Nehemya 3 - MUKANDA WA MYIDI MUKULU

Bena Yuda badi bibakulula bimana bia Yerushalayime

¹ Mutuangaji munene Eliyashibe, kutuadija mudimu pamue ne batuangaji bakuabu. Kuibakululabu tshiibi tshia Mikoku, kutshijidilabu. Kuelabu bitupa bibidi bia tshiibi ku mbelu. Kuibakululabu tshimana too ne ku kaleya ka Meya. Kujidilabu tshimana atshi. Kutungunukabu ne dibaka tshimana too ne ku kaleya ka Ananeyele.

² Bena mu tshimenga tshia Yeriko, bavua bibakulula tshitupa tshia tshimana tshivua tshilonda tshia batuangaji, pashishe Zakure, muana wa Imri.

³ Bena mu musoku wa Sena, kuibakululabu tshiibi tshia Minyinyi ya mu mayi. Bobu bamane kulamakaja mabaya a tshiibi, kuelabu bitupa bibidi bia tshiibi ku mbelu, kuasabu kabidi milonda ya kukanga nayi tshiibi.

⁴ Bantu bavua benza mudimu tshitupa tshikuabu bavua Meremote, muana wa Uriya, ne muikulu wa Akose; pashishe Meshulame, muana wa Berekya, ne muikulu wa Meshezabele; pashishe Sadoke, muana wa Baana;

⁵ pashishe bena mu tshimenga tshia Tekowa. Kadi, bakulu ba mu tshimenga tshia Tekowa kubenga bua babatumine diyi kudi bantu bavua batangila mudimu awu.

⁶ Yoyada, muana wa Pasheya, ne Meshulame, muana wa Beshodia, kulongololabu tshiibi tshia Yeshana. Bobu bamane kulamakaja mabaya a tshiibi, kuelabu bitupa bibidi bia tshiibi ku mbelu, kuasabu kabidi milonda ya kukanga nayi tshiibi.

⁷ Bantu bavua benza mudimu ku tshitupa tshikuabu tshia tshimana bavua Melatiya, wa mu Ngibone, Yadone, wa mu musoku wa Meronote, ne bantu bakuabu ba mu Ngibone ne ba mu Mispa. Bavua babafuta kudi mulombodi wa buloba buvua luseke ludi diba dibuelela lua musulu wa Perate.

⁸ Pashishe, bavua benza mudimu kudi nsenda wa biamu bia mpawungi, diende Uziyele, muana wa Araya, ne kudi Ananiya, muenji wa manananshi. Kujikijabu mudimu wabu mu Yerushalayime anu pavuabu bafike muaba uvua tshimana tshialabale.

⁹ Muntu uvua wenza mudimu tshitupa tshia tshimana tshivua tshilonda, uvua Refaya, muana wa Ure. Refaya uvua mulombodi wa tshitupa tshimue tshia tshimenga tshia Yerushalayime.

¹⁰ Pashishe, Yedaya, muana wa Arumafe, ke uvua utangila bantu bavua bibakulula tshimana tshivua tshilulamangane ne nzubu wende. Pashishe Atushe, muana wa Ashabneya, uvua wenza mudimu ku tshitupa tshia tshimana tshivua tshilonda.

¹¹ Malkiya, muana wa Arime, ne Ashube, muana wa Pakate-Mowabe, bavua benza mudimu ku tshitupa tshikuabu tshia tshimana tshivua ne kaleya ka Tshioshilu.

¹² Shalume, muana wa Alokesha, uvua wenza mudimu ku tshitupa tshikuabu, bamuambuluisha kudi bana bende ba bakaji. Shalume uvua mulombodi wa tshitupa tshikuabu tshia tshimenga tshia Yerushalayime.

¹³ Tshiibi tshia ku Tshibandabanda, bavua batshilongolola kudi Anune, ne bena mu tshimenga tshia Zanowa. Bobu bamane kulongolola tshiibi atshi, kuelabu bitupa bibidi bia tshiibi ku mbelu, kuasabu kabidi ne milonda ya kukanga nayi tshiibi. Kulongololabu kabidi tshimana, bule bua metre nkama itanu too ne ku tshiibi tshia ku Dyala.

¹⁴ Tshiibi tshia ku Dyala, bavua batshilongolola kudi Malkiya, muana wa Rekabe. Malkiya uvua mulombodi wa buloba bua Bete-Kereme. Malkiya mumane kulongolola tshiibi atshi, kuelaye bitupa bibidi bia tshiibi ku mbelu, kuasaye kabidi ne milonda ya kukanga nayi tshiibi.

¹⁵ Tshiibi tshia ku Mpokolu wa mayi bavua batshilongolola kudi Shalume, muana wa Koloze. Shalume uvua mulombodi wa buloba bua Mispa. Shalume mumane kulongolola tshiibi atshi, muenze ne mutu watshi, kuelaye bitupa bibidi bia tshiibi ku mbelu. Kuasaye milonda ya kupayika nayi tshiibi. Pashishe, kuibakululaye tshimana pabuipi ne dijiba dia Shilowa, pankatshi pa lupangu lua mukalenga, ne tshibandilu tshidi tshifumina mu Tshimenga tshia Davide.

¹⁶ Pashishe, Nehemya, muana wa Azbuke, uvua mulombodi wa tshia bibidi tshimue tshia buloba bua Bete-Sure, uvua wenza mudimu too ne pabuipi ne lukita lua Davide, ne ku dijiba dia mayi divuabu bumbule, ne ku nzubu wa bena mvita bavua balame mukalenga.

¹⁷ Bena Levi bavua benza mudimu tshitupa tshikuabu tshia tshimana, ke Rekume, muana wa Bani; Ashabiya, mulombodi wa tshia bibidi tshimue tshia buloba bua Keyila, mu dina dia bena kuabu;

¹⁸ Bavayi, muana wa Enadade, uvua mulombodi wa tshitupa tshikuabu tshia buloba bua Keyila;

¹⁹ Ezere, muana wa Yeshuwa, uvua mulombodi wa Mispa. Yeye ke uvua nuibakulule tshitupa tshia tshimana tshivua tshilulamangane ne njila uvua ubanda ku nzubu uvua ne bintu bia mvita, muaba uvua tshimana tshialabale.

²⁰ Muntu uvua wenza mudimu tshitupa tshikuabu tshia tshimana uvua Baruke, muana wa Zabayi. Uvua wenza mudimu ne disuminyina, biangatshile muaba uvua tshimana tshialabale, too ne ku mushiku wa nzubu wa Eliyashibe, mutuangaji munene.

²¹ Pashishe, Meremote, muana wa Uriya, ne muikulu wa Akose, uvua wenza mudimu wa kuibakulula tshimana, biangatshile ku mushiku wa nzubu wa Eliyashibe, too ne ku ndekelu kua nzubu awu.

²² Tshitupa tshikuabu tshia tshimana, bavua batshilongolola kudi batuangaji bavua bafumine ku misoku ivua pabuipi ne Yerushalayime.

²³ Binyamine ne Ashube bavua bibakulule tshitupa tshia tshimana tshivua tshilulamangane ne nzubu yabu. Kadi Azariya, muana wa Masheya, ne muikulu wa Ananya, uvua wenza mudimu pabuipi ne nzubu wende.

²⁴ Binuyi, muana wa Enadade, uvua wibakulula tshitupa tshia tshimana tshivua pankatshi pa nzubu wa Azariya, too ne ku ditumba dia tshimana divua dipatuka.

²⁵ Palale, muana wa Uzayi, uvua wibakulula tshitupa tshia tshimana tshivua pankatshi pa ditumba divua dipatuka, ne ku kaleya kavuabu basa kumpala kua nzubu wa bukalenga, uvua pabuipi ne lubanza lua bena mvita bavua balame mukalenga. Pashishe, Pedaya, muana wa Paroshe,

²⁶ ne bantu bakuabu bavua benza mudimu ku nzubu wa Mvidi Mukulu, basomba ku Ofele, bavua benza mudimu too ne ku kaleya kavua mu ditumba dia tshimana divua dipatuka, luseke ludi diba dipatukila lua tshiibi tshia Mayi.

²⁷ Bena mu tshimenga tshia Tekowa bavua bibakulula tshimana, ku tshitupa tshivua tshilulamangane ne kaleya kanene kavua mu ditumba dia tshimana divua dipatuka, ne ku tshimana tshia Ofele.

²⁸ Biangatshile ku tshiibi tshia nyama ya Tubalu, mutuangaji yonsu uvua ulongolola tshitupa tshia tshimana tshivua tshilulamangane ne nzubu wende.

²⁹ Pashishe, bantu bavua bibakulula tshitupa tshikuabu bavua: Sadoke, muana wa Imere, uvua mulongolole tshitupa tshivua tshilulamangane ne nzubu wende; Shemaya, muana wa Shekanya, uvua mulami wa tshiibi tshia luseke ludi diba dipatukila.

³⁰ Bavua balongolola tshitupa tshikuabu kudi Ananiya, muana wa Shelemiya, ne kudi Anune, muana muisambombu wa Salafe. Pashishe, Meshulame, muana wa Berekya, uvua wenza mudimu mu tshitupa tshivua tshilulamangane ne muaba uvuaye usomba.

³¹ Pashishe, Malkiya, nsenda wa biamu, uvua wenza mudimu too ne ku nzubu uvua bantu bonsu bavua benza mudimu ku nzubu wa Mvidi Mukulu, ne bangenda mushinga basomba. Nzubu awu uvua mululamangane ne tshiibi tshia Mifkade. Uvua utungunuka ne mudimu too ne ku tshibambalu tshia kulu tshivua mu ditumba dia tshimana.

³² Bansenda bakuabu ne bangenda mushinga bavua benza mudimu ku tshitupa tshia ndekelu tshia tshimana, pankatshi pa tshibambalu tshia kulu tshivua mu ditumba dia tshimana, ne tshiibi tshia Mikoku.

Bena lukuna mbasue kukandika mudimu

³³ Sanebalate umvua lumu ne: tuetu bena Yuda tudi tuibakulula bimana, kufikaye munda bikole. Pashishe kutuelaye meyi a nsenda,

³⁴ kumpala kua bana babu ne kua bena mvita ba mu ditunga dia Samariya, wamba ne: — Bena Yuda aba, kabena ne bukole to. Kadi mbasue kuenza tshinyi? Badi mua kujikija mudimu ewu ne kulambula Mvidi Mukulu wabu milambu anyi? Mudimu ewu wa kuibakulula bimana ne mabue avuabu bamane kosha bimanshe ku dyala, nebaujikije anu lelu anyi?

³⁵ Tobiya, muena Amone, uvua pabuipi ne Sanebalate, kukemaye, wamba ne: — Bibake anu kuibaka! Padi nyama wa mukenga ubanda pa tshimana tshia mabue atshi, netshiupuke!

³⁶ Diba adi meme kuela lubila, ngamba ne: “Maweja-Nangila Mvidi Mukulu wetu, teleja mudi bena lukuna betu batuseka! Wewe ubalengulule, bu mudibu batulengulula emu. Wewe ubafile mu bianza bia bena lukuna babu. Babakuate, baye nabu mu ditunga dia bantu ba bisamba bikuabu.

³⁷ Kuena mua kubajimijila mibi yabu to. Kuena mua kulekela bilema bidibu benza. Kadi badi batutangila, batupenda, bualu tudi tuibakulula bimana.”

³⁸ Ke mutuvua benze mudimu wa dibakulula tshimana nanku. Tuvua bibakulule bimana, babibandishe too ne pankatshi mu nseke yabi yonsu. Bualu muntu yonsu uvua wenza mudimu ne muoyi mujima.