufuanyikije malu awu!”

⁹ Bionsu abi, Sanebalate ne Ngesheme bavua babienza bua binkuatshisha bowa. Bavua bakeba mua tuetu kuteketa mu maboku, kulekela mudimu. “Eyi, Maweja-Nangila ungambuluishe mu mudimu ewu.”

¹⁰ Dituku dikuabu meme kuya kumonangana ne Shemaya, muana wa Delaya, ne muikulu wa Metabeyele. Bualu kavua mua kufika kundi to. Kungambilaye ne: — Tubuelele mu nzubu wa Mvidi Mukulu, muaba wa tshijila, tukange biibi bikole, bualu baluishi bebe nebafike butuku bua kukushipa.

¹¹ Meme kuandamuna ne: — Meme tshiena mua kunyema to! Kabidi muntu bu mundi emu, ndi mua kubuela muaba wa tshijila kushala ne muoyi anyi? Nansha kakese. Tshiena mua kubuelamu to.

¹² Meme kumona bimpe ne: kena ungambila malu a kudi Mvidi Mukulu to. Kadi Tobiya ne Sanebalate mbamupeshe makuta, bua kungambilaye malu awu.

¹³ Bavua bamupe makuta bua tshinyi? Anu bua meme kuikala ne bowa, kulonda meyi abu, kupia tshibawu. Ke muvuabu mua kunyanga lumu luanyi, kumfuisha bundu.

¹⁴ “Eyi Mvidi Mukulu wanyi, vuluka bibi bivuabu bangenzela kudi Tobiya, ne kudi Sanebalate, kabidi ne kudi muambi mukaji Nowadiya, ne kudi bambi bakuabu bavua bakeba kunkuatshisha bowa.”

¹⁵ Tuetu bamane kuenza mudimu matuku makumi atanu ne abidi, tuetu kujikija dibaka dia tshimana dituku dia makumi abidi ne ditanu dia ngondu wa Elule.

¹⁶ Pashishe, baluishi betu bavua basombe mu bisamba bivua mutumba netu, kumvua bualu abu, kupetabu bowa ne bundu. Kujadikabu ne: Mvidi Mukulu uvua mutuambuluishe mu mudimu ewu.

¹⁷ Tshikondu atshi, bakulu bakuabu ba mu ditunga dia bena Yuda, bavua batuminangana mikanda ne Tobiya.

¹⁸ Bena Yuda ba bungi kutuabu nende ndondu, bualu uvua muku wa Shekanya, muana wa Ara, muena Yuda. Muanende wa balume Yowanane uvua musele Meshulame, muana wa Berekiya.

¹⁹ Bavua bamutumbisha, meme mutangile. Bavua bamulondele kabidi bimvua meme muambe. Tobiya muine uvua untumina mikanda bua kunkuatshisha bowa.