Nehemya 5 - MUKANDA WA MYIDI MUKULU

Nehemya udi ujikija kansungasunga

¹ Dituku dikuabu, bantu balume ne bakaji bavua banyingalale bikole bua bana babu bakuabu bena Izrayele.

² Bantu bakuabu bavua bamba ne: “Tuetu ne bana betu ba balume ne ba bakaji tudi ba bungi. Tudi basue kupeta ntete ya kuenza bukula mikumbane, bua tuetu kudia, tuikale ne muoyi.”

³ Banga bavua bamba ne: “Tudi ne bua kufila madimi etu, mionji ya mvinyo, ne nzubu yetu mene, bu tshieya, bua tupete ntete ya kuenza bukula mu tshikondu tshia nzala.”

⁴ Bakuabu bavua bamba ne: “Bua kulambula mukalenga wa bakalenga tshitadi, tudi ne bua kueyeka madimi etu, mionji yetu ya mvinyo, bua kupeta makuta.

⁵ Kadi tudi bantu ba tshisamba tshimue! Bana betu kabena bashilangane ne bana ba bena Yuda bakuabu to. Kadi tuetu tudi ne bua kufila bana betu mu bupika. Bana betu ba bakaji bakadi mene bamane kubuelamu. Katuena ne tshitadi mua kuenza kabidi to. Bualu madimi etu, ne mionji yetu ya mvinyo, mbamane kubiangata.”

⁶ Meme mumane kumvua muvua bamue bantu bakengesha bakuabu, meme kupeta tshiji tshia bungi.

⁷ Mvua musue kutandisha bakulu ba ditunga, ne balombodi, bua kabikadi bakengesha bana babu bikole nanku to. Nanku, meme kubikidisha bantu bonsu mu tshisangilu.

⁸ Meme kubambila ne: — Tuetu kuenza muetu muonsu, kupikula bana betu bena Yuda bavua badisumbisha bu bapika kudi bantu benyi. Kadi nuenu mpindiewu bena Izrayele, nukadi nupanangana nkayenu mu bupika! Bantu bonsu kupuwa.

⁹ Meme kubambila ne: — Nudi benze bibi bitambe, kanuyi mua kutshinaku Mvidi Mukulu wetu! Nanku, baluishi betu, bantu ba bisamba bikuabu, nebanulembakaje.

¹⁰ Meme ne bana betu, ne bena mudimu banyi, tavua basombeshe bantu nkanu mitoke ya mushinga mukole, ne ntete ya kuenza bukula. Nanku, tuanyishi bua kabatapingajidi binta bietu.

¹¹ Nuenu kabidi lelu nupingajile bantu madimi abu, mionji ya mvinyo, mitshi yabu ya olive, ne nzubu yabu. Kanulombi tshintu tshia kasombele ku nkanu ya tshiamu tshitoke tshia mushinga mukole, ku ntete ya kuenza bukula, ku maluvu a mvinyo, nansha ku mafuta, binuvua babasombeshe.

¹² Bantu bobu kuamba ne: — Tudi bitabe muudi muambe. Neapingaje bintu bituvua bangate. Katuakulomba kabidi tshia kasombele nansha. Nanku, meme kubikidisha batuangaji, kuambila bantu bavua basombeshangana bintu, bua baditshipe ne: netukumbaje bituvua balaye.

¹³ Pashishe meme kunyukula luzemba lua tshilamba tshianyi, ngamba ne: — Ke mudi Mvidi Mukulu mua kunyukula bonsu badi kabayi bakumbaja malaya abu. Mvidi Mukulu abipate mu nzubu yabu, abanyenge bintu biabu, bashale bianza bitupu. Bantu bonsu bavua bamba ne: — Amene! Bikale amu nanku. Bantu bonsu bavua batumbisha Maweja-Nangila. Matuku onsu bavua bakumbaja biwabu balaye.

¹⁴ Biangatshile dituku divuabu bansungule mulombodi wa buloba bua bena Yuda, mmumue ne munkatshi mua bidimu dikumi ne bibidi, biangatshile ku tshidimu tshia makumi abidi too ne ku tshidimu tshia makumi asatu ne tshibidi tshia bukalenga bua Artashasta, meme ne balombodi banyi ba mu bukalenga, katuena balombe tshintu ku bitadi biwabu balambula mulombodi wa buloba to.

¹⁵ Kadi bamfumu bavua balombodi kumpala kuanyi, bavua batatshisha bantu, balomba biakudia ku bukole, maluvua mvinyo, ne nkanu mitoke ya mushinga mukole mipite pa makumi anayi. Nansha bambuluishi ba balombodi ba buloba, bavua anu batatshisha bantu. Kadi meme kubenga kashidi bua kuenza nanku, bualu mvua ntshina Mvidi Mukulu.

¹⁶ Meme kukuata mudimu ne bianza bianyi bua kuibakulula tshimana; bena mudimu banyi bavua benza anu nanku. Kadi katuena bakebe mua kusumba lupangu ku mushinga mutekete, bualu bua muanzu utuvua nawu.

¹⁷ Kadi mvua ne bua kudisha bakulu ba bena Yuda lukama ne makumi atanu, kabidi ne benyi bavua bafume ku matunga adi netu mutumba.

¹⁸ Dituku dionsu bavua bipika ngombe umue, mikoku isambombu, ne nzolu ya bungi kabidi. Matuku dikumi apita, bavua bafila misangu yonsu maluvu mapite bungi, amvua ne bua kufuta. Kadi nansha bikale nanku, tshiena mulombe tshidi mulombodi wa buloba mua kulomba. Bualu midimu ivua bantu benza ikavua bujitu bunene pambidi pabu.

¹⁹ “Eyi Mvidi Mukulu wanyi, umvulukeku, bua mudimu onsu undi muenzele bantu aba.”